Mbappe របួសម្នាក់ទៀតហើយ ជាក្ដីបារម្ភកាន់តែខ្លាំងរបស់ PSG

2018-03-01 03:36:25
ចំនួនមតិ 0 | ចំនួនចែករំលែក 0

ចន្លោះមិនឃើញ

Paris St-Germain បានយកឈ្នះ Marseille សាជាថ្មីក្នុងលទ្ធផល ៣ទល់នឹង ០ ឡើងទៅវគ្គពាក់កណ្ដាលផ្ដាច់ព្រ័ត្រ Coupe de France តែរឿងអកុសលខ្សែប្រយុទ្ធវ័យក្មេង Kylian Mbappe ទទួលរងរបួសកជើង។

៣គ្រាប់របស់ PSG រកបានដោយ Angel Di Maria ២គ្រាប់និង Edinson Cavani មួយគ្រាប់។ យ៉ាងណាក្នុងការប្រកួតនេះ Mbappe បានបង្ខំចិត្តប្ដូរចេញនៅវគ្គទីមួយ ដោយសារមានបញ្ហារបួសខ្លះ ធ្វើឲ្យ PSG កាន់តែបារម្ភខ្លាចបាត់បង់កីឡាករល្អមួយទៀតនៅ Champions League វគ្គ១៦ក្រុមចុងក្រោយ ប៉ះជាមួយ Real Madrid។

ក្លឹបមានមូលដ្ឋានក្នុងទីក្រុងប៉ារីសបានអវត្តមានកីឡាករថ្លៃជាងគេលើលោក Neymar ម្នាក់ហើយនៅ UCL ព្រោះមានបញ្ហាកជើងដូចគ្នា កាលប៉ះ Marseille ក្នុងលីគកាលពីចុងសប្ដាហ៍។ សម្រាប់របួសរបស់ Mbappe ពេលកំពុងស្ថិតក្នុងស្ថានភាពតាមដានមិនទាន់ដឹងថា ស្រាលឬធ្ងន់ទេ។

លោក Unai Emery កំពុងកើតកង្វល់ជាខ្លាំង និងសង្ឃឹមថាកីឡាករខ្ចីជើងពី Monaco មិនមានបញ្ហាធ្ងន់ទៅចុះ។ "Mbappe មានបញ្ហាកជើង។ គេបានសុំមិនលេងនៅវគ្គទី២ ហើយខ្ញុំសង្ឃឹមថាវាមិនមែនជារបួសធំដុំចុះ"។ សម្ដី Unai Emery៕

ប្រភព៖ BBC ប្រែសម្រួល៖ ហេង សុធារិទ្ធិ