Smart ចេញគម្រោងថ្មី WiFi ចល័តតាមផ្ទះ តម្លៃទាប ហើយល្បឿនម៉ាអេម

2018-03-12 11:00:46
ចំនួនមតិ 0 | ចំនួនចែករំលែក 0

ចន្លោះមិនឃើញ

Smart Axiata បានដាក់ដំណើរការសេវាថ្មី គឺ Smart@Home ដែលជាសេវាអ៊ីនធឺណិតតាមផ្ទះមានល្បឿនលឿន ដើម្បីបំពេញតម្រូវការបន្ថែមដល់អ្នកប្រើប្រាស់អ៊ីនធឺណិត។

សេវាកម្មនេះគឺសាមញ្ញ និងងាយស្រួល ដោយគ្រាន់តែដំឡើងឧបករណ៍រ៉ោតទ័រ (Router) គ្មានខ្សែមួយប៉ុណ្ណោះនៅតាមផ្ទះ អ្នកនឹងមានសេវា WiFi ល្បឿនលឿន ដោយអាចភ្ជាប់ការប្រើប្រាស់រហូតដល់ ១០ឧបករណ៍ក្នុងពេលតែមួយ។

លោក Thomas Hundt នាយកប្រតិបត្តិ Smart Axiata បាននិយាយថា៖ "Smart@Home ជាសេវាកម្មដ៏ពិសេសមួយទៀត ដែលយើងខ្ញុំចង់ចែករំលែកទៅដល់ប្រជាជនកម្ពុជាទាំងអស់ ពោលគឺអតិថិជននៅតាមគេហដ្ឋាន ឬនៅខាងក្នុងអគារនានា អាចទទួលបានបទពិសោធន៍ និងអត្ថន័យពិតប្រាកដនៃសេវា WiFi ដែលមានល្បឿនលឿន ងាយស្រួលប្រើប្រាស់ ហើយមានតម្លៃសមរម្យបំផុត"។

Smart@Home ផ្ដល់សេវាអ៊ីនធឺណិតដោយមិនតម្រូវឲ្យមានកិច្ចសន្យាប្រើប្រាស់មានពេលកំណត់ ដែលគម្រោងនៃការបង់ប្រាក់ប្រចាំខែមាន ៣ប្រភេទ ចាប់ពី ១២ដុល្លារ ហើយក្នុងនោះគម្រោង (Premium) មានល្បឿនដល់ ១០Mbps។

លោក Stjepan Udovicic នាយកប្រតិបត្តិផ្នែកទីផ្សារ Smart Axiata បានលើកឡើងថា៖ “អតិថិជនដែលបានទិញសេវានេះ គឺអាចរីករាយជាមួយនឹងកម្មវិធីកម្សាន្តដ៏ពិសេសៗរាប់ពាន់ មាននៅលើ iflix និង JaikonTV ដោយសេរី ហើយសម្រាប់អ្នកបង់ប្រាក់ជាមុន ពេលទិញសេវាកម្ម Smart@Home នឹងទទួលបានទិន្នន័យប្រចាំខែ ១GB ព្រមទាំងក្លាយជាសមាជិក SmartVIP ផងដែរ។

ចំពោះការបង់សេវាកម្ម ផ្លាស់ប្ដូរគម្រោងប្រចាំខែ ការស្នើសុំដឹកជញ្ជូនឧបករណ៍ Router បញ្ចូលទឹកប្រាក់ ឬគ្រប់គ្រងគណនី សុទ្ធតែអាចធ្វើតាមកម្មវិធី SmartNas ដោយមិនចាំបាច់ចំណាយពេលធ្វើដំណើរទៅក្រុមហ៊ុនឡើយ។

WiFi អាចយកតាមខ្លួនបាននេះ អាចប្រើប្រាស់បានក្នុងតំបន់ជាច្រើនក្នុងក្រុងភ្នំពេញ ក្រុងសៀមរាប និងក្រុងបាត់ដំបង ហើយប៉ុន្មានសប្ដាហ៍ខាងមុខនេះ នឹងត្រូវពង្រីកទៅកាន់តំបន់ផ្សេងៗទៀតដូចជា ខេត្តកណ្ដាល ខេត្តព្រះសីហនុ ខេត្តកំពង់ស្ពឺ ក្រុងប៉ោយប៉ែត និងក្រុងស៊ីសូផុន។

សម្រាប់អ្នកចុះឈ្មោះមុនថ្ងៃទី៣១ ឧសភា ឆ្នាំ២០១៨ នឹងទទួលបានការផ្ដល់ជូនពិសេស ដោយអាចចុះឈ្មោះតាមកម្មវិធី SmartNas, Smart Shop ណាមួយក៏បាន ឬតាមរយៈទូ និងតុកតុក Smart@Home។ ព័ត៌មានបន្ថែម ចូលទៅផេកហ្វេសប៊ុក Smart Axiata ៕