Bayern នាំមុខរឿងស៊ុតចូលទី ខណៈមានក្លឹបមួយរកបាន ០គ្រាប់ក្នុងវគ្គ UCL ១៦ក្រុមលើកនេះ

2018-03-15 12:06:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបយក្សអាល្លឺម៉ង់ Bayern Munich រកបានគ្រាប់បាល់ច្រើនជាងគេ ក្នុងជំនួបទាំងពីរជើងវគ្គ ១៦ ក្រុម Champions League រដូវកាលនេះ ខណៈក្លឹបព័រទុយហ្គាល់ Porto រកមិនបានសូម្បីមួយគ្រាប់។

ក្លឹប Bayern បានស៊ុតចូលសរុបដល់ទៅ ៨ គ្រាប់ ក្នុងការប្រកួតទាំងពីរជើង ក្នុងវគ្គ ១៦ក្រុម UCL ទៅលើក្លឹបទួរគី Besiktas (ជើងទី ១ ឈ្នះ ៥-០ ឯជើងទី ២ ឈ្នះ ៣-១)។

ចំណែកឯក្លឹបរកបានគ្រាប់បានច្រើនបន្ទាប់គឺមានបីក្លឹប ដូចជា Liverpool, Manchester City និង Real Madrid ដែលសុទ្ធតែស៊ុតចូលសរុប ៥ គ្រាប់រៀងៗខ្លួន ក្នុងជំនួបទាំងពីរជើងវគ្គ ១៦ក្រុម។

ចំណែកឯ Barcelona វិញ ក្រោយឈ្នះ Chelsea ៣-០ ក្នុងប្រកួតជើងទីពីរយប់មិញ មានន័យថា ក្លឹបស៊ុតចូលសរុប ៤ គ្រាប់ (កាលពីជើងទី ១ Barcelona ស៊ុតចូលតោខៀវចំនួន ១គ្រាប់)។ ដូចក្លឹបអ្នកមានបុណ្យដែរ គិតសរុបការប្រកួតទាំងពីរជើង Juventus ស៊ុតចូលបាន ៤គ្រាប់ ខណៈ Tottenham Hotspur រកបាន ៣គ្រាប់។

ក្លឹប Basel, PSG, Sevilla, Shakhtar Donetsk និង Roma សុទ្ធតែស៊ុតចូលសរុបបានត្រឹម ២ គ្រាប់ ខណៈ បិសាចក្រហម តោខៀវ និង Besiktas រកបាន ១ គ្រាប់។

ដោយឡែក មានតែ Porto មួយប៉ុណ្ណោះ ដែលរកមិនបានសូម្បីមួយគ្រាប់ក្នុងវគ្គ ១៦ក្រុមរដូវកាលនេះ។ ក្លឹបបានបរាជ័យក្នុងការស៊ុតចូល ក្នុងការប្រកួតទាំងពីរជើង ពេលប៉ះជាមួយក្លឹបហង្សក្រហម៕