ហេតុផលរំជួលចិត្ត! សំណង់ផ្ទះ ឬកុដិ បុរាណ មានអត្ថន័យសំខាន់ខ្លាំងចំពោះមនុស្សជំនាន់ក្រោយ

2018-03-19 04:13:15
ចំនួនមតិ 0 | ចំនួនចែករំលែក 0

ចន្លោះមិនឃើញ

សំណង់អគារបុរាណចាស់ៗ ដែលភាគច្រើនទ្រុឌទ្រោមទៅហើយ ទាំងនៅរាជធានីភ្នំពេញ និងតាមបណ្តាខេត្តមួយចំនួនហាក់កំពុងអន្ទងដួងចិត្តយុវជនមួយរូបឱ្យចង់ស្វែងយល់ និងចង់អភិរក្សអគារទាំងនោះ ត្បិតថា អគារចាស់ៗភាគច្រើនបានបង្កប់នូវអត្តសញ្ញាណជាតិខ្មែរ និងភាពរស់រវ៉ើកនៃរចនាប័ទ្មសំណង់នីមួយៗ។

(រូបភាពផ្តល់ឲ្យ)

យុវនិស្សិតឆ្នាំទី៥ផ្នែកសាបត្យកម្ម និងនគររោបនីយវិទ្យា(សំណង់បុរាណ)នៃសាលកវិទ្យាល័យភូមិន្ទវិចិត្រសិល្បៈ លើកឡើងថាការរក្សាទុកនូវសំណង់អគារដែលមានអាយុរាប់ទសវត្សរ៍នៅកម្ពុជាគឺជាផ្នែកមួយរក្សានូវអត្តសញ្ញាណជាតិខ្មែរ និងប្រវត្តិនៃការរស់នៅរបស់មនុស្សនាពេលនោះ។

លោក ម៉ៅ សុខចំរើន បន្តថាសំណង់លំនៅដ្ឋាន កុដិលោក និងព្រះវិហារជាដើម មានអាយុកាលចន្លោះពី ៥០ ឆ្នាំទៅជាង ១០០ឆ្នាំគឺមានតំលៃមិនអាចកាត់ថ្លៃបាន។ លោកឲ្យដឹងទៀតថា ក្រៅពីបង្កប់នូវអត្តសញ្ញាណជាតិខ្មែរ និងភាពរស់រវ៉ើក សំណង់ទាំងនោះក៏បានឆ្លុះបញ្ចាំងពីការរស់នៅរបស់ប្រជាពលរដ្ឋនាសម័យកាលនោះផងដែរ តាមរយៈផ្ទាំងគំនូរនៅតាមព្រះវិហារ និងសាលាឆាន់ជាដើម។

(លោក ម៉ៅ សុខចំរើន និស្សិតឆ្នាំទី៥ផ្នែកសាបត្យកម្ម និងនគររោបនីយវិទ្យា(សំណង់បុរាណ)នៃសាលកវិទ្យាល័យភូមិន្ទវិចិត្រសិល្បៈ)

លោកបន្ថែមថា៖ «ពេលចូលរៀននៅសាកលវិទ្យាល័យ កាន់តែធ្វើឱ្យខ្ញុំចាប់ចិត្តទៅលើសំណង់អគារចាស់ៗទាំងអស់នោះ ព្រោះអគារនីមួយបានបង្កប់នូវអត្ថន័យ និងអត្ថរស់របស់សំណង់នីមួយៗ ដែលធ្វើឱ្យយើងកាន់តែជ្រួលជ្រើមចង់ស្វែងយល់ថែមទៀត ក្នុងនោះមានដូចជា ទី១ គ្រឿងបង្គុំស្ថាបត្យកម្ម ទី២ សិល្បៈនៃការតុបតែងលម្អនៃស្ថាបត្យកម្ម បើសិនជាយើងនិយាយពីស្ថាបត្យកម្មទៅលើទីសក្ការៈមានដូចជា រូបនាគ និងបុស្សក ជាដើម»។

