ក្រសួងបង្ហើបពីការបង្កើនចំនួនសាលាគំរូ និងការបង្កើតសាលាជំនាន់ថ្មី

2018-03-21 08:59:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងអប់រំយុវជន និងកីឡាបានជ្រើសរើសសាលារៀនចំនួន២០០ បន្ថែមដើម្បីបង្កើតជាសាលារៀនគំរូ។ នេះបើតាមប្រសាសន៍ឯកឧត្តម ហង់ ជួន ណារ៉ុន រដ្ឋមន្រ្តីក្រសួងអប់រំយុវជន និងកីឡាក្នុងឱកាសសន្និបាតបូកសរុបការងារអប់រំ យុវជន និងកីឡា ឆ្នាំសិក្សា២០១៦-២០១៧ និងទិសដៅឆ្នាំ២០១៧-២០១៨ កាលពីម្សិលមិញ។

(ឯកឧត្តម ហង់ ជួន ណារ៉ុន ថ្លែងក្នុងសន្និបាតបូកសរុបការងារអប់រំកាលពីម្សិលមិញ)

ដោយមិនបានបញ្ចាក់ចំនួនសាលាគំរូដែលមានស្រាប់ ឯកឧត្តម រដ្ឋមន្ត្រី បានលើកឡើងថាមុននឹងជ្រើសរើសជាសាលារៀនគំរូ ក្រសួងអប់រំ បានបញ្ចូនមន្រ្តីជំនាញចុះទៅពិនិត្យ និងវាយតំលៃផ្ទាល់ ពីការគ្រប់គ្រងក្នុងសាលារៀន ការបង្រៀន វិន័យសិស្ស ការស្លៀកពាក់ បរិស្ថាននៅក្នុងសាលា បញ្ហាបង្គន់អនាម័យ ចំណតកង់ម៉ូតូ ថ្នាក់រៀនមានរបៀបរៀបរយល្អ និងការចូលរួម គាំទ្រពីសហគមន៍។ របាយការណ៍ក្រសួងអប់រំ នៅទូទាំងប្រទេសកម្ពុជា មានសាលាមត្តេយ្យសិក្សា និងសាលារៀន ចំណេះទូទៅទាំងសាធារណៈ និងឯកជនសរុបចំនួន ១៤ ១៨៩។ ក្នុងនោះមានសាលាមត្តេយ្យសិក្សាចំនួន៤៦៣២កន្លែង សាលាបឋមសិក្សា ៧៦២១ អនុវិទ្យាល័យ ១៣០៣ និងវិទ្យាល័យចំនួន៦៣៣កន្លែង។ជាមួយគ្នានេះ មតេ្តយ្យសិក្សាសហគមន៍មាន២៩៥៥កន្លែង។

ប្រហាក់ប្រហែលគ្នានឹងសាលារៀនគំរូដែរ ក្រសួងអប់រំក៏បានបង្កើតសាលាជំនាន់ថ្មីប្រមាណជា១០កន្លែងបន្ថែមទៀត ដើម្បីសាកល្បងកំណែទម្រង់ការអប់រំទូលំទូលាយ។ នេះបើតាមប្រសាសន៍ឯកឧត្តម ហង់ ជួន ណារ៉ុន។ ឯកឧត្តម បញ្ជាក់ថា សាលារៀនជំនាន់ថ្មី គឺជាសាលារៀនដែលបង្កើតឡើងសម្រាប់បណ្ដុះបណ្ដាលចំណេះដឹងដល់យុវជនជំនាន់ថ្មី កម្រិតស្តង់ដារខ្ពស់ កម្មវិធីសិក្សាពិសេសខុសពីសាលារដ្ឋធម្មតា និងផ្ដល់អាហារូបករណ៍ដល់សិស្សឆ្នើម។

ឯកឧត្តម បន្តថា សិស្សានុសិស្សនៃសាលារៀនជំនាន់ថ្មី ត្រូវរៀនច្រើនម៉ោងជាងសិស្សសាលារដ្ឋទូទៅ រួមបញ្ជូលទាំងការធ្វើពិសោធន៍ ការធ្វើ កិច្ចការស្រាវជ្រាវនានាជាក្រុម ក្នុងម៉ោងសិក្សាជាដើម។ គោលបំណងដើម្បីបណ្ដុះបណ្ដាលចំណេះដឹង និងបំណិនប្រសព្វរបស់ សិស្សឲ្យកាន់តែរីកចម្រើន និងមានប្រសិទ្ធភាពខ្ពស់។ សាលាជំនាន់ថ្មី សម្រាប់រាជធានីភ្នំពេញគឺមានទីតាំងស្ថិតនៅជាមួយនឹងវិទ្យាល័យព្រះស៊ីវត្ថិ និងមួយកន្លែងទៀតស្ថិតក្នុងខេត្តកំពង់ចាម។ នេះបើតាមការលើកឡើងរបស់ឯកឧត្តម ហង់ ជួន ណារ៉ុន ដដែល៕

អត្ថបទដោយ៖ សុផល