យុវជនលេចធ្លោ ម៉ាត់ ណូរ៉ុន ទម្លាយចំណុចខ្សោយរបស់ខ្លួន
- 2018-03-07 08:41:30
- ចំនួនមតិ 0 | ចំនួនចែករំលែក 0
យុវជនលេចធ្លោ ម៉ាត់ ណូរ៉ុន ទម្លាយចំណុចខ្សោយរបស់ខ្លួន
ចន្លោះមិនឃើញ
ខ្សែប្រយុទ្ធវ័យក្មេងរបស់អគ្គិសនីកម្ពុជា ម៉ាត់ ណូរ៉ុន ដែលគេរំពឹងថានឹងលេចធ្លោម្នាក់ក្នុងលីគបាល់ទាត់កំពូលកម្ពុជារដូវកាល២០១៨នេះបានបង្ហាញពីខ្សោយរបស់ខ្លួន និងរំពឹងជួយក្រុមបានច្រើនសម្រាប់ការប្រកួតបន្ទាប់។
ម៉ាត់ ណូរ៉ុន បានក្លាយជាកីឡាករជួរមុខដ៏សំខាន់ម្នាក់សម្រាប់ក្លឹបអគ្គិសនីកម្ពុជាក្នុងយុទ្ធនាការណ៍ការប្រកួតជើងឯកជាតិរដូវកាល២០១៨។ ការប្រកួតសប្តាហ៍ទី១រូបគេជាខ្សែប្រយុទ្ធទោលដែលបានប៉ះទង្គិចនឹងខ្សែការពាររបស់វិសាខាជាញឹកញាប់រហូតដល់អាជ្ញាកណ្តាលពិន័យកាតក្រហមបណ្តេញកីឡាករវិសាខា២នាក់ ប៉ុន្តែអគ្គិសនីបានចាញ់៤-០។
ពាក់ព័ន្ធនឹងការប្រកួតសប្តាហ៍ទី១នេះ កីឡាករដែលត្រូវគេហៅថា Messi បានឲ្យដឹងថា តាមពិតរូបគេពិបាកណាស់នៅតំបន់ជួរមុខម្នាក់ឯង និងគ្មានកីឡាករបរទេសជួយ។ ជាងនេះទៅទៀត រូបគេនៅមានចំណុចខ្វះខាតច្រើន។ ណូរ៉ុនប្រាប់ថា ៖«សម្រាប់ប្រកួតទី១ ខ្ញុំនៅខ្វះខាតច្រើន ទី១កម្លាំង ទី២ល្បឿន និងទី៣បច្ចេកទេសគ្រប់គ្រងបាល់ អូសបាល់នៅមានកម្រិត។ ម្យ៉ាងមាឌខ្ញុំរាងតូចល្អិតថែមទៀត»។ ទាំងនេះទាមទារឲ្យរូបគេខិតខំហ្វឹកហាត់ដើម្បីឲ្យអភិវឌ្ឍខ្លួនឲ្យកាន់តែល្អប្រសើរ។
ម៉ាត់ ណូរ៉ុនបន្ថែមថា ប្រកួតសប្តាហ៍ទី១កន្លងទៅ ក្រុមអគ្គិសនីកម្ពុជាមិនទាន់យល់ចិត្តគ្នាល្អឡើយ។ កីឡាករថ្មីពីរបីនាក់ទើបចូល អីចឹងអត់ទាន់យល់ចិត្តគ្នាទេ។ នៅមានចំណុចខ្វះខាតច្រើនដែលត្រូវតែធ្វើឲ្យល្អប្រសើរសម្រាប់ប្រកួតបន្ទាប់។
ពាក់ព័ន្ធនឹងឈ្មោះដែលអ្នកដទៃស្រែកហៅថា Messiៗ ត្រូវបានកីឡាកររូបនេះប្រាប់ថា ៖«តាមពិតកាលពីក្មេងខ្ញុំធ្លាប់លេងបាល់ជិតៗផ្ទះ ខ្ញុំពូកែលេងជើងឆ្វេង ហើយមាឌខ្ញុំល្អិត។ គេហៅលេងហ្នឹងដំបូង តែក៏ជាប់ឈ្មោះ Messi រហូតដល់ឥឡូវ»។
ម៉ាត់ ណូរ៉ុន អតីតយុវជនរបស់ក្លឹបភ្នំពេញក្រោនត្រូវបានលោក ទេព ឡុងរចនា អតីតគ្រូបង្វឹកក្រសួងការពារជាតិយល់ឃើញថា ជាយុវជនដែលមានទេពកោសល្យ ហើយរូបគេអាចល្បីល្បាញស្នងតំណែងកីឡាករ ចាន់ វឌ្ឍនាកាបាន។ ចំណែកគ្រូបង្វឹកអគ្គិសនីកម្ពុជា លោក ប្រាក់ វុទ្ធី រំពឹងលើរូបគេតែម្នាក់គត់ដែលអាចរកគ្រាប់បាល់ឲ្យក្រុម។ ទាំងលោក ប្រាក់ វុទ្ធី និងលោក ហុក សុជីវន្ត គ្រូបង្វឹកវិសាខាយល់ថា រូបគេនឹងក្លាយជាកីឡាករលេចធ្លោម្នាក់ ប្រសិនបើព្យាយាមហ្វឹកហាត់ដល់កម្រិត៕