កុមារកម្ពុជារូបនេះ បង្ហាញសមត្ថភាពរហូតគ្រូមកពីអេស្ប៉ាញជាប់ចិត្ត នាំទៅហាត់នៅ Barcelona

2018-03-20 09:11:34
ចំនួនមតិ 0 | ចំនួនចែករំលែក 0

ចន្លោះមិនឃើញ

កុមារាឈ្មោះ Kasidef Vasunan បានទៅដល់ទឹកដីអេស្ប៉ាញក្លឹប FC Barcelona ព្រមទាំងបាន នឹងកំពុងធ្វើការហ្វឹកហាត់បាល់ទាត់នៅទីនោះគិតចាប់ពីថ្ងៃទី១៩ ដល់ថ្ងៃទី២៣ ខែមីនា ឆ្នាំ២០១៨។

គ្រួសាររបស់អ្នកស្រី ពុធ ធីតា (រូបថត៖ ផ្ដល់ឲ្យ)

បើតាមការបញ្ជាក់របស់អ្នកស្រី ពុធ ធីតា ម្ដាយរបស់ Kasidef Vasunan បានឲ្យដឹងថា អ្នកស្រី និងស្វាមីលោក Ratchakith Vasunan (ជនជាតិថៃ) កំពុងស្ថិតនៅទឹកដីអេស្ប៉ាញជាមួយកូន។ បច្ចុប្បន្នគ្រួសាររបស់អ្នកស្រីមានទីលំនៅ នៅភ្នំពេញ ហើយកូនប្រុសកំពុងរៀននៅថ្នាក់ទី៥ នៃសាលាឯកជនមួយនៅភ្នំពេញ។

ការទទួលបានឱកាសទៅដល់ទឹកដីនៃប្រទេសខ្លាំងខាងបាល់ទាត់នេះគឺជាលើកទី១ របស់កូនប្រុសអ្នកស្រី ក្រោយពេលចូលខ្លួនទៅរៀននៅសាលាបាល់ទាត់ និងបានទៅហ្វឹកហាត់នៅសាលាមួយនៅសិង្ហបុរីដែលត្រូវបានក្រុមការងារជ្រើសរើសឲ្យទៅហ្វឹកហាត់រយៈពេលមួយសប្តាហ៍នៅ Barcelona ប្រទេសអេស្ប៉ាញ។ នេះគ្រាន់តែជាឱកាសទៅហ្វឹកហាត់ធម្មតាប៉ុណ្ណោះគឺមិនជាប់ពាក់ព័ន្ធនឹងយុវជនរបស់ក្លឹប Barcelona ឬចូលរួមកម្មវិធីអ្វីមួយឡើយ។

សាលានៅសិង្ហបុរីដែលគ្រួសារអ្នកស្រីនាំកូនទៅរៀនបាល់ទាត់នោះ ជារៀងរាល់ឆ្នាំតែងផ្ដល់ឱកាសឲ្យកុមារពីររូបទៅហ្វឹកហាត់នៅអេស្ប៉ាញ តាមរយៈការជ្រើសរើសរបស់គ្រូមកពីអេស្ប៉ាញផ្ទាល់។ ក្រុមគ្រួសារអ្នកស្រី នឹងមកដល់ទឹកកម្ពុជាវិញនាថ្ងៃទី២៤ ខែមីនា ឆ្នាំ២០១៨ ក្រោយពេលជូនកូនបំពេញភារកិច្ចហ្វឹកហាត់នៅទឹកដីអេស្ប៉ាញរួចរាល់៕