ដូងឈ្មោះប្លែក អ្នកទៅលេងបុណ្យទន្លេចោមមើលព្រាត

2018-03-16 02:01:46
ចំនួនមតិ 0 | ចំនួនចែករំលែក 0

ចន្លោះមិនឃើញ

តាំងបង្ហាញនៅស្តង់មួយកន្លែងនាឱកាសបុណ្យទន្លេលើកទី៤ នៅក្រុងតាខ្មៅខេត្តកណ្តាល អ្នកដំណើរជាច្រើនហាក់បានទាក់ភ្នែកប្លែកអារម្មណ៍ទៅនឹងផ្លែដូងមួយធ្លាយ ដែលអ្នករៀបចំបានសរសេរដាក់ស្លាកមានអត្ថន័យថា “ផ្លែដូងដោះក្រមុំ”។ មានប្រហែល ៣០ផ្លែក្នុងមួយធ្លាយ ដូងនេះត្រូវបានដាក់តាំងបង្ហាញនៅខាងមុខស្តង់មកពីស្រុកអង្គស្នួលខេត្តកណ្តាល។

លោក ម៉ៅ សិទ្ធិ ប្រធានការិយាល័យកសិកម្មស្រុកអង្គស្នួលខេត្តកណ្តាលបានឱ្យដឹងថា ឈ្មោះដូងដោះក្រមុំ គ្រាន់តែលោកដាក់ដើម្បីទាក់ទាញការចាប់អារម្មណ៍តែប៉ុណ្ណោះ។ មែនទែនទៅដូងនេះអ្នកស្រុកហៅថា ដូងក្រអូប ឬដូងនៀល។សម្បកដូងនៀល ដែលដើមឡើយមានទំហំធំជាងនេះត្រូវបានចាស់ៗសម័យមុនយកមកវាល់អង្ករ។ លោកថា ទឹក និងសាច់ដូងមានរស់ជាតិផ្អែមក្រអូប និងមានសម្បកស្តើងអាចបកដោយដៃបាន ។

លោកបញ្ជាក់ថា៖ «ឈ្មោះដោះក្រមុំនេះ គ្រាន់តែខ្ញុំដាក់ដើម្បីទាក់ទាញចំណាប់អារម្មណ៍បងប្អូនមកទស្សនាស្តង់ផលិតផលខ្មែរទេ ហើយក៏ឃើញថាបងប្អូនចាប់អារម្មណ៍ប្រាកដមែន»។

លោកបានបន្ថែមថា ការដាំដុះដូងដោះក្រមុំអាចទទួលបានទិន្និផលរយៈពេល៣ឆ្នាំ ក្នុងករណីថែរទាំបានដិតដល់ មានកម្ពស់ដូចនឹងដើមដូងតឿ និងអាចមានផ្លែចន្លោះពី ៥០ផ្លែទៅ៧០ផ្លែក្នុងមួយធ្លាយ។ ក្រៅពីផ្លែដូង ស្តង់ក៏បានតាំងបង្ហាញនូវ ផលិតផល ទិន្និផល និងកសិផលជាច្រើនទៀតដូចជាបន្លែផ្លែឈើ អង្ករ ស្ករត្នោត និងផលិតផលផ្នែកវាយនភ័ណ្ឌជាដើម ដែលមានភូមិសាស្រ្តក្នុងស្រុកអង្គស្នួលខេត្តកណ្តាល។

លោក ម៉ៅ សិទ្ធិ ឱ្យដឹងទៀតថា ទឹកដូងមានអត្ថប្រយោជន៍ច្រើនយ៉ាងសម្រាប់សុខភាព។ដូច្នេះការនិយមចូលចិត្តផ្លែដូងមានច្រើន និងនិយមចូលចិត្តរស់ជាតិផ្សេងៗគ្នា។ ស្របពេលបច្ចេកទេសផ្នែកបង្កាត់ពូជដូងមានការរីកចម្រើន គេមិនអាចស្គាល់អស់ថា ពូជដូងក្នុងប្រទេសកម្ពុជានាពេលបច្ចុប្បន្នមានប៉ុន្មានប្រភេទឡើយ៕

ចុចអាន៖

អត្ថបទដោយ៖ សុផល