ដើម្បីលុយ កូរ៉េខាងជើង សុខចិត្តលក់ប្រភពថាមពលសំខាន់មួយឲ្យចិន

2018-02-27 07:20:34
ចំនួនមតិ 0 | ចំនួនចែករំលែក 0

ចន្លោះមិនឃើញ

កូរ៉េខាងជើង ត្រូវបានគេរាយការណ៍ថាបានលក់អគ្គិសនីឲ្យចិនដើម្បីលុយ បើទោះបីជាមានកង្វះខាតថាមពលជាប់លាប់ក៏ដោយ។

យោងតាមសារព័ត៌មានមួយឲ្យដឹងថា ការលក់នេះចាប់ផ្ដើមឡើងកាលពីថ្ងៃទី ៩ កុម្ភៈ ដោយភាគីចិនបង់ប្រាក់ចន្លោះពី ៦ ទៅ ១០ ម៉ឺនដុល្លារក្នុងមួយខែ សម្រាប់ថាមពលអគ្គិសនីដែលបង្កើតឡើងដោយទំនប់វារីអគ្គិសនីជិតព្រំដែនរវាងប្រទេសទាំងពីរ។ ប្រភពខាងលើនិយាយថា "ទំនប់វារីអគ្គិសនីក្នុងខេត្ត Sakju កំពុងផ្គត់ផ្គង់អគ្គិសនីដល់រោងចក្រចិនមួយដែលផលិតឧបករណ៍ការពារភ្លើងឆេះ។ អាជ្ញាធរកូរ៉េខាងជើង បានទទួលយកការទូទាត់ជាសាច់ប្រាក់សុទ្ធ។”

ផ្ទុយទៅវិញ ធនាគារពិភពលោកប៉ាន់ប្រមាណថា ប្រជាជនកូរ៉េខាងជើងតិចជាងមួយភាគបីប៉ុណ្ណោះដែលមានអគ្គិសនីប្រើប្រាស់។ រូបភាពពីផ្កាយរណបបង្ហាញថា ភាគច្រើននៃប្រទេសមិនមានអគ្គិសនីប្រើប្រាស់នោះទេនៅពេលយប់។

យ៉ាងណាមិញ ការលក់ថាមពលអគ្គិសនីឲ្យទៅចិន ត្រូវបានគេមើលឃើញថាកូរ៉េខាងជើង កំពុងជួបវិបត្តិរូបិយប័ណ្ណបរទេសធ្ងន់ធ្ងរក្រោយរងការដាក់ទណ្ឌកម្មអន្តរជាតិ។ គួរបញ្ជាក់ថា ទណ្ឌកម្មអន្តរជាតិបានរារាំងកូរ៉េខាងជើង មិនឲ្យនាំចេញ ធ្យូង, ដែក, រ៉ែ, អាហារ, ឈើ និងក្រណាត់ ព្រមទាំងមិនអាចបញ្ជូនពលករទៅបរទេសទៀតផង៕