Draxler ខឹងគ្រូ PSG រឿងមួយ ក្នុងពេលប្រកួតប៉ះ Real យប់មិញ

2018-03-07 13:17:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើ Julian Draxler ក្នុងថ្ងៃនេះ សារភាពថា បានខឹងនឹងអ្នកចាត់ការ PSG លោក Unai Emery ដែលបានពន្យារពេលក្នុងការដាក់ខ្លួនឲ្យចូលលេងក្នុងការប្រកួត UCL ប៉ះ Real Madrid យប់មិញ។

ក្នុងអំឡុងពេលដែល Real Madrid កំពុងនាំមុខ ១-០ កីឡាករអាល្លឺម៉ង់ Draxler ត្រូវបានលោក Emery ត្រៀមដាក់ឲ្យដូរចូលលេងក្នុងការប្រកួត។ ទោះជាយ៉ាងណា អ្នកចាត់ការសញ្ជាតិអេស្ប៉ាញរូបនេះ បានដូរចិត្តវិញ ក្រោយខ្សែប្រយុទ្ធ Edinson Cavani តាមស្មើ នៅនាទី ៧១ វិញ។ រហូតទាល់តែនាទី ៧៦ ទើបលោកសម្រេចដាក់ Draxler ឲ្យចូលលេងក្នុងការប្រកួត។ ទោះជាយ៉ាងណា Casemiro បានជួយឲ្យជួយ Real Madrid នាំមុខជាថ្មី នៅនាទី ៨០ ហើយលទ្ធផលនេះ បន្តរហូតដល់ចប់ការប្រកួត។

ការសម្រេចចិត្តរបស់ Emery ក្នុងការពន្យារពេលដូរ Draxler ឲ្យចូលលេងក្នុងការប្រកួត ធ្វើឲ្យកីឡាករអាល្លឺម៉ង់មិនសប្បាយចិត្ត។ ថ្លែងប្រាប់សារព័ត៌មាន ZDF កីឡាករវ័យ ២៤ឆ្នាំ បានហៅការសម្រេចចិត្តនេះ ថា ជាការសម្រេចចិត្តដ៏ស្ពឹក។ Draxler បាននិយាយថា៖ "ខ្ញុំភ្ញាក់ផ្អើល និងខឹងណាស់។ ខ្ញុំមិនដឹងថាហេតុអ្វីបាន Emery ធ្វើបែបហ្នឹងទេ"។

Draxler បានបញ្ជាក់ទៀតថា៖ "យើងស៊ុតចូល ១វិញមែន ប៉ុន្តែការស៊ុតចូលហ្នឹងមិនបានធ្វើឲ្យបរិយាកាសការប្រកួតប្រែប្រួលឡើយ។ ខ្ញុំយល់ថា ស្ថានភាពបែបហ្នឹង យើងត្រូវតែលេងប្រយុទ្ធបន្ថែម។ Real Madrid លេងយ៉ាងមានទំនុកចិត្ត ខណៈយើងវិញ បែរជាលេងទៅមុខទៅក្រោយទៅវិញ"។