ល្អខ្លាំង! អ្នកធំមួយក្រុមនៅភ្នំពេញ មានដល់ឡានទំនើប តែជិះកង់ទៅធ្វើការរាល់ថ្ងៃ
- 2018-03-19 08:42:04
- ចំនួនមតិ 0 | ចំនួនចែករំលែក 0
ល្អខ្លាំង! អ្នកធំមួយក្រុមនៅភ្នំពេញ មានដល់ឡានទំនើប តែជិះកង់ទៅធ្វើការរាល់ថ្ងៃ
ចន្លោះមិនឃើញ
ក្រោមហេតុផលសុខភាពល្អ កាត់បន្ថយសម្ភារៈនិយម និង ការសន្សំពេលវេលា ស្របពេលដែល ការកកស្ទះចរាចរណ៍ក្លាយទៅជាការឈឺក្បាលហាលថ្ងៃសម្រាប់អ្នកភ្នំពេញ បញ្ញវន្តខ្មែរមួយក្រុម បានជ្រើសរើសការ ជិះកង់ជាមធ្យោបាយធ្វើដំណើររាល់ថ្ងៃ។ ជាពិសេសសកម្មភាព ជិះកង់ប្រចាំថ្ងៃរបស់ក្រុមបញ្ញវន្តនេះ មិនថាផ្លូវ ជិតឬ ឆ្ងាយ កំពុងទទួលបានការចាប់អារម្មណ៍ពីសំណាក់អ្នកប្រើប្រាស់Facebookនៅកម្ពុជាទៀតផង។
ក្នុងចំណោមក្រុមអ្នកជិះកង់ទៅធ្វើការនេះ លោកបណ្ឌិត ង៉ែត ជូ ទីប្រឹក្សាជាន់ខ្ពស់ផ្នែក សេដ្ឋកិច្ច និងអភិវឌ្ឍន៍នៅ ក្រុមហ៊ុនពិគ្រោះយោបល់ Emerging Markets Consulting (EMC)បានប្រាប់ថា ជាអ្នកសេដ្ឋកិច្ចស្រាប់លោក ត្រូវគិតគូរពីរឿងចំណេញ និងខាត។ ដូច្នេះលោកសម្រេចជ្រើសរើស កង់ជាមធ្យោបាយធ្វើដំណើរ។ លោកបន្តទៀតថា លោកជិះកង់រាល់ថ្ងៃទៅបង្រៀនសិស្សនៅសកលវិទ្យាល័យ ទៅកន្លែងធ្វើការឬចូលរួមកម្មវិធីសប្បុរសធម៌នានាតាមខេត្ត។
ចំណែកលោក ប៊ូ សារឿន មន្ត្រីព័ត៌មាននៃធនាគារពិភពលោក ក៏ជិះកង់ទៅធ្វើការងារជាប្រចាំក្នុងចម្ងាយផ្លូវទៅមក ប្រមាណ៣០គីទ្បូម៉ែត្រ។ ដោយសារវ័យកាន់តែជ្រេ និងសន្សំសំចៃបរិស្ថានផងលោកបានសម្រេចយកការជិះកង់ជិត២ឆ្នាំមកហើយ។ លោកថា ដំបូងលោកត្រូវបានគេរើសអើង ព្រោះការងារធំដុំដែរហេតុអីបែរជាជិះកង់មកធ្វើការ? តែលោកមិនខ្វល់ឬខឹងទេនៅតែបន្តជិះរហូតដល់សព្វថ្ងៃ ហើយមានអ្នកផ្សេងចូលរួមដែរ សុទ្ធសឹងតែជាអ្នកមានចំណេះដឹងខ្ពស់។