ពីមុនជាកន្លែងគេបោះបង់ចោល តែឥលូវក្លាយជាតំបន់ទេសចរណ៍ដ៏ល្បីមួយនៅអាស៊ី

2018-03-19 07:17:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពីមុនជាកន្លែងគេបោះបង់ចោល តែឥលូវក្លាយជាតំបន់កម្សាន្តដ៏លេចធ្លោមួយនៅអាស៊ី Sunway Lagoon គឺជាតំបន់កម្សាន្តដ៏ល្បីមួយក្នុងប្រទេសម៉ាឡេស៊ី ដែលមានទីតាំងនៅទីប្រជុំជន Bandar Sunway ទីក្រុង Subang Jaya រដ្ឋ Selangor មានចម្ងាយប្រមាណ ២០គីឡូម៉ែត្រពីរដ្ឋធានីកូឡាឡាំពួរ។ ស្ថិតនៅលើផ្ទៃដីសរុបជាង ៣៥ហិកតា Sunway Lagoon បច្ចុប្បន្នមិនត្រឹមតែជាសួនកម្សាន្ត (Theme Park) ដ៏ល្បី ប៉ុន្តែក្នុងនោះក៏មានភាពទាក់ទាញជាច្រើនទៀតរួមមានសួនសត្វ Scream Park (កន្លែងលងបន្លាច) ហើយនៅជាប់ៗនោះដែរក៏មានសណ្ឋាគារផ្កាយបួន និងផ្កាយប្រាំ ផ្សារទំនើប រួមទាំងសាលារៀន និងមន្ទីរពេទ្យដែលស្ថិតក្រោមការគ្រប់គ្រងរបស់ក្រុមហ៊ុន Sunway Group តែមួយ។ បើតាមការឲ្យដឹងពីអ្នកគ្រប់គ្រងមួយរូបរបស់ Sunway Lagoon ដំបូងឡើងនៅតំបន់នោះមិនមែនជាទីប្រជុំជននោះឡើយ ហើយនៅបរិវេណរបស់ Sunway Lagoon បច្ចុប្បន្ននេះ កាលពីមុនគឺជារណ្ដៅរ៉ែដ៏ធំដែលត្រូវបានគេបោះបង់។ រហូតដល់អំឡុងទសវត្សឆ្នាំ១៩៨០ លោក Jeffrey Cheah ជាស្ថាបនិកក្រុមហ៊ុន Sunway Group ក៏បានគិតនិងចាប់ផ្ដើមអភិវឌ្ឍតំបន់ហើយនៅឆ្នាំ១៩៩២ តំបន់កម្សាន្ត Sunway Lagoon ដែលជាសួនកម្សាន្តដំបូងគេនៅទីនោះក៏បើកសម្ពោធជាផ្លូវការ។ ក្រោយមកសមិទ្ធផលផ្សេងៗទៀតក៏បន្តលេចខ្លួនឡើងជាបន្តបន្ទាប់។ ដោយសារភាពល្បីល្បាញរបស់ខ្លួន Sunway Lagoon បានទាក់ទាញភ្ញៀវទេសចរស្ទើរតែគ្រប់ទិសទីលើពិភពលោក និងធ្លាប់បានទទួលពានរង្វាន់រួមមាន Asia’s Best Attraction 2009, Asian Attraction Expo 2010 និង Asia’s Best Water Park Award 2011 ជាដើម។ ចង់ដឹងថា Sunway Lagoon មានភាពទាក់ទាញយ៉ាងណានោះ សូមទស្សនារូបភាព និងវីដេអូខាងក្រោមដូចតទៅ៖ រូបភាពអ្នកសារព័ត៌មានកម្ពុជា-ឡាវ នៅ Sunway Lagoon ក្នុងដំណើរទស្សនកិច្ចទៅប្រទេសម៉ាឡេស៊ី ដែលរៀបចំឡើងដោយក្រុមប្រឹក្សាផ្សព្វផ្សាយទេសចរណ៍ម៉ាឡេស៊ី (Tourism Malaysia) សហការជាមួយក្រុមហ៊ុនអាកាសចរណ៍ Air Asia។

សម្រាប់ប្រិយមិត្តដែលចង់ធ្វើដំណើរទៅប្រទេសម៉ាឡេស៊ី ក្នុងតម្លៃសមរម្យ និងគុណភាពល្អ អាចជ្រើសរើសការហោះហើរតាមរយៈក្រុមហ៊ុន AirAsia ដែលមានជើងហោះហើរត្រង់ទៅម៉ាឡេស៊ី, ភ្នំពេញ-កូឡាឡាំពួរ (៣ដងជារៀងរាល់ថ្ងៃ), សៀមរាប-កូឡាឡាំពួរ (២ដងជារៀងរាល់ថ្ងៃ), ព្រះសីហនុ-កូឡាឡាំពួរ (៤ដងក្នុងមួយសប្តាហ៍) ៕