អ្នកភ្នំពេញបើមិនចង់អស់លុយថ្លៃសាំង ធ្វើដំណើរតាមវិធី៣យ៉ាងនេះល្អផុតលេខ
- 2018-03-11 02:38:11
- ចំនួនមតិ 0 | ចំនួនចែករំលែក 0
អ្នកភ្នំពេញបើមិនចង់អស់លុយថ្លៃសាំង ធ្វើដំណើរតាមវិធី៣យ៉ាងនេះល្អផុតលេខ
ចន្លោះមិនឃើញ
កំណើនប្រជាពលរដ្ឋរស់នៅរាជធានីភ្នំពេញកាន់តែកើនឡើងពីមួយថ្ងៃ ទៅមួយថ្ងៃ។ ដូច្នេះហើយទើបរដ្ឋាភិបាលបានបង្កើតឲ្យមានសេវាសាធារណក្នុងការដឹកជញ្ជូន ដើម្បីកាត់បន្ថយបញ្ហាកកស្ទះ ក៏ដូចជាការចំណាយរបស់ប្រជាពលរដ្ឋ។ ខាងក្រោមនេះជាមធ្យោបាយធ្វើដំណើរសាធារណ៣យ៉ាង អ្នកនៅភ្នំពេញអាចជ្រើសរើសបាន៖
១. សេវារថយន្តក្រុងសាធារណៈ
មានប្រជាពលរដ្ឋមួយចំនួន បានជ្រើសរើសមធ្យោបាយនេះសម្រាប់ធ្វើដំណើរ ទៅតាមគោលដៅរៀងៗខ្លួន ដូចជា៖ ទៅសាលា កន្លែងធ្វើការ ទៅផ្សារជាដើម។ មធ្យោបាយនេះ បានជួយសម្រួលដល់ការចំណាយទៅលើថ្លៃសាំង ហើយថែមទាំងមានផាសុកភាព និងសុវត្ថិភាពខ្ពស់ថែមទៀតផង។
បច្ចុប្បន្ននេះ អ្នកធ្វើដំណើរតាមរថយន្តក្រុងសាធារណៈមានការកើនឡើងពីជាង ៥ ពាន់នាក់ មកជាង ១ម៉ឺននាក់ក្នុងមួយថ្ងៃ ខណៈខ្សែរត់បានដាក់ឱ្យដំណើរការចំនួន៩ ខ្សែលើចំនួនរថយន្តចំនួន ១៥០គ្រឿង។ នេះបើតាមលោក ម៉េត មាសភក្តី អ្នកនាំពាក្យសាលារាជធានីភ្នំពេញ។
ជាពិសេសនៅពេលឆាប់ៗខាងមុខសាលារាជធានីភ្នំពេញគ្រោងបន្ថែមរថយន្ត ៨០ គ្រឿងបន្ថែមទៀត ដើម្បីបម្រើដល់ការដឹកជញ្ជូនអ្នកដំណើរ។
២. កាណូតដឹកអ្នកដំណើរពីព្រែកព្នៅ-ភ្នំពេញ-តាខ្មៅ
នៅថ្ងៃទី ០៦ ខែមេសា ខាងមុខនេះការដឹកអ្នកដំណើរតាមផ្លូវទឹក គឺជាសេវាសាធារណថ្មីមួយទៀត សម្រាប់ផ្ដល់ជូនប្រជាពលរដ្ឋ ក្នុងការកាត់បន្ថយបញ្ហាកកស្ទះ និងចំណេញថវិកាក្នុងការធ្វើដំណើរ។
កាណូតត្រៀមដឹកដំណើរមានចំនួន៤គ្រឿង ក្នុង២គ្រឿងទិញពីប្រទេសវៀតណាម និង២គ្រឿងទៀតកាណូតចាស់ៗរបស់កម្ពុជា យកមកជួសជុល និងលាបពណ៌ឡើងវិញ។ ការដឹកដឹកជញ្ជូននេះ មានប្រវែង ២៥គីឡូម៉ែត្រ ដោយចំណាយពេលប្រមាណ៣៥នាទី។
កាណូតថ្មី មានចំណុះ ផ្ទុកអ្នកដំណើរ ៤៨នាក់ ដោយបំពាក់ម៉ាស៊ីនត្រជាក់។ រីឯកាណូតចាស់របស់ក្រសួង អាចផ្ទុកមនុស្ស ៦០ នាក់ ក្នុង ១គ្រឿង។
ចំពោះការដាក់ឲ្យដំណើរការដោយឥតគិតថ្លៃនោះ លោកទេសរដ្ឋមន្ត្រី ស៊ុន ចាន់ថុល បញ្ជាក់ថា រដ្ឋាភិបាលនឹងពិចារណា ក្រោយពេលបើកឲ្យដំណើរការសាកល្បង ថ្ងៃទី៦ ខែមេសា ឆ្នាំ២០១៨ ដើម្បីដឹងពីការចំណាយ ព្រោះការដឹកជញ្ជូននេះ ដំណើរការដោយរដ្ឋាភិបាល។
៣. រថភ្លើងដឹកអ្នកដំណើរពីស្ថានីយទៅព្រលានយន្តហោះអន្តរជាតិភ្នំពេញ
ខ្សែរថភ្លើងរត់ពីស្ថានីយភ្នំពេញតភ្ជាប់ទៅកាន់ព្រលានយន្តហោះអន្តរជាតិភ្នំពេញ នឹងត្រូវដាក់ឲ្យដំណើរការនៅមុនចូលឆ្នាំប្រពៃណីខ្មែរខាងមុខនេះ ដោយបច្ចុប្បន្ន ការសាងសង់នៅសល់តែប្រមាណជា ៣០០ម៉ែត្រប៉ុណ្ណោះ ក្នុងប្រវែងសរុប ១៦១៣ម៉ែត្រ។
រថភ្លើងធុនស្រាល៣គ្រឿងកំពុងដំឡើងនឹងរួចរាល់ ហើយត្រូវចេញដំណើរពីប្រទេសមិចស៊ីកូ យ៉ាងយូរបំផុតដាច់ ខែមីនា នឹងធ្វើដំណើរមកដល់ប្រទេសកម្ពុជា ហើយ។ អ្វីដែលកាន់តែពិសេសនោះ ការធ្វើដំណើររយៈ៤ខែដំបូង នឹងមិនត្រូវគិតថ្លៃនោះទេ៕