ការពារជាតិ អាចដកកីឡាករបរទេសម្នាក់ចេញ ក្រោយលេងមិនល្អ

2018-03-19 02:40:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមក្រសួងការពារជាតិ អាចនឹងដកខ្សែប្រយុទ្ធ Na Hyo Sung ចេញ ក្រោយពីចប់ជើងទី១លីគកំពូលកម្ពុជានេះ ដោយសារតែកីឡាករកូរ៉េខាងត្បូងម្នាក់នេះ លេងមិនបានល្អ។

Na Hyo Sung ពាក់អាវលេខ៩

លោក ភា សុភក្ត្រា គ្រូបង្វឹកក្រុមក្រសួងការពារជាតិ និយាយដោយមិនលាក់បាំងអ្នកគាំទ្រថាក្រុមរបស់លោកលេងប្រយុទ្ធមិនទាន់បានល្អឡើយ ដោយសារតែកីឡាករបរទេសលេងប្រយុទ្ធពាក់អាវលេខ៩ មានឱកាសតែធ្វើមិនបានសម្រេចសោះ។ ទាក់ទិននឹងបញ្ហានេះដែរ លោកអាចនឹងធ្វើការផ្លាស់ប្ដូរកីឡាករបរទេសម្នាក់នេះចេញ ប្រសិនបើប្រកួតក្រោយៗ នៅតែលេងមិនល្អដូច្នេះទៀត។

លោក ភា សុភក្ត្រា

“ប្រយុទ្ឋទោលរបស់ទ័ព ជនជាតិកូរ៉េនៅមិនទាន់បំប៉ោងសំណាញ់ទីនៅឡើយក្នុងចំណោម៣ប្រកួត អាចនិយាយបានថាខ្សែប្រយុទ្ធមិនមានប្រសិទ្ធភាព ព្រោះដៃគូព្យាយាមបញ្ជូនបាល់ល្អទៅក្នុងប្រអប់ទី រួមទាំងឱកាសសម្រេចទី តែគាត់ធ្វើមិនបាន ។ ខ្ញុំមិនលាក់បាំងអ្នកគាំទ្រទេ បើគាត់មិនសម្រេចទីឱ្យក្រុមតាមអ្វីដែលយើងចង់បាន នោះជើងទី២ យើងនឹងមានការផ្លាស់ប្តូរ ព្រោះយើងបានជជែកគ្នាក្នុងកិច្ចសន្យារួចហើយ”។ លោក ភា សុភក្ត្រា បញ្ជាក់បន្ថែម។

ឆ្លងកាត់៣ប្រកួតនៅលីគកំពូលកម្ពុជា ក្រុមក្រសួងការពារជាតិ ឈ្នះ២និងចាញ់១ប្រកួត ឈរនៅចំណាត់ថ្នាក់លេខ៥ក្នុងតារាងលីគ។ ក្លឹបមួយនេះ មានកីឡាករបរទេសតែ៤រូបប៉ុណ្ណោះនៅរដូវកាលនេះ ស្របពេលសហព័ន្ធអនុញ្ញាតឱ្យប្រើកីឡាករបរទេសដល់ទៅ៥នាក់ក្ដី៕

អត្ថបទ៖ មុន្នីរម្យ