ការលក់ iPhone 5s តម្លៃ ៥០ ដុល្លាររំសាយចោលភ្លាមៗ ព្រោះមនុស្សបុកមកច្រើនពេក

2018-03-06 02:05:15
ចំនួនមតិ 0 | ចំនួនចែករំលែក 0

ចន្លោះមិនឃើញ

Switch ក្រុមហ៊ុនដែលទទួលបានសិទ្ធលក់ផលិតផល Apple ផ្លូវការរបស់ប្រទេសម៉ាឡេស៊ី គ្រោងនឹងធ្វើការលក់លាងឃ្លាំងនូវ iPhone និង iPad ស៊េរីចាស់ៗ។

ជាមួយនឹង iPhone 5s តម្លៃ ៥០ ដុល្លារ និង iPad ដែលមានតម្លៃចាប់ពី ៧៩ ដុល្លារ មានអតិថិជនទូទាំងប្រទេសបានចាប់អារម្មណ៍នឹងការលក់នេះ។ ជាក់ស្ដែងមានមនុស្សជាង ១១ ០០០ នាក់មកតម្រង់ជួរនៅពីមុខហាង មុននឹងកម្មវិធីលក់ចាប់ផ្ដើមទៅទៀត។

បុគ្គលិករបស់ Swtich ក៏បានចែកសំបុត្រដើម្បីមានសិទ្ធទិញ ទៅដល់អ្នកតម្រង់ជួរនៅខាងមុខ ប៉ុន្តែគ្រាន់តែទ្វារហាងចាប់ផ្ដើមបើកភ្លាមហ្វូងមនុស្សដូចជាត្រូវកម្រោលចូល ដោយបានរុញច្រានអ្នកនៅខាងមុខដើម្បីបានចូលក្នុងហាង។ ឃើញថាស្ថានភាពធ្ងន់ធ្ងរបែបនេះ ដែលអាចផ្ដល់គ្រោះថ្នាក់ដល់អតិថិជន និងហាងផ្ទាល់ ក្រុមហ៊ុន Switch ក៏បានបិទទ្វារហាងលក់របស់ខ្លួន និងរំសាយចោលការលក់លាងឃ្លាំង។

ក្រុមហ៊ុន Switch បានចេញសេចក្ដីប្រកាសថា ៖

“យើងពិតជាសូមទោសចំពោះកម្មវិធីលក់លាងឃ្លាំងម្សិលមិញ។ យើងមិនស្មានថាវារញ្ជួយដល់ថ្នាក់នេះ។ យើងពិតជាសប្បាយចិត្តដែលមានមនុស្សជាង ១១ ០០០ នាក់បង្ហាញខ្លួន។ យើងសូមអរគុណដោយស្មោះអស់ពីចិត្ត ដល់អតិថិជនដែលខំធ្វើដំណើរមកពីខេត្ត ក្រុងផ្សេង, ភ្ញាក់ពីព្រលឹម, អត់ងងុយ, ជម្នះនឹងការកកស្ទះចរាចរ និងព្យាយាមបំផុតដើម្បីបានតម្រង់ជួរក្នុងកម្មវិធីលក់។ នេះជាមេរៀនមួយសម្រាប់ពួកយើង ហើយពួកយើងនឹងធ្វើឲ្យបានកាន់តែប្រសើរនៅពេលក្រោយ។ អរគុណណាស់ចំពោះការគាំទ្រ”។

ទោះបីជាហាងលក់ខាងលើមិនរំសាយចោលកម្មវិធី ក៏អតិថិជនដែលមកចូលរួមមិនមានឪកាសបានទិញផលិតផលបញ្ចុះតម្លៃគ្រប់គ្នានោះទេ ព្រោះថាមាន iPhone 5s តម្លៃ ៥០ ដុល្លារ តែ ១០ គ្រឿងប៉ុណ្ណោះដែលដាក់លក់ ហើយ iPad Air 2 តម្លៃ ៧៩ ដុល្លារ មានតែមួយគ្រឿងប៉ុណ្ណោះ។ យ៉ាងណាក្ដី Switch ក៏បានផ្ដល់ជូនការបញ្ចុះតម្លៃបន្តិចបន្តួចលើ iPhone X និង iPhone 6 ទំហំ ៣២ GB ផងដែរ៕

ប្រភព៖ PhoneArena ប្រែសម្រួល៖ សុខហេង