តួសំខាន់២ ក្នុងរឿងទី១របស់សមាគមសិល្បករខ្មែរ ត្រូវប៉ូលិសឃាត់ខ្លួន លើករណីគ្រឿងញៀន
- 2018-03-18 07:11:44
- ចំនួនមតិ 0 | ចំនួនចែករំលែក 0
តួសំខាន់២ ក្នុងរឿងទី១របស់សមាគមសិល្បករខ្មែរ ត្រូវប៉ូលិសឃាត់ខ្លួន លើករណីគ្រឿងញៀន
ចន្លោះមិនឃើញ
"បន្តោងឆ្នាំដី" គឺជាចំណងជើងភាពយន្តដំបូងផលិតក្រោមការផ្ដួចផ្ដើមពី "សមាគមសិល្បករខ្មែរ" ដែលមានអ្នកនាង ចន ច័ន្ទលក្ខិណា ជាប្រធាន និងដឹកនាំសម្ដែងដោយតារាកំប្លែងនាយ ពែកមី។ ថតរួចមិនទាន់ដាក់បញ្ចាំងជាផ្លូវការផង តួសម្ដែង២រូបក្នុងរឿងខ្នាតធំបែរជាជួបរឿងអាស្រូវគ្រឿងញៀន។ អ្នកទាំង២នោះគឺ៖
១ ហោរ អគ្គីនេត្រ
លោក វ៉ាន់ សុខសីហា ដែលអ្នកប្រើប្រាស់បណ្ដាញសង្គម Facebook ស្គាល់ថាជា ហោរមានប័ណ្ណធានា អគ្គីនេត្រ ត្រូវបានប៉ូលិសឃាត់ខ្លួនលើករណីជួញដូរគ្រឿងញៀន កាលពីថ្ងៃទី២៧ ខែកញ្ញា ឆ្នាំ២០១៧ នៅផ្លូវ២៧១ ក្រោយវិទ្យាល័យ ជា ស៊ីម សាមគ្គី ដោយជួញដូរគ្រឿងញៀនប្រភេទមេតំហ្វេតាមីន (ម៉ាទឹកកក) ទម្ងន់២.៦៨ក្រាម។ គិតមកដល់ពេលនេះ លោកនៅជាប់ឃុំឃាំងក្នុងពន្ធធនាគារនៅឡើយ។
២ លោក តាន់ គីមសួ
អ្នកផលិតវីដេអូបញ្ឆោត (Prank) ដែលមានអ្នកតាមដានជាង៣០ម៉ឺននាក់លើ Facebook តាន់ គីមសួ ក៏ជាតួសំខាន់មួយរូបក្នុងភាពយន្តខាងលើដែរ។ ថ្មីៗនេះរូបភាពដែលលោកត្រូវប៉ូលិសដាក់ខ្នោះ បានចែកចាយពាសពេញបណ្ដាញសង្គម។ មិនខុសពី អគ្គីនេត្រ ការចាប់ខ្លួនស្ដែងៗនេះ ត្រូវបានគេទម្លាយជាបន្តបន្ទាប់ថា ធ្វើឡើងដោយសារលោកគឺជាអ្នកជួញដូរគ្រឿងញៀន។
យ៉ាងណាក្ដី មិនទាន់មានការបញ្ជាក់ច្បាស់លាស់ណាមួយថាលោកត្រូវឃាត់ខ្លួនលើករណីអ្វីនៅឡើយទេ។ ក្នុងនោះលោក ហេង ឡុង ដែលជាអ្នកជួយសម្របសម្រួលការងារសមាគម និងការថតភាពយន្តនេះបានឲ្យដឹងតាមរយៈវីដេអូ Live កាលពីយប់មិញថា បើតាមការបញ្ជាក់ផ្ទាល់ជាមួយភាគីកងរាជអាវុធហត្ថ លោក តាន់ គីមសួ ពិតជាត្រូវបានសមត្ថកិច្ចឃាត់ខ្លួនមែន តែលោក ហេង ឡុង មិនអាចដឹងលម្អិតថាក្រោមមូលហេតុអ្វីនៅឡើយ ត្បិតខ្លួនមិនអាចទាក់ទងសុំជួបជនជាប់ចោទបាន។
គូស្នេហ៍ប្រធានសមាគម បន្ថែមថា ទោះតួសម្ដែងមានពេលនេះកំពុងជាប់គាំងក្នុងពន្ធធនាគារមែន តែរឿង "បន្តោងឆ្នាំដី" បានផលិតហើយរួចរាល់ និងគ្រោងបញ្ចាំងនៅខែក្រោយនេះ។ ប្លង់របស់ ហោរអគ្គីនេត្រ មិនត្រូវបានកាត់ចោលឡើយ ដោយអះអាងថាបុរសរូបនេះទើបតែពាក់ពន្ធនឹងគ្រឿងញៀន ក្រោយសម្ដែងចប់។ ឯប្លង់លោក តាន់ គីមសួ គឺត្រូវពិចារណា និងស្វែងរកមូលហេតុពិតប្រាកដ នៃរឿងអាស្រូវសិន៕
វីដេអូលោក ហេង ឡុង និយាយពីករណីប៉ូលិសចាប់ លោក តាន់ គីមសួ