អ្នកសិល្បៈ៦គូទស្សនិកជនចង់ឲ្យក្លាយជាប្ដីប្រពន្ធពិតៗ
- 2018-03-20 00:30:00
- ចំនួនមតិ 0 | ចំនួនចែករំលែក 0
អ្នកសិល្បៈ៦គូទស្សនិកជនចង់ឲ្យក្លាយជាប្ដីប្រពន្ធពិតៗ
ចន្លោះមិនឃើញ
តារាចម្រៀង និងសម្ដែងប្រុសស្រី៦គូដែលអ្នកគាំទ្រចង់ឃើញពួកគេចូលរោងការជាមួយគ្នានៅថ្ងៃអនាគត ក្រោយពីចាប់ដៃគូច្រៀង សម្ដែងរួមគ្នាជាបន្តបន្ទាប់។
១/ស្ទើរតែគ្រប់កម្មវិធីប្រគំតន្ត្រីធំៗដែល ឱក សុគន្ធកញ្ញា ចាប់ដៃច្រៀងរួមគ្នាជាមួយ ឆន សុវណ្ណរាជ មិនថានៅរាជធានីភ្នំពេញ ឬនៅខេត្តនោះទេ អ្នកទាំងពីរតែងតែបង្ហាញភាពល្ហែមល្ហែមជាមួយគ្នាជានិច្ចនៅលើឆាកតន្ត្រីធ្វើឲ្យអ្នកគាំទ្រដែលទស្សនានៅទីនោះផ្ទាល់ស្រែកហ៊ោសឹងតែបាក់ឆាកទៅហើយ។ ទង្វើបែបនេះទើបធ្វើហ្វេនៗទាំងក្នុង និងក្រៅសិល្បៈចង់ឃើញពួកគេទាំងពីរចូលរោងការជាមួយគ្នា ប៉ុន្តែគួរឲ្យស្ដាយទំនាក់ទំនងមួយនេះមិនឈានចូលដល់ថ្ងៃក្រាបផ្ទឹមនោះទេ ព្រោះមានសារព័ត៌មានជាច្រើនបានចុះផ្សាយថា ឱក សុគន្ធកញ្ញា បានភ្ជាប់ពាក្យជាមួយប្អូនប្រុសថៅកែហង្សមាសរួចរាល់ហើយរង់ចាំតែថ្ងៃចូលរោងការតែប៉ុណ្ណោះ។
២/បើនិយាយពីរឿងរ៉ាវ ទេព បូព្រឹក្ស និង ងួន ចាន់ដេវីដ វិញមិនខុសពីរៀមច្បងសិល្បៈ១គូខាងលើប៉ុន្មានឡើយ ទំនាក់ទំនងអ្នកទាំងពីរកំពុងតែទទួលបានការចាប់អារម្មណ៍យ៉ាងខ្លាំងពីសំណាក់មហាជន ព្រមទាំងចង់ឲ្យពួកគេក្លាយជាគូស្នេហ៍ពិតទៀតផង ក្រោយពីចាប់ដៃគូច្រៀងជាមួយគ្នាជិត ២ ឆ្នាំមកនេះ។
៣/បន្ទាប់ពីសម្ដែងខ្សែភាពយន្តភាគជាច្រើនរឿងជាមួយគ្នាជាបន្តបន្ទាប់រួចមក គៀត សុវណ្ណឡាង និង លឹម ជាឡាយ ត្រូវបានអ្នកគាំទ្រចាត់ទុកពួកគេគឺជាគូស្នេហ៍ដ៏សក្ដិសមបំផុតក្នុងរង្វង់សិល្បៈ សឹងតែគ្រប់រឿងដែលអ្នកទាំងពីសម្ដែងរួមគ្នា មើលទៅស៊ីចង្វាក់គ្នាបានល្អណាស់ពីមួយវគ្គទៅមួយវគ្គ។ ចំណុចទាំងអស់នេះហើយទើបហ្វេនៗចង់ឃើញតារាសម្ដែងមួយគូនេះក្លាយជាប្ដីប្រពន្ធ និងគ្នាទៅថ្ងៃខាងមុខ។
៤/ ត្រឡប់មកកាន់ស្រីស្អាត ស៊ិន យូប៊ីន និង ខាត់ វៃហាំង វិញមិនខុសពី ជាឡាយ និង សុវណ្ណឡាង ប៉ុន្មានដែរ រឿងដែលអ្នកទាំងពីរសម្ដែងរួមគ្នាទទួលបានការគាំទ្រយ៉ាងខ្លាំងពីទស្សនិកជន ព្រោះត្រង់ឈុតឆាកស្នេហាពួកគេលេងប្រទាក់ក្រឡាគ្នាបានល្អណាស់មើលទៅដូចរឿងរ៉ាវពិតៗអ៊ីចឹង។ ហេតុដូច្នេះហើយទើបទស្សនិកជនចង់ឲ្យអ្នកទាំងពីរៀបការជាមួយគ្នានៅថ្ងៃណាមួយ។
៥/ ងាកមកចាប់អារម្មណ៍អ្នកមេម៉ាយក្ដៅស្រួយ សុខ សោម៉ាវត្តី និងកីឡាកបាល់ទាត់រូបសង្ហា លី វ៉ាហេទ វិញប៉ះគ្នាបានតែ១រឿងសោះក៏លេចឮព័ត៌មានថាពួកគេកំពុងតែមានទំនាក់ទំនងស្នេហាក្រៅឆាកជាមួយគ្នា។ ចំពោះការបែកធ្លាយព័ត៌មានស្នេហារវាងកំលោះសង្ហា និងអ្នកមេម៉ាយមួយភ្លើងមិនបានធ្វើឲ្យអ្នកគាំទ្រខឹងសម្បារអ្វីឡើយ ផ្ទុយទៅវិញពួកគេចង់ឃើញអ្នកទាំងពីរចូលរោងការជាមួយគ្នាខ្លាំងណាស់។
៦/ ដោយសារតែប្រើពាក្យសម្ដីឯងៗដូចប្ដីប្រពន្ធរវាង តាប៊ុយ និង សុភ័ក្រ្ដ កុសុម៉ា ក្នុងកម្មវិធី"ពេញចិត្តឬអត់" បានធ្វើឲ្យមហាជនមួយចំនួនដែលចូលចិត្តតាមដានរឿងរ៉ាវអ្នកទាំងពីរ កំពុងតែគិតថាពិធីករ និងពិធីការិនីមួយគូនេះកំពុងតែមានទំនាក់ទំនងស្នេហាជាមួយគ្នាថែមទៀតផង ដល់ថ្នាក់ចង់ឃើញពួកគេចូលរោងការជាមួយគ្នាក្នុងពេលឆាប់ៗ។
ទោះបីជាទស្សនិកជនស្រឡាញ់ និងគាំទ្រចង់ឃើញអ្នកសិល្បៈ៦ គូនេះចូលរោងការជាមួយគ្នានៅថ្ងៃអនាគតក្ដី ប៉ុន្តែកន្លងមកមានមួយចំនួនបានចេញមុខបកស្រាយថាទំនាក់ទំនងរបស់ពួកគេ គ្មានអ្វីលើសពីមិត្តភ័ក្ដិឡើយដូច្នេះសូមកុំយល់ច្រឡំ។ ចំណែកមួយចំនួនទៀតក៏មិនទាន់បានចេញមុខបកស្រាយនៅឡើយទេ៕