ស្រណោះណាស់ តារាកំប្លែង វីតាមីនសេ ពោលពាក្យប៉ុន្មានម៉ាត់ ខណៈជំងឺកាន់តែដុនដាប
- 2018-03-20 04:30:00
- ចំនួនមតិ 0 | ចំនួនចែករំលែក 0
ស្រណោះណាស់ តារាកំប្លែង វីតាមីនសេ ពោលពាក្យប៉ុន្មានម៉ាត់ ខណៈជំងឺកាន់តែដុនដាប
ចន្លោះមិនឃើញ
ស្ថានភាពជំងឺលោក មាស សាមឿន ហៅនាយ វីតាមីនសេ កាន់តែធ្លាក់ដុនដាបឡើងពីមួយថ្ងៃទៅមួយថ្ងៃ មិនបានប្រសើរអ្វីឡើយ ជាហេតុធ្វើឲ្យតារាកំប្លែងរូបនេះពោលពាក្យយ៉ាងសង្វេគប៉ុន្មានម៉ាត់ទៅកាន់ប្រពន្ធកូន និងចៅៗថា៖" ខ្ញុំចង់នៅរស់ មិនទាន់ចង់ទៅណាទេ ហើយខ្ញុំចង់មើលថែប្រពន្ធកូនៗ និងចៅៗឲ្យមានសេចក្ដីសុខ"។
ពាក្យសម្ដីប៉ុន្មានម៉ាត់នេះបានធ្វើឲ្យក្រុមគ្រួសារនាយ វីតាមីនសេ ទាំងមូលមានអារម្មណ៍ក្ដុកក្ដួល និងស្រណោះដល់នាយយ៉ាងខ្លាំងតែមិនដឹងធ្វើយ៉ាងណា ព្រោះក្រុមគ្រួសារបានព្យាយាមអស់លទ្ធភាពទៅហើយ ក្នុងការស្វែងរកមន្ទីរពេទ្យល្អៗ ទាំងក្នុង និងក្រៅប្រទេសដើម្បីព្យាបាលជំងឺ។ នេះបើអ្នកនាង ប៉េងប៉ោង រៀបរាប់។
អ្នកនាងថា៖" ឥឡូវនេះជំងឺលោកប៉ា កាន់តែទ្រុឌទ្រោមជាងមុន ក្រោយពីមេរោគដុំសាច់កាន់តែរីករាលដាល ហើយខាងគ្រូពេទ្យទាំងថៃ និងកម្ពុជាសុទ្ធតែផ្ដល់ចម្លើយដូចគ្នា ថាជំងឺនេះកាន់តែវិវឌ្ឍទៅមុខ ទើបខ្ញុំនិងក្រុមគ្រួសារទុកគាត់ព្យាបាលនៅក្នុងស្រុកវិញ ព្រោះគាត់មិនអាចធ្វើដំណើរចុះឡើងទៅព្យាបាលនៅថៃបានទៀតទេ"។
អ្នកនាងបន្ថែមថា ខណៈនេះលោកឪពុករបស់ខ្លួនមិនអាចអង្គុយបានដូចមុនទេ គឺត្រូវសម្រាកនៅក្នុងមន្ទីរពេទ្យជាប្រចាំ ហើយដាក់អុកស៊ីហ្សែន ទើបអ្នកនាង និងក្រុមគ្រួសារមានការព្រួយបារម្ភ ក៏និមន្តព្រះសង្ឃមកសូត្រមន្តធ្វើសង្ឃទានជូនទៅតាមទំនៀមទម្លាប់ព្រះពុទ្ធសាសនា ៕