សមាគមភាពយន្តលោក ឆាយ បូរ៉ា បន្តដំណើរទាំងខ្លួនឯងគ្មាន សូម្បីតែការិយាល័យធ្វើការ

2018-03-06 04:38:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ឈរលើគោលដៅរួមធ្វើយ៉ាងណាឲ្យវិស័យភាពយន្តក្នុងស្រុករីកស្គុះស្គាយ សមាគមភាពយន្តរបស់លោក ឆាយ បូរ៉ា ត្រៀមខ្លួនជាស្រេចនៅលើផ្លូវដ៏វែងឆ្ងាយនៃវិស័យសិល្បៈភាពយន្តក្នុងស្រុក បើទោះជាក់ស្ដែងសមាគមគ្មាន សូម្បីតែការិយាល័យសម្រាប់ធ្វើការក៏ដោយ។

“ស្ដាប់ទៅដូចខ្មាសគេដែរ ទស្សនិកជនស្ដាប់ម៉ោ សមាគមភាពយន្ត ដូចធំដុំដែរ ព្រោះគេគិតថាផលិតករភាពយន្តសុទ្ធតែអ្នកមានលុយ ប៉ុន្តែមានអី...បើផលិតករភាពយន្តខ្មែរ សុទ្ធតែអ្នកក្រហ្នឹង។ ជាក់ស្ដែង ការិយាល័យសម្រាប់ធ្វើការក៏យើងអត់មានដែរសព្វថ្ងៃនេះ"។ លោក ឆាយ បូរ៉ា ថ្លែង។

សមាគមភាពយន្តកម្ពុជា ធ្វើការជាតំណាងផលិតករ លើកពីបញ្ហាប្រឈមនានារបស់ផលិតករ ឬភាពយន្ត រួមទាំងដោះស្រាយដើម្បីធានាដល់ភាពប្រសើរឡើងនៃវិស័យភាពយន្តក្នុងស្រុក។ មកដល់បច្ចុប្បន្នសមាគមមានសមាជិកប្រមាណជាង ២០ផលិតកម្ម។ សមាជិកនីមួយៗមានកាតព្វកិច្ចបង់វិភាគទាន១៥០ដុល្លារក្នុង១ឆ្នាំចូលសមាគម។

ផលិតកររឿង "៣.៥" បញ្ជាក់ថា ចំណូលប្រមាណជាង ៣ពាន់ដុល្លារក្នុង១ឆ្នាំពីវិភាគទានរបស់ផលិតកម្មជាសមាជិក មិនអាចឲ្យសមាគមអាចធ្វើអ្វីបានច្រើន ឬពង្រីកខ្លួនឲ្យធំជាងនេះទេ។ នោះជាមូលហេតុដែលប៉ុន្មានឆ្នាំកន្លងមកនេះ សមាគមបានយកហាងកាហ្វេ ជាកន្លែងធ្វើការ។ "ពេលមានការប្រជុំអី យើងដាក់ផ្គុំតុអីចឹងទៅ ហើយខ្ញុំខ្លួនឯង ថ្លៃសាំងក៏មិនយក ប្រាក់ខែក៏មិនយកដែរ"។

នឿយណាយ នឹងការប្រឈមនានា លោក ឆាយ បូរ៉ា ប្រាប់ថា លោកបានសម្រេចលាលែងមិនឈរឈ្មោះទៀតទេ ប៉ុន្តែយោងលើស្នាដៃ ក៏ដូចជាសមិទ្ធផលកន្លងមក លោកក៏ត្រូវសមាជិកបោះឲ្យធ្វើជាប្រធានអាណត្តិទី៣បន្តទៀត ក្នុងការបោះឆ្នោតចុងក្រោយកាលពីចុងខែកុម្ភៈនៅក្នុងហាងកាហ្វេមួយ។

បើទោះជាចង់ ឬមិនចង់ ប៉ុន្តែទទួលបានការជឿទុកចិត្តរបស់សមាជិក លោក ឆាយ បូរ៉ា អះអាងថា លោកនឹងបន្តការងាររបស់លោកបន្តទៀតក្នុងនាមជាតំណាងផលិតករ ដែលពួកគេកំពុងមានឆន្ទៈខ្ពស់ក្នុងការធ្វើឲ្យប្រសើរឡើងសិល្បៈភាពយន្តក្នុងស្រុក។ ជាក់ស្ដែង លោកត្រៀមដាក់ចេញនូវផែនការមួយចំនួនដូចខាងក្រោម៖

១.ស្នើទៅរដ្ឋាភិបាលលើកលែងពន្ធរយៈពេល១០ឆ្នាំបន្តទៀត ខណៈការលើកលែងមុននឹងត្រូវផុតនៅខែឧសភាខាងមុខ ដើម្បីទុកឱកាសឲ្យផលិតករ ក៏ដូចជាឧស្សាហកម្មភាពយន្តដែលកំពុងងើបឡើងនេះ មានភាពមាំទាំសិន។

