ហេតុផល៥យ៉ាង ដែលបង្ហាញថាអាជីពជាគ្រូបង្វឹកបាល់ទាត់ ជាការងារដែលស្រេ្តសបំផុត

2018-03-18 09:00:38
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពីក្រោយភាពជោគជ័យរបស់ក្លឹប និង កីឡាករ ប្រាកដណាស់ថាមិនអាចកាត់ផ្តាច់បានឡើយពីគ្រូបង្វឹក ដែលជាអ្នកទទួលខុសត្រូវខ្ពស់ទាំងលើជោគវាសនាខ្លួនឯង និង ក្លឹបទាំងមូល។ ខាងក្រោមនេះ គឺជាហេតុផល៥យ៉ាង ដែលបង្ហាញថាអាជីពជាគ្រូបង្វឹកបាល់ទាត់ ជាការងារដែលស្រេ្តសបំផុត៖

១ ប្រើពេលច្រើនម៉ោងធ្វើការ

គ្រូបង្វឹកបាល់ទាត់ប្រើពេលប្រហែល ១០០ ម៉ោង ក្នុងមួយសប្តាហ៍ដើម្បីបំពេញការងារ។ នេះបើតាមវេបសាយ jobmonkey.com។ បានន័យថា មួយសប្តាហ៍ ស្មើនឹង ១៦៨ម៉ោង ពួកគេប្រើពេលអស់៦០% ធ្វើការសុទ្ធដោយមិនរាប់បញ្ចូលម៉ោងសម្រាក ឬ បើធៀបនឹងអ្នកធ្វើការទូទៅ ដែលប្រើពេលត្រឹមតែ ៤០ ទៅ ៤៨ ម៉ោងក្នុង១សប្តាហ៍។

សរុបមក ក្នុង១សប្តាហ៍ គ្រូបង្វឹកបាល់ទាត់ម្នាក់សល់ពេល៦៨ម៉ោង ដើម្បីញ៉ាំ គេង ធ្វើកិច្ចការផ្ទាល់ខ្លួន និង សម្រាប់គ្រួសារ។ ជារួម ក្នុង១ថ្ងៃពួកគេ ប្រើពេលដល់ទៅ ១៤,២៩ ម៉ោងលើការងារ និង សល់ពេល ៩,៧១ ម៉ោងប៉ុណ្ណោះក្នុងមួយ សម្រាប់គេង ឬ តាំងចិត្តធ្វើអ្វីផ្សេងក្រៅពីការងារ។

២ កំហិតពេលវេលាជាមួយគ្រួសារ និង ជីវិតផ្ទាល់ខ្លួន

ចំណាយពេល១០០ម៉ោង ក្នុង១សប្តាហ៍សម្រាប់គ្រូបង្វឹកដែលគ្មានគ្រួសារ មិនជាបញ្ហានោះទេ ប៉ុន្តែគ្រូបង្វឹកជាច្រើនមានទាំងប្រពន្ធនិងកូនៗ ហើយពេលវេលា ៩,៧១ ម៉ោងក្នុង១ថ្ងៃរាប់ទាំងញ៉ាំ គេង និង គ្មានការលើកលែងសូម្បីចុងសប្តាហ៍។

លោក Mike Ekeler ជាគ្រូបង្វឹកបាល់ទាត់ម្នាក់តែងសួរខ្លួនឯងជារៀងរាល់ឆ្នាំថា "តើខ្ញុំគួរបន្តធ្វើវាទៀតឬទេ”? ជាយូរឆ្នាំឆ្ងាយពីប្រពន្ធ និង កូន៤នាក់។ ជាកំហុស? ប៉ុន្តែលោកតែងបញ្ចប់ចម្លើយជាមួយនឹងពាក្យថា "Yes” គឺបន្ត។ មហិច្ចតា ការស្រលាញ់បាល់ទាត់ និង ប្រាក់ឈ្នួល តែងយកឈ្នះចិត្តលោកដែលចង់នៅជិតគ្រួសារ។

៣ ការងារដែលគ្មានស្ថិរភាព

ការងារជាគ្រូបង្វឹកត្រូវបានគេប្រមើលឃើញថាមានស្ថិរភាពទាបបំផុត ពោលគឺប្រមាណ១៨% បានន័យតំណែងគ្រូធំបានមកដោយលំបាក និង បាត់បង់ទៅវិញដោយផុយស្រួយ។ នេះបើតាម ESPN ធ្លាប់បានចុះផ្សាយកន្លងមក។

ជាក់ស្តែង គ្រូបង្វឹកជាច្រើន សូម្បីតែគ្រូល្បីៗ ត្រូវបានក្លឹបដកចេញពីតំណែង ក្រោយដឹកនាំក្រុមទទួលលទ្ធផលមិនល្អ ទោះធ្លាប់មានស្នាដៃច្រើនយ៉ាងណាក៏ដោយ។

៤ ការងារដែលមានកម្រិតស្ត្រេសខ្ពស់

ដោយសារតែបាល់ទាត់ជាប្រភេទកីឡាដែលទាមទារយុទ្ធសាស្ត្របត់បែនគ្រប់គូបដិបក្ខ ដូច្នេះហើយទើបទាមទារឲ្យគ្រូបង្វឹកនីមួយៗត្រូវប្រើពេលលើសលប់ដើម្បីរៀបចំក្រុមរបស់ខ្លួន និង ការស្វែងយល់ពីគូសត្រូវ។

ជាងនេះ អំឡុងពេលប្រកួត បាល់ទាត់គឺជាប្រភេទវិញ្ញាសាកីឡាដែលរន្ធត់ញាប់ញ័រគ្រប់វិនាទី ដែលនេះធ្វើឲ្យបាល់ទាត់ក្លាយជាកីឡាដែលមានប្រជាប្រិយភាពបំផុតលើលោកនេះ ខណៈដែលអ្នកដែលពិបាកចិត្តជាងគេក្នុងទីលានគឺគ្រូបង្វឹក ព្រោះចង់ឈ្នះ តែមិនអាចធ្វើអ្វីបាន ក្រៅពីស្រែកបញ្ជាកូនក្រុម។

ទាំងនេះហើយដែលជាកត្តាធ្វើឲ្យ ការងារជាគ្រូបង្វឹកស្ត្រេសលើសការងារនានា សូម្បីប្រធានាធិបតីអាមេរិកបច្ចុប្បន្នក៏គង់មានពេលវេលាសប្បាយច្រើនជាងគ្រូបាល់ទាត់ទៅទៀត។

តួយ៉ាង កាលពីចុងខែធ្នូកន្លងទៅ Business Insider បានចុះផ្សាយថា ប្រធានាធិបតីអាមេរិក លោក Donald Trump ចាយពេលជាង៣៣%លើមុខជំនួញផ្ទាល់ខ្លួន និង ជាង ២៥% នៃពេលវេលាសរុបលើការវាយកូនហ្គោលលំហែកាយរបស់លោក។

៥ ប្រឈមជាមួយអ្នកសារព័ត៌មាន

ពិតណាស់ អាជីពជាគ្រូបង្វឹក ក្រៅពីប្រើពេលច្រើនម៉ោងនៃជីវិតរបស់ខ្លួន វាថែមទាំងជាប្រភេទការងារដែលគេឲ្យនិយមន័យថា "ការងារដែលគ្មានសន្តិសុខ (zero job security)” និង រស់នៅក្រោមសម្ពាធ ក្រោមការឃ្លាំមើលរបស់អ្នកសារព័ត៌មាន ២៤ម៉ោង/៧ថ្ងៃ។