តាំងពីលេងនៅអង់គ្លេសមក Matic ធ្វើការបំប៉ោងសំណាញ់ទីពីចម្ងាយប៉ុន្មានជើងហើយ?
- 2018-03-06 12:57:39
- ចំនួនមតិ 0 | ចំនួនចែករំលែក 0
តាំងពីលេងនៅអង់គ្លេសមក Matic ធ្វើការបំប៉ោងសំណាញ់ទីពីចម្ងាយប៉ុន្មានជើងហើយ?
ចន្លោះមិនឃើញ
កាលពីយប់មិញ ខ្សែបម្រើ Nemanja Matic បានធ្វើបានសម្រេចគ្រាប់ Premier Leagueទី ១របស់ខ្លួនឲ្យក្លឹប Manchester United ជួយឲ្យក្លឹបយកឈ្នះ Crystal Palace។ ទោះជាយ៉ាងណា នេះមិនមែនជាគ្រាប់ស៊ុតពីក្រៅប្រអប់លើកទី ១ ឡើយ ដែលកីឡាករសញ្ជាតិស៊ែប ធ្លាប់ធ្វើបានសម្រេច តាំងពីត្រលប់មកលេងនៅអង់គ្លេសវិញ នៅឆ្នាំ២០១៤។
គិតតាំងពីពេលនោះមក ខ្សែបម្រើ Matic ស៊ុតចូលពីចម្ងាយចំនួន ៤ គ្រាប់ហើយ។ កាលនៅលេងឲ្យ Chelsea (២០១៤-២០១៧) កីឡាករស៊ែប បំប៉ោងសំណាញ់បានសរុបចំនួន ៧ លើក ក្នុងនោះ មាន ៣ គ្រាប់ ដែលជាគ្រាប់ដែលស៊ុតនៅក្រៅប្រអប់គ្រោះថ្នាក់។
តាំងពីមកលេងនៅអង់គ្លេស គ្រាប់ស៊ុតក្រៅប្រអប់ទី ១របស់ Matic គឺជាគ្រាប់បាល់ Premier League ទី ១របស់ខ្លួនឲ្យក្លឹប Chelsea ពេលប៉ះជាមួយ Everton ក្នុងការប្រកួតលីគកំពូលអង់គ្លេសរដូវកាល ២០១៤/១៥។
មួយរដូវកាលក្រោយមក ពោលគឺ រដូវកាល ២០១៥/១៦ ក្នុងការប្រកួតជាមួយក្លឹប Everton ដដែលនោះ ខ្សែបម្រើ Matic ធ្វើបានសម្រេចគ្រាប់បាល់ស៊ុតពីក្រៅប្រអប់ម្ដងទៀត។
មួយរដូវកាលបន្តមកទៀត ក្នុងកម្មវិធី FA Cup វគ្គពាក់កណ្ដាលផ្ដាច់ព្រ័ត្រ (រដូវកាល ២០១៦/១៧) កីឡាករស៊ែបបានស៊ុតចូលពីចម្ងាយនៅនាទី ៨០ ដែលគ្រាប់នេះ ជួយក្លឹបតោខៀវឲ្យឈ្នះ Tottenham Hotspur ក្នុងលទ្ធផល ៤ ទល់នឹង ២។
ដោយឡែក ចំណែកគ្រាប់ស៊ុតពីក្រៅប្រអប់ទី ៤ របស់ Matic គឺធ្វើបានសម្រេចកាលពីប្រកួតយប់មិញនេះឯង នៅនាទីបន្ថែម ជួយឲ្យក្លឹបបិសាចក្រហមសម្រេចការវាយបកឈ្នះ Crystal Palace។
សូមបញ្ជាក់ផងដែរថា Matic បានចេញពីក្លឹប Kosice មកចូលរួមជាមួយតោខៀវ នៅអង់គ្លេស កាលពីឆ្នាំ ២០០៩។ កីឡាករស៊ែបបានចាកចេញពីក្លឹបឡុងដុងទៅចូលរួមជាមួយក្លឹបហុល្លង់ Vitesse នៅក្នុងនាមជាកីឡាករខ្ចីជើងឆ្នាំ ២០១០។ នៅឆ្នាំ ២០១១ ក្លឹប Chelsea បានលក់ Matic ទៅក្លឹប Benfica។ លេងនៅទីនោះបាន ៣ឆ្នាំ កីឡាករស៊ែបបានត្រលប់មកតោខៀវវិញនៅឆ្នាំ ២០១៤ មុនចាកចេញពីក្លឹបមកចូលរួមជាមួយបិសាចក្រហម កាលពីខែកក្កដា ឆ្នាំ ២០១៧៕