បន្ទាន់! អ្នកបាត់ម៉ូតូប្រញាប់ពិនិត្យស្លាកលេខ នគរបាលខេត្តកណ្តាលរឹបអូសបានច្រើនណាស់
- 2018-03-16 04:40:06
- ចំនួនមតិ 0 | ចំនួនចែករំលែក 0
បន្ទាន់! អ្នកបាត់ម៉ូតូប្រញាប់ពិនិត្យស្លាកលេខ នគរបាលខេត្តកណ្តាលរឹបអូសបានច្រើនណាស់
ចន្លោះមិនឃើញ
ស្នងការនគរបាលខេត្តកណ្តាលបានប្រកាសឱ្យពលរដ្ឋទូទំាងប្រទេស ដែលធ្លាប់បាត់ម៉ូតូ ឬត្រូវជនល្មើសលួចឬប្លន់ អាចប្រញាប់មកពីនិត្យស្លាកលេខនៅស្នងការដ្ឋាននគរបាលខេត្តកណ្តាល ដែលសមត្ថកិច្ចទើបបានរកឃើញជាបន្តបន្ទាប់ ក្រោយចាប់ឃាត់ខ្លួនជនល្មើសបាន១២នាក់ និងស្លាកលេខប្រមាណ៣០០។
លោកឧត្តមសេនីយទោ អ៊ាវ សំរើន ស្នងការនគរបាលខេត្តកណ្តាល បានប្រាប់ឱ្យដឹងថា ក្រោយសមត្ថកិច្ចខេត្តកណ្តាល បានសហការជាមួយសមត្ថកិច្ចខេត្តកំពង់ស្ពឺ និងខេត្តកំពង់ឆ្នាំង បំបែកសំបុកក្រុមចោរប្លន់ និងកន្លែងទទួលផលចោរកម្មរយៈពេលប៉ុន្មានថ្ងៃជាប់ៗគ្នាមក សមត្ថកិច្ចបានចាប់ឃាត់ខ្លួនបានជនល្មើស១២នាក់ បានបញ្ជូនទៅតុលាការ។ ចំណែកម៉ូតូ រួមទាំងភស្តុតាងផ្សេងៗទៀត កំពុងរក្សាទុក ពិសេសគឺស្លាកលេខម៉ូតូ កំពុងរកឃើញជាបន្តបន្ទាប់ សរុបទំាងអស់មានមិនតិចជាង៣០០ទេ។ លោកស្នងការ ឱ្យដឹងថា ជាក់ស្តែងកាលពីថ្ងៃទី១៥ខែមីនាក ន្លងមកនេះ សមត្ថកិច្ចខេត្តកណ្តាល បានបន្តនិតិវិធីជាមួយសមត្ថកិច្ចខេត្តកំពង់ស្ពឺ រកឃើញស្លាកលេខ១៩៨ទៀត ដែលក្រុមជនល្មើសបានដោះបោះចោលក្នុងស្រះទឹកមួយកន្លែងនៅក្រុងច្បារមន។
លោកស្នងការរូបនេះប្រកាសឱ្យពរដ្ឋទូទំាងប្រទេស ដែលធ្លាប់បាត់ម៉ូតូ ឬត្រូវជនល្មើសលួចឬប្លន់ កន្លងមក ត្រូវប្រញាប់មកពិនិត្យមើលស្លាកលេខនៅស្នងការដ្ឋាននគរបាលខេត្តកណ្តាល ដើម្បីរៀបចំដាក់ពាក្យប្តឹងបន្តទៀត។ លោកបន្តថា លោកនឹងចុះអនុវត្តរឿងនេះបន្តទៀត ដើម្បីបោសសំអាតក្រុមខិលខូចឱ្យអស់ពីសង្គមកម្ពុជា។ លោកបន្តថាៈ «ជាទូទៅក្រោយពេលដែលវាប្លន់បាន និងកាច់កម៉ូតូបានក្រុមនេះបានយកទៅលក់នៅកន្លែងឡរគេ មានន័យថា កន្លែងទទួលផលចោរកម្មហ្នឹងនៅក្រុងច្បារមនខេត្តកំពង់ស្ពឺ។ អ៊ីចឹងយើងបានឃាត់ខ្លួន៥នាក់ទៀតនៅកំពង់ស្ពឺហ្នឹងបានម៉ូតូ៨គ្រឿង ក្រៅពីហ្នឹងមានតែស្លាកលេខរបស់របរដែលដោះចេញពីម៉ូតូ ដែលលួចបាន ហើយមានវត្ថុតាងមួយចំនួនទៀតវាបានបោះចោលនៅក្នុងស្រះទឹក ដែលមានជម្រៅ៨ម៉ែត្រ»។
បើតាមលោកស្នងការ ជនល្មើសទំាង១២នាក់នេះ បានយកខេត្ត៣ ធ្វើសកម្មភាពលួច និងប្លន់ រួមមានខេត្តកណ្តាល កំពង់ស្ពឺ និងខេត្តកំពង់ឆ្នាំងដែលមានឃ្លាំងស្តុកទុក៦កន្លែង ហើយសមត្ថកិច្ចបានសន្និដ្ឋានថាអាចនឹងមានខេត្តផ្សេងទៀតជាប់ពាក់ព័ន្ធ។ ចំណែកម៉ូតូ ដែលត្រូវបានសមត្ថកិច្ចរកឃើញមានចំនួនត្រឹមជាង១០គ្រឿងប៉ុណ្ណោះ មានន័យថា ជនល្មើសបានលួចឬប្លន់ យកលក់ជាបន្តបន្ទាប់រហូត ចំណែកស្លាកលេខមានប្រមាណ៣០០ស្លាក មានទំាងស្លាកលេខរដ្ឋ ស្លាកលេខ ខ.ម ស្លាកលេខអង្គការ ស្លាកលេខភ្នំពេញ និងស្លាកលេខខេត្តជាដើម៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
