ឡូយ Alex You អ្នកចាំទីក្រោន ខ្មែរកាត់ថៃកើតនៅព្រៃឈរ ទៅនៅបារាំងតាំងពីអាយុ១ខួប ចេះនិយាយ៤ភាសា
- 2018-03-20 02:42:38
- ចំនួនមតិ 0 | ចំនួនចែករំលែក 0
ឡូយ Alex You អ្នកចាំទីក្រោន ខ្មែរកាត់ថៃកើតនៅព្រៃឈរ ទៅនៅបារាំងតាំងពីអាយុ១ខួប ចេះនិយាយ៤ភាសា
ចន្លោះមិនឃើញ
Alexandre You ជាអ្នកចាំទីថ្មីរបស់ក្លឹបភ្នំពេញក្រោន ដែលទើបចុះកុងត្រារយៈពេល១ឆ្នាំកាលពីរដូវកាលដោះដូរកីឡាករកន្លងទៅ ជំនួសតំណែង កែវ សុខសិលា។
អ្នកចាំទីញញឹមស្រស់រូបនេះ កំពុងបង្ហាញសមត្ថភាពលេចធ្លោក្នុងលីគកំពូលកម្ពុជា ដោយសារតែ៤ប្រកួតមកនេះ មិនទាន់មានតារាជើងស៊ុតណាអាចទម្លាយសំណាញ់ទីរបស់គេបានឡើយ។ បើនិយាយពីប្រវត្តិរបស់កីឡាករ Alex នេះវិញ កើតនៅថ្ងៃទី៨ ខែមីនា ឆ្នាំ១៩៩៤ នៅភូមិត្រពាំងត្នោត ឃុំសូរ្យសែន ស្រុកព្រៃឈរ ខេត្តកំពង់ចាម។
កូនគេមានម្ដាយជាជនជាតិខ្មែរ និងឪពុកជាជនជាតិថៃ។ កើតបាន១ឆ្នាំ Alex បានទៅរស់នៅប្រទេសបារាំង ហើយធ្លាប់មកលេងនៅខ្មែរវិញបាន ៣ទៅ៤ដងប៉ុណ្ណោះ មុនពេលសម្រេចចិត្តលេងឱ្យក្លឹបភ្នំពេញក្រោននេះ។ រូបគេបានបញ្ជាក់ថាមុនមកលេងនៅទីនេះ ខ្លួនមិនសូវបានដឹងច្រើនពីវិស័យបាល់ទាត់នៅខ្មែរនោះទេ ប៉ុន្តែដោយសារតែបានមកឃើញកីឡដ្ឋានរបស់ក្រោន មានស្ដង់ដារ អាចទទួលយកបាន ទើបសម្រេចចិត្តសាកល្បងអាជីពនៅលីគកំពូល១រដូវកាលតែម្ដង។
និយាយពីប្រវត្តិលេងបាល់នេះវិញ Alex You ធ្លាប់ជាជាប់ជាសមាជិករបស់ក្រុម U14 ជម្រើសជាតិបារាំង និងបានបង្ហាញខ្លួនបាន៤ដងផងដែរ នៅគ្រានោះ។ ស្ថិតក្នុងវ័យកុមារ នៅទឹកដីសំបូរលុយចាយ គេបានចូលលេងឱ្យក្រុម Toulouse ចាប់ពីឆ្នាំ១៩៩៩ រហូតដល់ឆ្នាំ២០១០។ ឈានដល់អាយុ១៨ឆ្នាំ បានផ្ទេរទៅលេងឱ្យក្លឹប US Colomiers FC ដែលជាសមាជិកលីគទី៤ របស់បារាំងពីឆ្នាំ២០១១ ដល់ឆ្នាំ២០១២។ ក្រោយមកទៀតក៏បានទៅលេងឱ្យក្រុមToulouse Fontaines FC (សមាជិកលីគទី៤បារាំង) ក្នុងរយៈពេល ១ឆ្នាំ (ឆ្នាំ២០១៣)។
អ្វីដែលកាន់តែធ្វើឱ្យអ្នកគាំទ្រក្រោន រំភើបនិងពេញចិត្តចំពោះ Alex ទៀតនោះ គឺរូបគេមានស្នាមញញឹមជាប់ជានិច្ច ហើយអាចនិយាយបាន៤ភាសា គឺខ្មែរ ថៃ បារាំង និងអេស្ប៉ាញ។ ចំណែកឯការចូលលេងឱ្យក្រោនមួយរយៈនេះ រូបគេដឹងពីសមត្ថភាពក្រុម ហើយរំពឹងថាឆ្នាំនេះអាចជួយក្រោនលើកពានលីគកំពូលកម្ពុជានេះបាន៕