ស្ពានឫស្សីកោះប៉ែន នឹងបាត់សូន្យពីទឹកដីខេត្តកំពង់ចាម?

  • 2018-03-14 02:36:26
  • ចំនួនមតិ 1 | ចំនួនចែករំលែក 79

ចន្លោះមិនឃើញ

​បន្ទាប់ពី​ត្រូវជំនួស​ដោយ​ស្ពាន​កោះប៉ែនថ្មី​ បានសម្ពោធ​ផ្លូវការនៅ​ថ្ងៃ​នេះ​ ខណៈ​​ស្ពានឫស្សី​កោះ​ប៉ែន​ ដែលជាស្ពានចំណាស់មួយ ស្ថិតនៅ​ខេត្ត​កំពង់ចាម នឹងលែងសូវមនុស្សឆ្លងកាត់ដូចមុន។

តាមការបញ្ជាក់របស់សម្តេច​នាយក​រដ្ឋ​មន្រ្តី ហ៊ុន សែន បានឲ្យដឹងថា ប្រជាពលរដ្ឋទាំងអស់នឹងមិនមានការលំបាកដូចកាលពីមុនទៀតទេ ពីព្រោះការពីមុនពេលគាត់ឆ្លងកាត់ស្ពានប្ញស្សី គឺមនុស្សឆ្លងម្នាក់ត្រូវអស់៥០០ រៀល, ម៉ូតូមួយ ១៥០០រៀល, ឡានតូច ២០,០០0 រៀល និងឡានដឹកសព ១៥០ ដុល្លារ ប៉ុន្តែចាប់ពីពេលនេះតទៅបងប្អូនប្រជាពលរដ្ឋមិនអស់ប្រាក់ទៀតទេ គឺទាំងការធ្វើដំណើរ និងការដឹកជញ្ជូនទំនិញផ្សេងៗ។

យ៉ាងណាមិញ រាជរដ្ឋាភិបាលមិនបានបញ្ជាក់ថា នឹងរុះរើស្ពានឫស្សីចោល ឬបែបណានោះទេ។ ព្រោះកន្លែងមកស្ពាននេះ បានជួយប្រជាពលរដ្ឋឲ្យឆ្លងទន្លេ និងត្រូវ​បានចាត់ទុកជា​និមិត្តរូប​ប្រចាំ​រមណីយដ្ឋាន​ឆ្នេរ​ខ្សាច់​កោះ​ប៉ែន​។  ជា​រៀងរាល់ឆ្នាំ​ ស្ពាន​ធ្វើពី​ដើម​​ប្ញស្សី​ប្រវែង​សរុប​ចំនួន​៥០០​ម៉ែត្រ​ និង​ទំហំ​ទទឹង​ស្ពាន​១,៥០​ម៉ែត្រ​នេះ សាងសង់​ក្នុង​រង្វង់​ខែ​វិច្ឆិកា និង​ចំណាយ​ពេល​សង់​ប្រហែល​ជាង​មួយ​សប្តាហ៍​។

​ស្ពាន​បេតុង​ថ្មីឈ្មោះថា ​ស្ពានកោះ​ប៉ែន​ ​មាន​បណ្តោយ​ប្រវែង​ ៧៧៩ម៉ែត្រ​ ទទឹង ៩,២ម៉ែត្រ ​និង​កម្ពស់ពី ២៣ ទៅ ២៤ម៉ែត្រ ចាប់​ផ្តើម​សាងសង់​​ក្នុងឆ្នាំ​២០១៣ ដោយ​កម្លាំង​វិស្វកម្ម នាយកដ្ឋាន​វិស្វកម្ម ក្រសួង​ការពារ​ជាតិ ដោយ​ចំណាយ​ថវិកា​ប្រមាណ ១៣លាន​ដុល្លារ។

គួរជម្រាបថា ស្ពាន​ឆ្លងទន្លេមេគង្គពីភូមិ​ព្រែក​ដើម​ចាន់ សង្កាត់​សំបួរ​មាស​ ក្រុង​កំពង់ចាម ទៅ​កាន់​កោះ​កំពង់​ត្រុំ ក្នុង​ភូមិ​សាស្ត្រ​ឃុំ​កោះ​មិត្ត ស្រុក​កំពង់សៀម ខេត្ត​កំពង់ចាម។ រាជ​រដ្ឋាភិបាល បាន​អនុញ្ញាត​ឱ្យ​ប្រជាពលរដ្ឋ​ធ្វើ​ដំណើរ​ឆ្លងកាត់​ស្ពាន​នេះ ជា​បណ្តោះ​អាសន្ន អស់​រយៈកាល​ជាង ១០​ខែ​កន្លង​ទៅ​ហើយ៕


អត្ថបទ៖ ស៊ិន សាវ៉េត