PSG ធ្លាក់ពី Champions League ដោយសារអត់សំណាង
- 2018-03-09 13:08:36
- ចំនួនមតិ 0 | ចំនួនចែករំលែក 0
PSG ធ្លាក់ពី Champions League ដោយសារអត់សំណាង
ចន្លោះមិនឃើញ
វីរបុរសក្លឹបបិសាចក្រហម Roy Keane កាលពីពេលថ្មីៗនេះ បានបដិសេធក្នុងការទិតៀនក្លឹប PSG។ អតីតខ្សែបម្រើរូបនេះបាននិយាយថា ការចាកចេញរបស់ក្លឹប PSG ពីកម្មវិធី Champions League គឺដោយសារតែមិនមានសំណាង។
Keane បាននិយាយប្រាប់ ITV ថា៖ "ខ្ញុំគិតថា PSG ហាក់មិនមានសំណាងសោះ ប៉ុន្មានរដូវកាលចុងក្រោយនេះ។ ក្លឹបលេងរហូតដល់លេខ ១ក្នុងពូលរបស់ខ្លួន ប៉ុន្តែបែរត្រូវបានចាប់ឆ្នោត ទៅប៉ះជាមួយ Real Madrid នៅវគ្គ ១៦ក្រុមចុងក្រោយទៅវិញ"។
វីរបុរសក្លឹបបិសាចក្រហមរូបបន្ត៖ "ទាក់ទិនរឿងប្រកួតវិញ ពួកគេមិនសូវមានសំណាងក្នុងការប្រកួតជើងទី ១ ខណៈជើងទីពីរ ពួកគេអត់មាន Neymar ហើយកីឡាករម្នាក់លេងបានកាតក្រហមទៅទៀតក្នុងប្រកួតហ្នឹង។ ដូច្នេះ PSG ត្រូវការសំណាងខ្លះ ក្នុងកម្មវិធី Champions League។ អ៊ីចឹងហើយ ខ្ញុំមិនធ្វើការទិតៀនក្លឹបទេ"។
សូមបញ្ជាក់ផងដែរ ក្នុងជំនួបជើង ១ នៅពេលលទ្ធផលនៅ ១ទល់នឹង ១ ក្លឹប Real Madrid និង PSG ត្រូវបានគេមើលឃើញថា បានប្រកួតយ៉ាងស្វិតស្វាញ ដោយមានការសម្រុកគ្នាទៅវិញទៅមកជាច្រើនលើកច្រើនសា។ ទោះជាយ៉ាងណា ពីរគ្រាប់ពីសំណាក់ Cristiano Ronaldo និង Marcelo នៅអំឡុងនាទី ៨០ ជួយឲ្យក្លឹបយក្សអេស្ប៉ាញយកឈ្នះ ៣ ទល់នឹង ១។
បែរមកជំនួបជើងទី ២ ខ្សែប្រយុទ្ធ Neymar បានអវត្តមានដោយសាររបួស ខណៈខ្សែបម្រើ Marco Verratti លេងបានកាតក្រហមនៅនាទី ៦៦។ ការប្រកួតបញ្ចប់ ដោយ Real Madrid ឈ្នះ PSG ២ ទល់នឹង ១ ធ្វើឲ្យក្លឹបបារាំងធ្លាក់ពី Champions League ត្រឹមវគ្គ ១៦ក្រុម។
រយៈពេល ២ឆ្នាំជាប់គ្នា ដែលក្លឹប PSG បានធ្លាក់ត្រឹមវគ្គ ១៦ ក្រុមក្នុងកម្មវិធី UCL។ កាលពីឆ្នាំមុន បើទោះជាឈ្នះ ៤-០ ក្នុងជើងទី ១ ក្លឹបត្រូវបានទម្លាក់ដោយក្លឹប Barcelona នៅជើងទី ២ បន្ទាប់ពីក្លឹបអ្នកមានបុណ្យ បានវាយបកបានសម្រេចឈ្នះក្នុងលទ្ធផល ៦ ទល់នឹង ១ នៅទឹកដី Camp Nou។ ឯឆ្នាំនេះ ក្លឹបត្រូវបានទម្លាក់ដោយ Real Madrid៕