ផលិតករបកស្រាយ ក្រោយផ្ទុះរឿង "រថយន្តទៅសៀមរាប” ចម្លងពីថៃ និងកូរ៉េ ទាំងដុល

2018-03-19 02:24:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តរឿង”រថយន្តទៅសៀមរាប” ដែលជាស្នាដៃទី១របស់លោក ស៊ឹម សុរ៉ាមភូមិ បានសម្ពោធចាក់បញ្ចាំងជាផ្លូវការហើយកាលពីចុងសប្ដាហ៍កន្លងទៅ។ ស្នាដៃមួយនេះត្រូវបានមហាជនមួយចំនួនលើកឡើងថា សាច់រឿងបានចម្លងពីរឿង "រថភ្លើងទៅប៊ូសាន" របស់កូរ៉េ និង រឿង "888 តៃកុងឡានផ្តាច់ព្រលឹង" របស់ថៃ។ បែបនេះ តារាសម្ដែងដែលវិវឌ្ឍខ្លួនមកជាផលិតកររូបនេះ បានបញ្ជាក់ថា រឿងរបស់លោកមិនបានចម្លងពីរឿងទាំង២នោះឡើយ។

ស៊ឹម សុរ៉ាភូមិ

ការផ្ទុះការរិះគន់នេះ មិនមែនទើបតែការប្រកាសនៃការចាក់បញ្ចាំងឡើយ គឺកើតឡើងតាំងពី លោក ស៊ឹម សុរ៉ាមភូមិ ប្រកាសដំណើរការថតមកម្ល៉េះ។ លោកថា ភាពយន្តដែលជាស្នាដៃដំបូងរបស់ខ្លួននេះ គ្រាន់តែធ្វើពិធីក្រុងពាលីបង្ហាញចំណងជើងជាសាធារណៈភ្លាម ត្រូវបានមហាជនមួយចំនួនបានលើកឡើងថា លោកបានចម្លងពី រឿង "រថភ្លើងទៅប៊ូសាន" របស់កូរ៉េ និង រឿង “888 តៃកុងឡានផ្តាច់ព្រលឹង" របស់ថៃ ភ្លាម។ ចំណុចនេះ លោកសូមបញ្ជាក់ថា រឿង”រថយន្តទៅសៀមរាប” គឺជាតែងនិពន្ធ និងដឹកនាំសម្ដែងដោយខ្លួនលោកសុទ្ធសាធ មិនបានចម្លងពីគេនោះទេ។

លោកបានលើកឡើងថា ស្នាដៃនេះដំបូងឡើយលោកផលិតឡើងដើម្បីសារណាបញ្ចប់ការសិក្សារបស់ខ្លួនតែប៉ុណ្ណោះ ប៉ុន្តែតែក្រោយពីមិត្តក្នុងសិល្បៈជំរុញ និងការគាំទ្រថវិកាពីលោកស្រី ថុង ស៊ីវទៀង ជាម្ចាស់ផលិតកម្ម ទើបស្នាដៃថ្មីនេះអាចមានវត្តមានតាមរោងភាពយន្ត។

សកម្មភាពសម្ពោធរឿង

សុរ៉ាមភូមិ បញ្ជាក់ទៀតថា ភាពយន្តរឿង”រថយន្តទៅសៀមរាប” លោកបានសរសេរឡើងដោយផ្ទាល់ដៃ ដែលខ្លឹមសារនៃសាច់រឿងទាំងមូល គឺមានការអប់រំលាយជាមួយនឹងភាពកំប្លុកកំប្លែង ដោយនិយាយពីអាជីពអ្នករត់តាក់ស៊ី និងអ្នករួមដំណើរ ថាជួបបញ្ហាអ្វីខ្លះ។ ជាងនេះទៅទៀតក៏មានបង្កប់សារអប់រំ ឲ្យមនុស្សត្រូវចេះអធ្យាស្រ័យគ្នា និងចេះសម្របឥរិយាបថក្នុងស្ថានភាពណាមួយ ដើម្បីរស់នៅឲ្យចុះសម្រុងនឹងគ្នា ហើយមានក្ដីសុខ។

សុរ៉ាមភូមិ បានលើកឡើងទៀតថា សូមឲ្យអ្នកដែលរិះគន់ទាំងឡាយ កុំអាលចោទប្រកាន់លោកឲ្យសោះ សូមទស្សនាភាពយន្តមួយនេះសិន មុននឹងធ្វើការរិះគន់ ដើម្បីឲ្យដឹងថាវាដូចរឿង ថៃ និងកូរ៉េ ទេ។

បើទោះជាស្នាដៃនេះ ជាការសាកល្បងទីផ្សារភាពយន្តក្ដី ក៏ប៉ុន្តែសុរ៉ាមភូមិ និយាយថា ខ្លួនបានសម្រិតសម្រាំងខ្ពស់ ដើម្បីធ្វើយ៉ាងណាឱ្យគុណភាពសាច់រឿង ទទួលយកបានពីទស្សនិកជន។ ក្រៅពីភាពយន្តមួយនេះ លោក ស៊ឹម សុរ៉ាមភូមិ បង្ហើបឲ្យដឹងថាឆាប់ៗខាងមុខនេះ លោកគ្រោងផលិត ២ទៅ៣រឿង បន្តទៀតផងដែរ៕

អត្ថបទ៖ ស៊ុនហួត