២.គ្រោងនឹងរៀបចំឲ្យមានវគ្គបណ្ដុះបណ្ដាលអ្នកនិពន្ធ និងដឹកនាំរឿង៖ លោក ឆាយ បូរ៉ា ប្រាប់ថា ដើម្បីធានាថាឧស្សាហកម្មភាពយន្តក្នុងស្រុកមាំទាំ ធនធានល្អៗពិតជាត្រូវការចាំបាច់។ ដូច្នេះលោក គ្រោងរៀបចំឲ្យមានវគ្គបណ្ដុះបណ្ដាលនានា។ កិច្ចការនេះ ទី១លោកគ្រោងចាប់ផ្ដើមបណ្ដុះបណ្ដាលនៅខាងក្នុងចង្កោមផលិតករសិន នូវចំណុចណាដែលអាចបំពេញដោយខ្លួនឯង។ ទី២ ស្វែងរកសហការជាមួយផ្នែកឯកជន។

៣.ចង់ជំរុញឲ្យមានផលិតផលភាពយន្តក្នុងស្រុកមានច្រើនរសជាតិ ក្រៅតែពីប្រភេទរឿងខ្មោច។ "ចំណុចនេះ យើងគ្រាន់តែលើកឧទាហរណ៍ពីប្រទេសជិតខាង ប៉ុន្តែអ្វីៗស្ថិតនៅលើការជ្រើសរើសរបស់ផលិតករដដែល"។

៤.ព្យាយាមរកដំណោះស្រាយក្នុងរឿងចម្រូងចម្រាស់នៅក្នុងការផលិតកុន រវាងអ្នកធ្វើកុន ផលិតករ និងតារាសម្ដែង)។ បញ្ហាកន្លងមក គឺតារាសម្ដែងរអ៊ូថា សម្ដែងចប់ហើយផលិតករមិនអោយលុយ ឬផលិតករថា ថតចប់ហើយ មិនទទួលបានថវិកាពីម្ចាស់វិនិយោគ ឯអ្នកវិនិយោគរអ៊ូថា អោយថវិកាទៅអស់ហើយ ផលិតករមិនឃើញថតជាដើម។

៥.នឹងព្យាយាមរកទុនពីខាងក្រៅ(អ្នកមានលុយនៅក្រៅវិស័យភាពយន្ត) មកវិនិយោគបន្ថែមលើវិស័យភាពយន្ត។ ចំណុចនេះលោកលើកឡើងថា ជាចំណុចសំខាន់ ព្រោះលុយជាដង្ហើមរស់នៃផលិតកម្មភាពយន្ត។

ងាកទៅមើលកិច្ចការក្នុងអាណត្តិចាស់របស់សមាគមវិញ៖ សមាគមភាពយន្ត បានជោគជ័យចំពោះសំណើទៅប្រមុខរាជរដ្ឋាភិបាល ដោយស្នើទុកម៉ោងមាស (Prime Time) សម្រាប់ភាពយន្តក្នុងស្រុក។ លោក ឆាយ បូរ៉ា អះអាងថា ជោគជ័យនេះ បានបណ្ដុះឆន្ទៈផលិតករកាន់តែខ្លាំងនៅក្នុងការផលិតស្នាដៃរបស់ខ្លួន។

កិច្ចការបន្តទៀត សមាគមក៏បានជួបពិភាក្សា និងលើកទឹកចិត្តឲ្យសមាគមអ្នកនិពន្ធ ងាកពីការសរសេរប្រលោមលោក មកសរសេរភាពយន្តខ្លះ ដើម្បីបង្កើនបរិមាណផលិតផលភាពយន្ត និងច្រើនពណ៌សម្បុរ ជាដើម។

នៅក្នុងការបោះឆ្នោតកាលពីខែមុននេះ ដែលរកឃើញថា លោក ឆាយ បូរ៉ា ជាប្រធានសមាគមភាពយន្តកម្ពុជាអាណត្តិទី៣នេះ លោក អ៊ិន សុភិន ចាងហ្វាងផលិតកម្មមហាហង្ស ក៏បានជាប់ជាអនុប្រធាន និងលោកសែម វិសាល ម្ចាស់ផលិតកម្ម Wonderfilm Cambodia ជាប់ជាអគ្គលេខាធិការដែរ។ ដោយឡែកសមាសភាព២រូបទៀតគឺ លោក Millan Lov និងលោកព្រហ្ម សិលា ត្រូវបានបោះឆ្នោតតែងតាំងជាសមាជិកសកម្មរបស់សមាគម៕

អត្ថបទ៖ ទារិកា