ក្រសួងប្រកាសឲ្យចុះឈ្មោះប្រឡងបាក់ឌុបហើយ តែត្រូវមានឯកសារទាំងនេះដាច់ខាត

2018-03-05 02:24:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងអប់រំយុវជន និងកីឡា បានប្រកាសឲ្យសិស្សានុសិស្សថ្នាក់ទី១២ទាំងអស់ ឲ្យទៅទទួលពាក្យសុំចុះឈ្មោះប្រឡងសញ្ញាបត្រ មធ្យមសិក្សាទុតិយភូមិ ចាប់ពីថ្ងៃទី០១ ដល់ថ្ងៃទី៣១ ខែមីនា។ ចំណែកឯការប្រឡងថ្នាក់ជាតិនឹងធ្វើឡើងនៅថ្ងៃទី២០ ខែសីហា ឆ្នាំ២០១៨។

ការចុះឈ្មោះនេះ គឺធ្វើឡើងនៅតាមគ្រឹះស្ថានមធ្យមសិក្សា ដោយនាយក នាយិកាគ្រឹះស្ថានមធ្យមសិក្សាសាធារណៈ និងឯកជនទូទាំងប្រទេស។ ចំពោះឯកសារសំខាន់ៗចាំបាច់ភ្ជាប់មកជាមួយ និងផ្ទៀងផ្ទាត់ឲ្យបានត្រឹមត្រូវមានដូចជា៖ សំបុត្រកំណើត ឬសំបុត្របញ្ជាក់កំណើត ឬសេចក្តីចម្លងសំបុត្រកំណើត ឬសេចក្តីចម្លងសំបុត្របញ្ជាក់កំណើត ដោយយកវិញ្ញាបនបត្របណ្តោះអាសន្នមធ្យមសិក្សាបឋមភូមិធ្វើជាគោល។ បន្ទាប់មកឯកសារទាំងនោះត្រូវបញ្ជូនទៅក្រសួងអប់រំ។

សិស្សសាលាមធ្យមសិក្សាចំណេះទូទៅសាធារណៈ និងឯកជន ដែលអាចដាក់ពាក្យសុំចុះឈ្មោះប្រឡងសញ្ញាបត្រមធ្យមសិក្សាទុតិយភូមិ ត្រូវបំពេញលក្ខខណ្ឌដូចខាងក្រោម៖

បានប្រឡងជាប់សញ្ញាបត្រមធ្យមសិក្សាបឋមភូមិ
បានរៀនគ្រប់កម្រិតថ្នាក់នៅមធ្យមសិក្សាទុតិយភូមិ
បានរៀនចប់កម្មវិធីសិក្សាថ្នាក់ទី១២
បានគោរពត្រឹមត្រូវតាមបទបញ្ជាផ្ទៃក្នុងសម្រាប់គ្រឹះស្ថានមធ្យមសិក្សា
ត្រូវបានវាយតម្លៃផ្នែកសីលធម៌ប្រចាំឆ្នាំ ចាប់ពីមធ្យមឡើងទៅ
មានមធ្យមភាគពិន្ទុប្រចាំឆ្នាំ ចាប់ពី ២៥,០០ ឡើងទៅ។

ចំពោះអតីតបេក្ខជនដែលបានប្រឡងធ្លាក់សញ្ញាបត្រមធ្យមសិក្សាទុតិយភូមិកាលពីឆ្នាំមុនៗ ក៏អាចដាក់ពាក្យសុំចុះឈ្មោះប្រឡងជាបេក្ខជនស្វរិននៅតាមមន្ទីរអប់រំ ដែលសាមីខ្លួនបានចុះឈ្មោះប្រឡងពីមុនផងដែរ ដោយភ្ជាប់វិញ្ញាបនបត្របញ្ចប់ការសិក្សាថ្នាក់ទី១២ (ចេញដោយមន្ទីរអប់រំ រាជធានី ខេត្ត) និងជ្រើសរើសយកថ្នាក់វិទ្យាសាស្រ្ត ឬថ្នាក់វិទ្យាសាស្រ្តសង្គម។

ដោយឡែកសម្រាប់សិស្សពូកែ ដែលបានរៀនចប់កម្មវិធីសិក្សាមធ្យមសិក្សាទុតិយភូមិ ព្រមទាំងបានប្រឡងជាប់សញ្ញាបត្រមធ្យមសិក្សាបឋមភូមិ អាចអនុញ្ញាតឲ្យប្រឡងសញ្ញាបត្រមធ្យមសិក្សាទុតិយភូមិ ដោយមិនគិតអាយុឡើយ៕

អត្ថបទ៖ វឌ្ឍនៈ