កោតសរសើរបំផុត ពេលដឹងពីគំនិតដ៏អស្ចារ្យរបស់ស្ត្រីខ្មែរម្នាក់ ចំពោះសូត្រកម្ពុជា
- 2018-02-28 02:54:59
- ចំនួនមតិ 0 | ចំនួនចែករំលែក 0
កោតសរសើរបំផុត ពេលដឹងពីគំនិតដ៏អស្ចារ្យរបស់ស្ត្រីខ្មែរម្នាក់ ចំពោះសូត្រកម្ពុជា
ចន្លោះមិនឃើញ
អ្នកស្រី តិច ស៊ីមហ៊ាង ជាស្ត្រីខ្មែរមួយរូប មានឆន្ទៈកសាងឯករាជ្យភាពខាងផ្នែកសេដ្ឋកិច្ចសម្រាប់ស្ត្រីកម្ពុជា និងធ្វើឲ្យសិប្បកម្មត្បាញសូត្រខ្មែររស់ឡើងវិញ។ ការងារនេះជាដំណើរផ្លូវវែងឆ្ងាយ ប៉ុន្តែលទ្ធផលទទួលបានគឺសមទៅនឹងការចំណាយកម្លាំងកាយចិត្តរបស់អ្នកស្រី រហូតក្លាយជាសមាគមទ្រទ្រង់ស្ត្រីតម្បាញ និងអភិវឌ្ឍសូត្រខ្មែរ។
ស្ត្រីមានបន្ទុកយ៉ាងច្រើនក្នុងគ្រួសារ តួយ៉ាងកាព្វកិច្ចមើលខុសត្រូវកូន និងផ្ទះសំបែង ស្ត្រីខ្លះទៀតត្រូវបន្ថែមការងារដើម្បីរកចំណូលបន្ថែម។ ការកសាងតម្លៃស្ត្រីក្នុងប្រទេសកំពុងអភិវឌ្ឍន៍មិនមែនជារឿងងាយស្រួលនោះឡើយ ព្រោះត្រូវតស៊ូជម្នះលើជំនឿចាក់ឫសចាក់គល់ និងផ្នត់គំនិតមនុស្សនៅក្នុងសង្គមជាដើម។
ជាក់ស្ដែង សមាគមទ្រទ្រង់ស្ត្រីតម្បាញ និងអភិវឌ្ឍសូត្ររនះ កើតចេញពីការតស៊ូរបស់ស្ត្រីខ្មែរនៅតំបន់កោះដាច់ ដែលតែងតែជាប់ដៃជាប់ជើងនឹងការងារផ្ទះផង និងឆ្លៀតរកប្រាក់ចិញ្ចឹមគ្រួសារផង។ ដើមចមនេះ ធ្វើឲ្យ អ្នកស្រី តិច ស៊ីមហ៊ាង សម្រេចចិត្តតស៊ូបង្កើតជាសមាគមស្ត្រីតម្បាញ និងដាក់មហិច្ឆតាកែប្រែតំបន់នេះឲ្យក្លាយជាមជ្ឈមណ្ឌលសូត្រមាសខ្មែរនៅ៥ឆ្នាំក្រោយ។
ការចាប់ផ្ដើមជំនួញមួយនេះ អ្នកស្រី តិច ស៊ីមហ៊ាង គ្រាន់ជាអាជីវករទិញលក់សូត្រធម្មតា ប៉ុន្តែដោយសារទីផ្សារក្រៅប្រទេសមានតម្រូវខ្ពស់ បានផ្លាស់ប្ដូរអ្នកស្រីពីអាជីវករ ទៅជាអ្នកផលិតវិញ ៖ « ខ្ញុំមើលឃើញថា ខ្ញុំអាចជួយដល់សង្គមនិងស្ត្រីខ្មែរយើង...សូត្រខ្មែរមិនត្រឹមតែមានតម្លៃក្នុងស្រុកទេ ហើយមានសក្ដានុពលនាំចេញទៅក្រៅប្រទេសទៀត»។
សមាគមទ្រទ្រង់ស្ត្រីតម្បាញ និងអភិវឌ្ឍសូត្ររនះ មានសមាជិកសរុប ៨០នាក់ស្ថិតក្នុងភូមិរនះ សង្កាត់កោះដាច់ ខណ្ឌជ្រោយចង្វារ រាជធានីភ្នំពេញ។ អ្នកស្រី តិច ស៊ីមហ៊ាង ត្រូវបានបោះឆ្នោតឲ្យធ្វើជាប្រធានកាលពីថ្ងៃទី ២៧ កុម្ភៈ ឆ្នាំ២០១៨ អ្នកស្រី ប្ដេជ្ញាថា នឹងធ្វើឲ្យតម្លៃសូត្រខ្មែរកាន់តែល្បីមិនមែនត្រឹមក្នុងស្រុកប៉ុណ្ណោះទេ ពោលគឺឈរលំដាប់ឆាកអន្តរជាតិ។ បច្ចុប្បន្ន តម្លៃសូត្រខ្មែរ អាចលក់បានរហូតដល់ ១០០០ដុល្លារក្នុង ១ក្បិន ហើយប្រទេសគាំទ្រខ្លាំងបំផុតគឺប្រទេសជប៉ុន។ នេះបើតាមការអះអាងរបស់អ្នកស្រី ស៊ីមហ៊ាង៕