២ថ្ងៃទៀត ប្រតិភូជាន់ខ្ពស់ហុងកុង នឹងមកដល់កម្ពុជា រកផ្លូវវិនិយោគនៅកម្ពុជា

2018-03-17 07:52:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមប្រឹក្សាអភិវឌ្ឍពាណិជ្ជកម្មហុងកុង (HKTDC) នឹងធ្វើទស្សនកិច្ចនៅកម្ពុជាចាប់ពីថ្ងៃទី១៩-២០ មីនា ដើម្បីស្វែងរកឱកាសសម្រាប់កិច្ចសហប្រតិបត្តិការវិនិយោគ និងផលិតកម្មរវាងកម្ពុជា និងហុងកុង ក្រោមគំនិតផ្ដួចផ្ដើមនៃគម្រោងពាណិជ្ជកម្ម "ផ្លូវមួយ ខ្សែក្រវាត់មួយ"។ នេះបើយោងតាមសេចក្ដីប្រកាសព័ត៌មានដែល Sabay ទទួលបាន។

ដំណើរទស្សនកិច្ចផ្នែកពាណិជ្ជកម្មរបស់រដ្ឋបាលទីក្រុងហុងកុង ដែលជាមជ្ឈមណ្ឌលពាណិជ្ជកម្ម និងជាតំបន់ពាណិជ្ជកម្មរវាងចិនដីគោក អាស៊ី និងពិភពលោក មួយនេះ នឹងត្រូវដឹកនាំដោយលោក Edward Yau លេខាធិការពាណិជ្ជកម្ម និងអភិវឌ្ឍសេដ្ឋកិច្ចនៃរដ្ឋបាលពិសេសរបស់រដ្ឋបាលក្រុងហុងកុង និងលោកស្រី Margaret Fong នាយកប្រតិបត្តិ HKTDC។

HKTDC នឹងចូលរួមសិក្ខាសាលាពិភាក្សាពីឱកាសសហការគ្នាក្នុងការផលិត និងវិនិយោគ ក្នុងនោះមានផ្នែកហិរញ្ញវត្ថុ ធនាគារ ហេដ្ឋារចនាសម្ព័ន្ធ ការអភិវឌ្ឍ និងផ្នែកច្បាប់ពាណិជ្ជកម្មសំខាន់ៗមួយចំនួនទៀត ដែលប្រព្រឹត្តទៅនៅសណ្ឋាគារ The Great Duke Phnom Penh (អតីតសណ្ឋាគារ Intercontinental) ចាប់ពីម៉ោង ១២ ថ្ងៃត្រង់ ថ្ងៃទី២០ មីនា។

សិក្ខាសាលាដែលរៀបចំដោយសមាគមពាណិជ្ជកម្មហុងកុងនៅកម្ពុជា Hong Kong Business Association in Cambodia (HKBAC) នេះ នឹងបង្ហាញពីឱកាសពាណិជ្ជកម្មនៅកម្ពុជា ដើម្បីទាញយកផលប្រយោជន៍ពីការវិនិយោគជាមួយហុងកុង និងជំរុញភាពជាដៃគូក្នុងតំបន់។

HKTDC ជាស្ថាប័នស្របច្បាប់បង្កើតឡើងនៅឆ្នាំ ១៩៦៦ ជាដៃគូទីផ្សារអន្តរជាតិរបស់ហុងកុង សម្រាប់ក្រុមហ៊ុន អ្នកជំនួញ និងអ្នកផ្ដល់សេវាកម្ម ដែលមានមូលដ្ឋាននៅហុងកុង ហើយ HKTDC មានការិយាល័យជាង ៤០ នៅទូទាំងពិភពលោក៕

ដោយ៖ វិទូ