Jennifer Lopez រំឭកពីរឿងទាក់ទងនឹងការបៀតបៀនផ្លូវភេទ #Metoo

2018-03-16 07:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងកិច្ចសម្ភាសន៍ជាមួយទស្សនាវដ្ដី Harper's Bazaar តារាចម្រៀង Jennifer Lopez បានបង្ហើបពីរឿងរ៉ាវផ្ទាល់ខ្លួននាងទាក់ទងនឹងការបៀតបៀនផ្លូវភេទនៅក្នុងវិស័យសិល្បៈ ឬដែលគេហៅថា #Metoo។

នៅពេលដែលនាងត្រូវបានគេសាកសួរថា តើនាងធ្លាប់ទទួលការបៀតបៀនផ្លូវភេទ នៅក្នុងវិស័យសិល្បៈនៅហូលីវូដឬអត់? Jennifer បានឆ្លើយថានាងមិនធ្លាប់មានបទពិសោធន៍ដូចអ្នកដទៃធ្លាប់ជួបប្រទះដែលបានបកស្រាយពីរឿងរ៉ាវខ្លួននោះទេ។ អ្វីដែលនាងបានជួបនោះគឺវាគួរឲ្យតក់ស្លុត។

JLO បាននិយាយថា នាងធ្លាប់ត្រូវអ្នកដឹកនាំរឿងម្នាក់បង្ខំឲ្យនាងដោះសម្លៀកបំពាក់ចេញនិងបង្ហាញល្វែងលើ ប៉ុន្តែនាងមិនបានធ្វើតាមការបង្ខំនោះទេ។

រឿងដែលបានកើតឡើងនោះគឺនៅក្នុងការសម្ដែងភាពយន្តលើកទី១ របស់នាង។ តារារូបនេះបន្តថា នៅពេលដែលនាងតម្រូវឲ្យធ្វើរឿងបែបនេះនាងគឺតក់ស្លុតតែម្ដង ពីព្រោះបុរសម្នាក់នោះបានជួលនាងដើម្បីសម្ដែង។

ទោះបីជាពេលនោះនាងទើបតែចូលប្រឡូកក្នុងវិស័យសិល្បៈក៏ដោយ ក៏នាងគិតថាអំពើនេះគឺវាមិនសាកសមទាល់តែសោះ។ ដូច្នេះហើយទើបនាងសម្រេចចិត្តមិនធ្វើតាមគេបញ្ជា ដោយគិតពីខ្លួនឯងជំនួសវិញ។

Lopez ជាតារាស្រីម្នាក់ដែលតែងតែគាំទ្រនូវចលនា #MeToo និង Time's Up ហើយនាងក៏បានស្លៀកពាក់ខ្មៅពេលចូលរួមកម្មវិធី Golden Globes ផងដែរ។ គោលបំណងរបស់នាងគឺគាំទ្រចលនាផ្សេងៗ ដើម្បីនាំឲ្យមានសិទ្ធិស្មើគ្នារវាងបុរសនិងស្ដ្រី៕