អោក សុវណ្ណារ៉ា ហាត់តេក្វាន់ដូ ១០ឆ្នាំហើយ នៅតែមិនទាន់ស្គាល់រសជាតិមេដាយ
- 2018-03-21 07:07:35
- ចំនួនមតិ 0 | ចំនួនចែករំលែក 0
អោក សុវណ្ណារ៉ា ហាត់តេក្វាន់ដូ ១០ឆ្នាំហើយ នៅតែមិនទាន់ស្គាល់រសជាតិមេដាយ
ចន្លោះមិនឃើញ
កីឡាករ អោក សុវណ្ណារ៉ា ហ្វឹកហាត់តេក្វាន់ដូ WTF អស់រយៈពេល១០ឆ្នាំមកហើយ មិនទាន់ស្គាល់រសជាតិមេដាយលំដាប់អន្តរជាតិមួយនោះទេ ប៉ុន្តែមិនបោះបង់ការតស៊ូឡើយ សង្ឃឹមពេលណាមួយសម្រេចក្ដីស្រមៃ។
អោក សុវណ្ណារ៉ា បានឲ្យដឹងថា បើគិតមកដល់ឆ្នាំ ២០១៨ នេះ ចូលហ្វឹកហាត់កីឡាតេក្វាន់ដូ WTF ប្រហែល ១០ឆ្នាំ មកហើយ ប៉ុន្តែមិនទាន់បានឈ្នះមេដាយលំដាប់អន្តរជាតិមួយគ្រឿងឡើយ ពោលបានត្រឹមមេដាយថ្នាក់ជាតិប៉ុណ្ណោះ។ កីឡាកររូបនេះធ្លាប់ទៅចូលរួមប្រកួតស៊ីហ្គេម ឆ្នាំ ២០១៥ នៅ សិង្ហបុរីដែរ តែមិនជោគជ័យ។
កីឡាករជម្រើសជាតិកម្ពុជាខាងលើបន្ថែមថា បើទោះជាចំណាយពេលវេលាយូរដូចនេះ ចំណាយថវិកាផ្ទាល់ខ្លួន និងកម្លាំងកាយ កម្លាំងចិត្តច្រើនក្ដី តែមិនទាន់បានលទ្ធផលសមប្រកបដូចកីឡាករដទៃ ក៏មិនបោះបង់ការតស៊ូឡើយ។ រូបគេនៅតែបន្តខំប្រឹង ហើយជឿជាក់ថានៅថ្ងៃណាមួយ នឹងទទួលជោគជ័យ ឬឈ្នះមេដាយអន្តរជាតិជូនកម្ពុជា និងក្រុមគ្រួសារ។
ជម្រើសជាតិវ័យ ២៥ឆ្នាំ បន្តថា ការឈ្នះមេដាយលំដាប់អន្តរជាតិដូចជា ស៊ីហ្គេម អាស៊ានហ្គេម ឬហ្គេមដទៃទៀត ជាក្ដីស្រមៃក្នុងជីវិតរបស់គេ ដូច្នេះហើយទើបនៅតែបន្តតស៊ូហ្វឹកហាត់ ដើម្បីប្រទេសជាតិ ដើម្បីក្រុមគ្រួសារ និងដើម្បីខ្លួនឯងផងដែរ។
អោក សុវណ្ណារ៉ា ជាកីឡាករជម្រើសជាតិ តេក្វាន់ដូ WTF កម្ពុជា។ កាលពីយប់ថ្ងៃចន្ទ ទី១៩ ខែមីនា ឆ្នាំ ២០១៨ កីឡាកររូបនេះ និងមិត្តរួមក្រុម ៣នាក់ ផ្សេងទៀត ចេញដំណើរទៅហ្វឹកហាតវិញ្ញាសាថ្មី នៅប្រទេសកូរ៉េខាងត្បូង ១សប្ដាហ៍ ដើម្បីតេស្តសមត្ថភាពត្រៀមចូលរួមប្រកួតកីឡាអាស៊ានហ្គេម នៅ ឥណ្ឌូណេស៊ី ពេលខាងមុខនេះ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
