អ្នកជំនាញ បង្ហាញពីចំណុចវិជ្ជមាន និងអវិជ្ជមាន ចំពោះវត្តមានដ៏គំហុករបស់ទេសចរចិននៅព្រះសីហនុ
- 2018-03-19 02:30:57
- ចំនួនមតិ 0 | ចំនួនចែករំលែក 0
អ្នកជំនាញ បង្ហាញពីចំណុចវិជ្ជមាន និងអវិជ្ជមាន ចំពោះវត្តមានដ៏គំហុករបស់ទេសចរចិននៅព្រះសីហនុ
ចន្លោះមិនឃើញ
អ្នកជំនាញផ្នែកដីធ្លី និងទេសចរណ៍នៅកម្ពុជាមើលឃើញថាកំណើនជនជាតិនៅខេត្តព្រះសីហនុបានជំរុញឲ្យខេត្តនេះមានការអភិវឌ្ឍកាន់តែរហ័ស និងបានជួយឲ្យជីវភាពម្ចាស់ស្រុកកើនឡើង។ យ៉ាងណាមិញ អ្នកជំនាញដដែលលើកឡើងដែរថាបើសិនជាគ្មានការគ្រប់គ្រងត្រឹមត្រូវទេនឹងធ្វើឲ្យកម្ពុជាខាតប្រយោជន៍ខ្លះមិនខាន។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍បានឱ្យដឹងថា រយៈពេលពីរឆ្នាំចុងក្រោយនេះកន្លែងស្នាក់នៅតូច ធំនៅខេត្តទេសចរណ៍មួយនេះបានសាងសង់តាមកម្រិតស្តង់ដាកាន់តែល្អឡើងៗ។ ជាមួយគ្នានេះ លោកថាផ្លូវរថភ្លើង គម្រោងផ្លូវល្បឿនលឿន និងសេវាដឹកជញ្ជូនភ្ញៀវទៅតាមកោះនានា ក៏ជាកត្តាធ្វើឲ្យខេត្តនេះទាក់ទាញភ្ញៀវបានកាន់តែច្រើន។
លោកបន្ថែមថា៖ « ដូចនេះទេសចរទៅដល់ណានឹងនាំលាភសំណាងទៅដល់នោះទាំងប្រាក់ចំណូលដោយផ្ទាល់ និងដោយប្រយោលដល់ពលរដ្ឋ ។ យើងអាចមើលឃើញអ្នកដែលបានប្រយោជន៍ផ្សេងទៀត គឺថាដីធ្លីគាត់ឡើងថ្លៃ រីឯអ្នកមានផ្ទះសំណាក់គាត់ជួលបានថ្លៃជាងមុន»។
ចំពោះចំណុចអវិជ្ជមានវិញលោកថាគឺបញ្ហាសន្តិសុខសណ្តាប់ធ្នាប់ ដែលត្រង់ចំណុចនេះ លោកថាអាជ្ញាធរត្រូវបង្កើនការយកចិត្តទុកដាក់បន្ថែមទៀត។
ចំណែកលោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លើកឡើងថាកំណើនភ្ញៀវទេសចរចិនបានធ្វើឲ្យម្ចាស់ផ្ទះសំណាក់ ឬផ្ទះជួលទទួលបានកម្រៃច្រើនជាងមុន និងថាបើតម្លៃចលនទ្រព្យវិញកើនឡើងប្រហែល១០ដងបើធៀបទៅនឹងពីរឆ្នាំមុន។
«កំណើនេះអ្នកទទួលបានផលសប្បាយចិត្ត ប៉ុន្តែអ្នកមិនទទួលបានផលគាត់មិនសូវសប្បាយចិត្តប៉ុន្មានទេ។អ្នកខ្លះមកកម្សាន្តខេត្តព្រះសីហនុចាត់ទុកថា ខេត្តព្រះសីហនុគឺជាកន្លែងកម្សាន្តបែបអឺរ៉ុប មានន័យថា សេវាកម្មលក្ខណៈស្ងៀមស្ងាត់ មួយៗ ដល់ពេលចិនមកយុទ្ធសាស្រ្តកាំភ្លើងធំហ្មង»។ លោកបន្ថែម។
