កម្ពុជា និងពិភពលោក នឹងធ្វើរឿងមួយសម្រាប់ភពផែនដីនៅចុងសប្តាហ៍នេះ
- 2018-03-21 06:34:41
- ចំនួនមតិ 0 | ចំនួនចែករំលែក 0
កម្ពុជា និងពិភពលោក នឹងធ្វើរឿងមួយសម្រាប់ភពផែនដីនៅចុងសប្តាហ៍នេះ
ចន្លោះមិនឃើញ
កម្ពុជានឹងរៀបចំឲ្យមានការចូលរួមពីប្រជាពលរដ្ឋ ស្ថាប័នរដ្ឋ និងឯកជនបិទភ្លើងរយៈពេលមួយម៉ោងនៅយប់នៅថ្ងៃទី២៤ ខែមីនា ឆ្នាំ២០១៨ ក្នុងគោលបំណងទាញចំណាប់អារម្មណ៍របស់ប្រជាពលរដ្ឋឲ្យបានយល់ដឹងកាន់តែច្រើន និងចូលរួមសង្គ្រោះភពផែនដីពីការឡើងកម្ដៅ។
ក្រសួងបរិស្ថាន រួមជាមួយអង្គការWWF ប្រចាំកម្ពុជា និងដៃគូមួយចំនួនទៀតនឹងរៀបចំកម្មវិធីមួយម៉ោងសម្រាប់ភពផែនដីនៅខាងមុខទីស្តីការក្រសួងបរិស្ថាននៅថ្ងៃទី២៤ ខែមីនា ឆ្នាំ២០១៨ ចាប់ពីម៉ោង៥:៣០នាទីល្ងាច រហូតដល់ម៉ោង៨:៣០នាទីយប់ ហើយការបិទភ្លើងនឹងចាប់ផ្តើមពីម៉ោង៨:៣០នាទីដល់ម៉ោង៩:៣០នាទីយប់។
ឯកឧត្តម ឃុន ចាន់ដារ៉ា អនុរដ្ឋលេខាធិការក្រសួងបរិស្ថានថ្លែងក្នុងសន្និសីទសារព័ត៌មាននៅព្រឹកនេះ ថាការបិទភ្លើងនេះធ្វើឡើងដោយការស្ម័គ្រចិត្តរបស់ប្រជាពលរដ្ឋទាំងអស់គ្នានៅក្នុងប្រទេសកម្ពុជា។ ឯកឧត្តមបន្ថែមថា ស្ថាប័នរដ្ឋ ភោជនីយដ្ឋាន សណ្ឋាគារ និងស្ថាបប័នឯកជនមួយចំនួនទៀតបានស្ម័គ្រចិត្តចូលរួមបិទភ្លើងរយៈពេលមួយម៉ោងក្នុងទិវានោះ។
ឯឧត្តមបន្ថែមថា៖ «ពាក់ព័ន្ធ នឹងការបិទភ្លើងនេះ លើកទឹកចិត្តឲ្យមានអ្នកចូលរួមស្ម័គ្រចិត្តបិទភ្លើងមួយម៉ោង...អំពាវនាវឲ្យមានការចូលរួម មិនមែនជាកាតព្វកិច្ចទេ...ចង់ឲ្យមានការចូលរួមឲ្យបានច្រើន...(ប៉ុន្តែ)មិនអាចសន្និដ្ឋានថាបានប៉ុន្មានភាគរយនោះទេ»។
បើតាមលោក សេង ទៀក នាយកអង្គការ WWF ប្រចាំកម្ពុជា ការចូលរួមក្នុងទិវានេះគឺជានិមិត្តរូបពីការខិតខំរបស់រាជរដ្ឋាភិបាល វិស័យឯកជន និងអង្គការក្រៅរដ្ឋាភិបាលក្នុងការជួយគាំពារបរិស្ថាន និងភពផែនដី។
លោកឲ្យដឹងថាមានប្រជាពលរដ្ឋជាង១០០លាននាក់នៅក្នុងទីក្រុងធំៗមិនតិចជាង៧ ០០០ របស់ប្រទេស១៨០ នឹងចូលរួមទិវាមួយម៉ោងសម្រាប់ភពផែនដីនេះដូចគ្នា។ លោករំឭកថាទិវានេះកើតឡើងដំបូងនៅប្រទេសអូស្ត្រាលីនៅឆ្នាំ២០០៧ ក្នុងន័យពញ្ញាក់អារម្មណ៍មនុស្សជាតិឲ្យចូលរួមគាំពារបរិស្ថាន និងរួមគ្នាធ្វើឲ្យមាននិរន្តរភាពនៃអនាគតភពផែនដី។
សម្រាប់កម្ពុជាវិញលោកថា អង្គការWWF ប្រចាំកម្ពុជាបានចាប់ផ្តើមធ្វើឡើងនៅឆ្នាំ២០១២ ហើយក្រសួងបរិស្ថានបានចូលរួមទិវានេះចាប់ពីឆ្នាំ២០១៦មក។
សម្រាប់ឆ្នាំ២០១៨នេះទិវាមួយម៉ោងសម្រាប់ភពផែនដីធ្វើឡើងក្រោមប្រធានបទ «ផ្សាភ្ជាប់ទំនាក់ទំនងជាមួយផែនដី»។ គោលបំណងសំខាន់គឺទាញចំណាប់អារម្មណ៍ឲ្យប្រជាពលរដ្ឋ ស្ថាប័នរដ្ឋ និងឯកជនចូលរួមប្រើប្រាស់ថាមពលដោយសន្សំសំចៃ ដូចជាបិទកុងតាក់ភ្លើងពេលចាកចេញពីបន្ទប់ ឬពេលមិនមានមនុស្សនៅជាដើម។ ចំណុចមួយទៀតគឺការប្រើប្រាស់ឧបករណ៍អេឡិចត្រូនិចដែលមិនប៉ះពាល់បរិស្ថានដូចជាអំពូលភ្លើងអិលអីឌី ដែលស៊ីភ្លើងតិចជាដើម។ ក្រៅពីនេះគឺការជំរុញឲ្យប្រើប្រាស់ថាមពលកើតឡើងវិញដូចជាថាមពលព្រះអាទិត្យ និងជីវឧស្ម័នជាដើម៕