ម្ចាស់ក្លឹបបានចាកចេញពីបឹងកេតមែន
- 2018-03-09 03:17:35
- ចំនួនមតិ 0 | ចំនួនចែករំលែក 0
ម្ចាស់ក្លឹបបានចាកចេញពីបឹងកេតមែន
ចន្លោះមិនឃើញ
ស្ថាបនិករបស់ក្លឹបបឹងកេតដែលជាអ្នកបង្កើតក្លឹបតាំងពីដំបូងរហូតដល់បច្ចុប្បន្នបានចាកចេញពីក្លឹបហើយ។ នេះបើតាមការឲ្យដឹងពីលោក បែ មករា អ្នកចាត់ការទូទៅរបស់ក្លឹប។
កាលពីប៉ុន្មានថ្ងៃមុន លោក បែ មករា បានប្រាប់ថា Sabay ថា ម្ចាស់ក្លឹបបានដកខ្លួនចេញពីបឹងកេតហើយ ប៉ុន្តែលោកមិនបានបញ្ជាក់លំអិតនោះទេ។ យ៉ាងណាកាលពីល្ងាចថ្ងៃព្រហស្បតិ៍ទី៨ មីនាតាមរយៈបទសម្ភាសន៍នៅទូរទស្សន៍ BTV លោកបានប្រាប់ជាសាធារណៈថា ម្ចាស់ក្លឹបពិតជាបានចាកចេញពីក្លឹបមែន ប៉ុន្តែនៅតែមានទំនាក់ទំនងមនោសញ្ចេតនា។
ពាក់ព័ន្ធនឹងការចាកចេញរបស់លោក ស៊ីវ ស៊ីថា ដែលត្រូវបានគេស្គាល់ឈ្មោះ នាគខៀវជាម្ចាស់កម្ការកៅស៊ូបឹងកេតនេះបានធ្វើឲ្យក្រុមម្ចាស់ជើងឯកលីគកំពូលកម្ពុជា៣សម័យកំពុងស្ថិតនៅក្នុងស្ថានភាពលំបាក។ លោក បែ មករា ឲ្យដឹងថា ការចំណាយរបស់ក្លឹបកន្លងមកគឺបានមកពីធនធានរបស់ម្ចាស់ក្លឹបផ្ទាល់ ប៉ុន្តែនៅពេលលោកបានចាកចេញទៅធ្វើឲ្យក្លឹបជួបការលំបាក និងត្រូវស្វះស្វែងរកចំណូលដើម្បីទ្រទ្រង់ក្លឹប។ ពេលនេះ អ្នកចាត់ការបឹងកេតដើរតួជាឪពុកម្ដាយរបស់ក្លឹបដើម្បីរកចំណូលទ្រទ្រង់។ នេះជាទឹកចិត្តស្រលាញ់បាល់ទាត់ដែលលោកចង់ឲ្យមានឈ្មោះរហូត។
រដូវកាល២០១៨នេះ ក្លឹបបឹងកេតទទួលបានការឧបត្ថម្ភស្រាបៀរកម្ពុជាដែលមានទឹកប្រាក់១០ម៉ឺនដុល្លារអាមេរិក។ យ៉ាងណា ចំនួនទឹកប្រាក់១០ម៉ឺនដុល្លារអាមេរិកនឹងមិនគ្រប់គ្រាន់សម្រាប់ទ្រទ្រង់មួយរដូវកាលពេញឡើយ។ ក្លឹបត្រូវការលុយបន្ថែមទៀតដើម្បីទ្រទ្រង់ក្លឹបទៅថ្ងៃខាងមុខ។
ពេលនេះក្លឹបត្រូវការអ្នកទ្រព្យធន ឧកញ៉ា សេដ្ឋី ក្រុមហ៊ុននានាដើម្បីជួយឧបត្ថម្ភគាំទ្រសម្រាប់ដំណើរការក្លឹបឲ្យដំណើរការយូរអង្វែងទៀត។ បឹងកេតត្រូវបានបង្កើតឡើងកាលពីឆ្នាំ២០១១ និងឡើងលេងលីគកំពូលកម្ពុជាឆ្នាំ២០១២ដែលឈ្នះជើងឯកលីគឆ្នាំនោះតែម្តង។ បន្ទាប់មកក្លឹបមួយនេះតែងតែទទួលបានចំណាត់ថ្នាក់ល្អរហូត ហើយពីរឆ្នាំចុងក្រោយគឺ២០១៦ និង២០១៧ជាជើងឯកលីគកម្ពុជា។ អ្វីដែលគួរឲ្យចាប់អារម្មណ៍ទៀតនោះ ក្លឹបតំណាងឲ្យក្រុមកម្ពុជាលេងលើឆាកអន្តរជាតិ AFC Cup និង Mekong Toyota Club Championship៕