លោក គីម ហ៊ាង លើកឡើងទៀតថាការរក្សាបាននូវវត្តមានទេសចរបរទេសចម្រុះជាតិសាសន៍គឺជារឿងល្អ សម្រាប់ខេត្តនេះ ជាជាងមានតែទេសចរមកពីប្រទេសតែមួយ។ លោកបន្តថាៈ «យើងសុខចិត្តថា ឱ្យមានទេសចរចម្រុះជាតិសាសន៍ ដែលនេះប្រៀបបាននឹងការប្រើបំពង់ទុយោច្រើន អត់ហូរមួយ មានមួយឬពីរហូរមក ប៉ុន្តែបើយើងមានតែទុយោធំមួយបង្ហូរមក លុយបានមែន…បើថ្ងៃណាមួយទុយោធំស្ទះអាចមានបញ្ហាដែរ»។
លោកបញ្ជាក់ថាអាជ្ញាធរក៏គួរពិនិត្យផងដែរចំពោះជនជាតិចិនដែលមករកស៊ីរបរបើកកន្លែងម៉ាហ្សា រត់តាក់ស៊ី ឬកន្លែងកាត់សក់ជាដើម ដោយថាបើមានដូចនេះ នឹងធ្វើឲ្យម្ចាស់ស្រុកបាត់ចំណូលមិនខាន។ អ្នកចំណាញមួយរូបទៀត គឺលោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា និងជាអគ្គនាយកក្រុមហ៊ុន លី ហួរគ្រុបបានឱ្យដឹងថា ការបោះទុនវិនិយោគលើវិស័យសំណង់នៅក្នុងខេត្តព្រះសីហនុនាប៉ុន្មានឆ្នាំចុងក្រោយនេះហាក់មានការកើនឡើងច្រើនជាពិសេសការវិនិយោគរបស់ក្រុមហ៊ុនចិន។ យ៉ាងណាមិញលោកថាមិនមែនមានតែក្រុមហ៊ុនចិននោះទេ គឺមានក្រុមសិង្ហបុរី កូរ៉េ និងក្រុមហ៊ុនក្នុងស្រុកជាច្រើនទៀត ដែលទាំងអស់នេះថាកម្ពុជាបានបើកទូលាយដល់អ្នកវិនិយោគគ្រប់ជាតិសាសន៍ទាំងអស់ឱ្យតែគោរពទៅតាមច្បាប់នៃព្រះរាជជាណាចក្រកម្ពុជា។
ដោយឡែក លោក តាំង វិចិត្រគ្រឹះស្នា ប្រធានមន្ទីរទេសចរខេត្តព្រះសីហនុបានលើកឡើងថា ក្នុងឆ្នាំ២០១៧កន្លងមកខេត្តព្រះសីហនុទទួលបានភ្ញៀវទេសចរជិត២លាននាក់ ក្នុងនោះជាង៤០ម៉ឺននាក់ គឺជាភ្ញៀវបរទេស ហើយថាខេត្តនឹងបន្តរក្សាកំណើតបែបនេះបន្តទៀតក្នុងរង្វង់ចន្លោះពី១០% ទៅ១៥%។ បើនិយាយពីភ្ញៀវជនជាតិចិនវិញលោកថាគឺបានកើនឡើងជាង ១០០%។ លោកបន្តថាធម្មតាកាលណាភ្ញៀវទេសចរកើនឡើង តម្រូវការទាំងកន្លែងស្នាក់នៅ និងផ្នែកសេវាកម្មកម្សាន្តក៏កើនឡើងដែរ។
លោកឱ្យដឹងទៀតថា អាជ្ញាធរខេត្តកំពុងកែលម្អពង្រីងផ្លូវ និងហេដ្ឋារចនាសម្ព័ន្ធបន្ថែមទៀតដូចជាគម្រោងធ្វើផែទេសចរណ៍ពីរទៀត និងការពង្រឹងគុណភាពស្តង់ដារសេវាកម្ម និងបរិស្ថាន ព្រមទាំងការបណ្តុះបណ្តាលធនធានមនុស្សជាដើម៕