អាចហួសចិត្តនឹងហេតុផល Sony ដករន្ធកាស 3.5 mm ចេញពីស្មាតហ្វូនស៊េរីថ្មី

2018-03-15 03:14:30
ចំនួនមតិ 0 | ចំនួនចែករំលែក 0

ចន្លោះមិនឃើញ

Sony បានសម្រេចចិត្តលុបចេញរន្ធកាស 3.5 mm នៅលើ Sony Xperia XZ2 និង XZ2 Compact ដែលបានប្រកាសចេញនៅក្នុងកម្មវិធី MWC កន្លងទៅនេះ។ ខាងក្រោមជាហេតុផលនៃការដករន្ធកាសចេញ ៖

“នេះជាផ្នែកមួយនៃការផ្លាស់ប្ដូរទៅកាន់រចនាបថ Ambient Flow របស់យើង។ ដើម្បីបង្កើតបានការរចនាដ៏ស្អាតមួយ អ្នកឌីហ្សាញរបស់យើងត្រូវដករន្ធកាស 3.5 mm ចេញ។ បន្ថែមពីនេះ យើងដឹងថាទីផ្សារស្មាតហ្វូនមានទំនោរទៅរកកាសឥតខ្សែ ជាជាងកាសប្រើខ្សែ។”

ការបកស្រាយនេះ ធ្វើឲ្យគេយល់ថា Sony គឺជាអ្នកដើរតាមទំនោរ ដោយមិនមែនជាអ្នកបង្កើតទំនោរថ្មីៗនោះទេ។ បន្ថែមពីនេះ XZ2 និង XZ2 Compact គឺជាស្មាតហ្វូនមានកម្រាស់ក្រាស់ជាងគេប្រចាំឆ្នាំ ២០១៨ នេះ ហេតុនេះការដករន្ធកាស 3.5 mm ជារឿងមិនសមហេតុផលនោះទេ។ ប្រសិនបើការដកកាសនេះដើម្បីផលិតបានស្មាតហ្វូនមានកម្រាស់ស្ដើង ទើបស្ដាប់ទៅទំនងបន្តិច។

Sony Xperia XZ2

រចនាបថ Ambient Flow ធ្វើឲ្យ XZ2 មានកម្រាស់ដល់ ១១,១ ម.ម និង XZ2 Compact មានកម្រាស់ ១២,១ ម.ម។ ស្របពេលដែលស្មាតហ្វូនកំពូលៗរបស់ក្រុមហ៊ុនដទៃមានកម្រាស់មិនដល់ ១០ ម.មនោះទេ។ Galaxy S9+ ដែល Samsung ទើបប្រកាសមានកម្រាស់ ៨,៥ ម.ម និង iPhone X មានកម្រាស់ត្រឹម ៧,៧ ម.ម ប៉ុណ្ណោះ៕

ចុចអាន៖

ប្រភព៖ GSMarena ប្រែសម្រួល៖ សុខហេង