ផ្ទះតម្លៃទាប និងខុនដូរ ប៉ុន្មានកំពុងសាងសង់ និងដាក់លក់?

2018-03-08 03:15:02
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតរហូតមកដល់ពេលនេះ មានគំរូផ្ទះតម្លៃទាប និងមធ្យមចំនួនបីគម្រោងត្រូវបាននឹងកំពុងដំណើរការសាងសង់ និងខ្លះទៀតកំពុងដាក់លក់។ នេះបើតាម លោក សេង ឡូត អ្នកនាំពាក្យក្រសួងដែនដីនគររូបនីយកម្ម និងសំណង់។ ផ្ទះតំលៃទាប ជាផ្ទះដែលតម្រូវលើពលរដ្ឋ មានចំណូលទាប និងមធ្យម ក្រោម ៥០០ដុល្លារ ជាមន្រ្តីរាជការ អ្នករៀបការហើយ និងទិញហើយមិនអាចយកទៅជួល និងលក់បន្ត លុះត្រាតែ ៥ឆ្នាំក្រោយ ទើបអាចជួល និងលក់បាន។

លោកបានបន្ថែមថា គម្រោងទាំងបីនោះរួមមាន៖

គម្រោងទី១ របស់លោកឧកញ៉ា សៀ ប្ញទ្ធី អគ្គនាយកក្រុមហ៊ុន វើលប្រ៊ីដ ឡែនដ៍ ដែលបានបើកការដ្ឋានសាងសង់កាលពីថ្ងៃទី៧ ខែមករា ឆ្នាំ២០១៧ និងបានប្រកាសដាក់លក់កាលពីពេលថ្មីៗនេះ។ គម្រោងនេះសាងសង់ក្នុងទំហំទឹកប្រាក់ប្រមាណ ៦០លានដុល្លារអាមេរិក នៅលើផ្ទៃដី ២៤ហិកតា មានចំនួន ២ ២៩៧ផ្ទះ ស្ថិតនៅតាមបណ្ដោយផ្លូវជាតិលេខ២១ ក្នុងឃុំរកាខ្ពស់ ស្រុកស្អាង ខេត្តកណ្ដាលប្រមាណ៨គីឡូម៉ែត្រ ពីទីក្រុងតាខ្មៅ។ គម្រោងនេះនឹងបញ្ចប់ជាស្ថាពរនៅចុងឆ្នាំ ២០១៨។

គម្រោងទី២ គម្រោងលំនៅឋានតម្លៃសមរម្យរបស់ក្រុមហ៊ុន B-BM development ដែលជាក្រុមហ៊ុនសម្ព័ន្ធរវាងក្រុមហ៊ុន ប៊ុន ជេស្ឋ គ្រុប (Bun Ches Group) និង ក្រុមហ៊ុន BPC trading ត្រូវបានអភិវឌ្ឍន៍លើផ្ទៃដី ៨២ហិកតា ស្ថិតនៅភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្ដាល មានចម្ងាយ ២១គីឡូម៉ែត្រពីវត្តភ្នំ រាជធានីភ្នំពេញ តាមបណ្ដោយផ្លូវជាតិលេខ៥ (មានចម្ងាយ ៤០០ម៉ែត្រពីផ្លូវជាតិ) ។

តាមគម្រោង ក្រុមហ៊ុននឹងសាងសង់ផ្ទះចំនួន ៥៣៤០ល្វែង ដោយក្នុងនោះប្រភេទផ្ទះទំហំ ៤,១ម៉ែត្រគុណ ១៣ម៉ែត្រមានចំនួន ៨៦៤ល្វែង (ជាប្រភេទផ្ទះ១សន្លឹកកន្លះ) និងផ្ទះទំហំ ៥,១ម៉ែត្រគុណ៧,២ម៉ែត្រមាន ៤៤៧៦ខ្នង (ជាប្រភេទផ្ទះពីរជាន់)។ គម្រោងនេះនឹងបើកលក់នៅពាក់កណ្ដាល ខែមីនា ឆ្នាំ២០១៨ ។

គម្រោងទី៣ គឺខុនដូតម្លៃទាប របស់ក្រុមហ៊ុនអារ៉ាកាវ៉ា(Arakawa ) ដែលគម្រោងនេះផ្ដល់អាទិភាពខ្ពស់សម្រាប់មន្ត្រីរាជការ គ្រូបង្រៀន និងសិស្ស-និស្សិត មានទីតាំងស្ថិតក្នុងភូមិទឹកថ្លា សង្កាត់ទឹកថ្លា ខណ្ឌសែនសុខរាជធានីភ្នំពេញ។ គម្រោងនេះបានបើកការដ្ឋានសាងសង់អំឡុងខែធ្នូ ចុងឆ្នាំ២០១៧ កន្លងមកនេះ ដោយមានកម្ពស់ចន្លោះពី១៩ជាន់ទៅ២០ជាន់ អភិវឌ្ឍនៅលើផ្ទៃដីទំហំ ១៣ ៦៨០ម៉ែត្រក្រឡា។ ក្រុមហ៊ុនបានបង្ហាញពីឆន្ទៈក្នុងការសាងសង់ប្រកបដោយគុណភាព និងទំនុកចិត្តចំពោះអាគារស្នាក់នៅទាំង១០ ដែលមានចំនួន២ ០០០ យូនីតនេះ សម្រាប់ដំណាក់កាលទី១ ក្នុងទំហំទឹកប្រាក់ ៤០លានដុល្លារអាមេរិក និងដំណាក់កាលទី២ ៣០លានដុល្លារអាមេរិក ដោយចំណាយរយៈពេលសាងសង់រយៈពេល៤២ខែ។

លោក សេង ឡូត អ្នកនាំពាក្យក្រសួងដែនដីនគររូបនីយកម្ម និងសំណង់ បានឱ្យដឹងទៀតថា មកដល់ឆ្នាំ២០១៨ នៅមិនទាន់មានការវិនិយោគលើផ្ទះ ឬខុនដូរបន្ថែមទៀត នៅឡើយទេ។

កាលពីពេលថ្មីៗឯកឧត្ដម ជា សុផារ៉ា រដ្ឋមន្ត្រីក្រសួងដែនដីនគររូបនីយកម្ម និងសំណង់បានជំរុញឱ្យមានការវិនិយោគបន្ថែមលើគម្រោងលំនៅឋានតម្លៃទាប ដើម្បីជួយដល់ពលរដ្ឋមានប្រាក់ចំណូលទាប និងមធ្យម ពិសេសអ្នកធ្វើការក្នុងវិស័យវាយនភណ្ឌកាត់ដេរ និងស្បែកជើង។

រាល់ការទទួលទិញលក់និងកក់ផ្ទះ និងខុនដូរតម្លៃទាប ក្រុមហ៊ុន និងក្រសួងរៀបចំដែនដី នគរូបនីយកម្ម និងសំណង់ ជាអ្នកពិនិត្យដោយផ្ទាល់។ តម្លៃផ្ទះចាប់ពី ២ម៉ឺន ៥ពាន់ដុល្លារ ទៅ ៣ម៉ឺនដុល្លារ អាស្រ័យទៅតាមប្រភេទផ្ទះ និងទំហំ៕

ចុចអាន៖

អត្ថបទ៖ សុផល