សិល្បករខ្មែរម្នាក់ ច្នៃរូប «គោព្រៃ» ពីគ្រឿងម៉ូតូឡានចាស់ៗ ប្រកាសលក់ក្នុងតម្លៃដល់ទៅ២ម៉ឺនដុល្លារ

2018-03-21 06:39:09
ចំនួនមតិ 0 | ចំនួនចែករំលែក 0

ចន្លោះមិនឃើញ

រូប "គោព្រៃ" ច្នៃពីគ្រឿងម៉ូតូ-ឡានចាស់ៗ ដែលជាស្នាដៃសិល្បករខ្មែរម្នាក់មកពីខេត្តកណ្ដាល ប្រកាសលក់ ក្នុងតម្លៃ ៨០លានរៀល គិតជាដុល្លារប្រមាណជា២ម៉ឺនដុល្លារ។

រូបគោព្រៃច្នៃចេញពីគ្រឿងម៉ូតូ ឡានចាស់ៗរបស់សិល្បករវ័យ៤០ឆ្នាំម្នាក់នៅស្រុកអង្គស្នួល ខេត្តកណ្ដាល ប្រកាសលក់តម្លៃ ២ម៉ឺនដុល្លារ។ សិល្បករ អ៊ូ វណ្ណឌី បានលើកឡើងក្នុងថ្ងៃសន្និសីទសារព័ត៌មាននៅស្ថានទូតបារាំងកាលពីថ្ងៃ ១៥ មីនា ឆ្នាំ២០១៨ ថា រូបគោព្រៃ ដែលជាស្នាដៃទី៣ ដែលយកតាំងនៅទីនេះ លោកគ្រោងប្រកាសលក់ក្នុងតម្លៃ២ម៉ឺនដុល្លារ។

"រូបគោព្រៃដែលច្នៃចេញពីគ្រឿងក្នុងម៉ូត ឡាននេះលោកចំណាយថវិកា ពេលវេលាច្រើនណាស់សម្រាប់ធ្វើវាឡើង អីចឹងបើមានគេចង់បានទិញយកលោកនឹងលក់" លោក វណ្ណឌី បន្តថា រូបគោព្រៃនេះលោកធ្វើទាំងថ្ងៃទាំងយប់សឹងតែគ្មានពេលសម្រាក រហូតដល់ប្រពន្ធខឹងមិននិយាយក៏មាន។

រូបគោព្រៃនេះច្នៃចេញពីគ្រឿងម៉ូតូ និងផ្នែកតូចនៃគ្រឿងឡាន មានដូចជា ច្រវាក់ មីញ៉ុង ស៊ីផ្លេ គ្រឿងក្នុងម៉ូតូ-ឡាន ជាច្រើនគ្រឿងផ្សាភ្ជាប់គ្នាដែលចំណាយពេលក្នុងការកែច្នៃប្រមាណជា ៣ខែ។ស្នាដៃសិល្បៈដ៏ល្អវិចិត្រមួយនេះ មានមានកម្ពស់ ២,៦ម៉ែត្រគិតពីបាតជើងរហូតដល់ចុងស្នែង មានបណ្ដោយ ៣ម៉ែត្រ និងទទឹង ១,២ម៉ែត្រ។

លោក អ៊ូ វណ្ណឌី

លោក អ៊ូ វណ្ណឌី មានដើមកំណើតនៅខេត្តបាត់ដំបង សព្វថ្ងៃរស់នៅ ភូមិព្រៃគោ ឃុំលំហាច ស្រុកអង្គស្នួល ខេត្តកណ្ដាល ជាមួយគ្រួសារមានកូន២នាក់ ស្រី១ ប្រុស១។ ប្រវត្តិការសិក្សា លោករៀននៅសាលាមធ្យមសិក្សាវិចិត្រសិល្បៈផ្នែកគំនូរផ្សាយ ឆ្នាំ២០០៥ លោកបញ្ចប់ថ្នាក់បរិញ្ញាបត្រនៅសកលវិទ្យាល័យភូមិន្ទវិចិត្រសិល្បៈផ្នែកចម្លាក់ទំនើប។ អំលុងពេលសិក្សាថ្នាក់បរិញ្ញាបត្រលោកត្រូវបានអង្គការក្រៅរដ្ឋាភិបាលមួយជ្រើសរើសលោកឲ្យធ្វើការក្រៅម៉ោងក្រៅក្នុងគម្រោងមួយឈ្មោះ "សិល្បៈសន្តិភាពនៅកម្ពុជា" រយៈពេល៧ឆ្នាំ។ សព្វថ្ងៃក្រៅពីការងារសិល្បៈលោកក៏ជាគ្រូបង្រៀនផ្នែកគំនូរនៅវិទ្យាស្ថានជាតិអប់រំផងដែរ៕

អត្ថបទ៖ លន ហ្សាឌីណា