លោកបន្តទៀតថា៖ «សម្រាប់ខ្ញុំសំណង់អគារបុរាណទាំងអស់ហ្នឹងប្រៀបបានទៅនឹងមាស ឬប្រាក់អញ្ចឹង បើសិនជាយើងធ្វើឱ្យបាត់បង់អ្វីមួយពីគ្រឿងបង្គុំនៃដំបូល និងសំណង់ទាំងអស់ហ្នឹងនឹងធ្វើឱ្យយើងក៏ដូចជាអ្នកជំនាន់ក្រោយមិនបានយល់នូវអ្វីដែលជាអត្តសញ្ញាណជាតិរបស់យើងតទៅទៀតទេ។ ធម្មតាតែយើងបាត់អត្តសញ្ញាណហើយ យើងប្រហែលជាត្រូវការពេលវេលាយូរបន្តិចក្នុងការសិក្សារកអ្វីដែលជាអត្តសញ្ញាណយើងបានងើបមកវិញ។ ប៉ុន្តែបើសំណង់ទាំងអស់នៅ នឹងត្រូវបានថែរក្សាយ៉ាងខ្ជាប់ខ្ជួននោះគឺប្រជាពលរដ្ឋទាំងអស់គ្នាអាចងាយស្វែងយល់ពីសំណង់ទាំងអស់ហ្នឹងបានងាយស្រួល និងមានចិត្តកាន់តែស្រលាញ់អ្វីជារបស់ខ្មែរយើង»។

(រូបភាពផ្តល់ឲ្យ)

បើតាមលោក ម៉ៅ សុខចំរើន សំណង់អគារបុរាណក៏បានបង្ហាញពីអត្តសញ្ញាណរបស់ម្ចាស់សំណង់នៅតាមតំបន់ផងដែរ។ លោកបញ្ជាក់ថា៖ «ឧទាហរណ៍សាមញ្ញាមួយ បើយើងរក្សាទុកនូវសំណង់អគារចាស់ៗ យើងនឹងអាចដឹងម៉ូដផ្ទះ និងស្តាយរបស់អ្នកបាត់ដំបង ស្តាយអ្នកទន្លេ និងអ្នកកណ្តាលខុសគ្នាយ៉ាងណាខ្លះកាលពី១០០ឆ្នាំមុន ឬ ៦០ ឆ្នាំទៅ ៧០ ឆ្នាំមុន ប៉ុន្តែបើយើងវាយកម្ទេចអស់មានអីទុកគ្រាន់កូនចៅជំនាន់ក្រោយបានឃើញ»។

យោងតាមរបាយការណ៍របស់ក្រសួងវប្បធម៌ និងវិចិត្រសិល្បៈមានវត្តបុរាណជាង ៤០០ ទូទាំងប្រទេសត្រូវធ្វើការអភិរក្ស។ ក្នុងនោះមានដូចជាវត្តមហាលាភ និងវត្តិចិនដំដែកជាដើម ដែលត្រូវបានជួសជុល និងអភិរក្ស ដោយរក្សានូវរចនាប័ទ្មដ៏ល្អកាលពីជាង១០០ឆ្នាំ។ វត្តមហាលាភមានទីតាំងស្ថិតនៅក្នុងឃុំ មហាលាភ ស្រុកកោះសុទិន ខេត្តកំពង់ចាម កសាងឡើងនៅឆ្នាំ១៨៨០។ វត្តនេះ ត្រូវបានចាត់ទុកជាវត្តចាស់ជាងគេទូទាំងព្រះរាជជាណាចក្រកម្ពុជា។ ចំណែកព្រះវិហារវត្តចិនដំដែកបានកសាងឡើងនៅព.ស ២៥៣០ត្រូវនឹងឆ្នាំ ១៨៨៧ដែលកាលបរិច្ឆេទបញ្ជាក់ការសាងសងនៅលើសិលាចារឹកនៅផ្នែកខាងកើតនៃវិហារ។ វត្តនេះស្ថិតនៅប៉ែកខាងជើងរមណីដ្ឋានវត្តភ្នំ៕

អត្ថបទដោយ៖ សុផល