ទាក់ទងគ្នាជិត១ឆ្នាំ អេដា ទម្លាយរឿងខ្ទេច ជាមួយគូស្នេហ៍កាត់បរទេស

2018-03-21 09:44:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ភ្ជាប់ចំណងស្នេហ៍បានរយៈជិតមួយឆ្នាំ តារាចម្រៀង អេដា បានទម្លាយខ្ទេចខ្ទីពីរឿងរ៉ាវទាក់ទងនឹងជីវិតជាមួយគូស្នេហ៍របស់ខ្លួន។

ផ្ដើមជួបគ្នាដំបូងក្នុងការប្រគំតន្ត្រីរបស់កម្មវិធី STEAM Cambodia អេដា ប្រាប់ថាខ្លួន និងគូស្នេហ៍ដែលជាស្ថាបនិករបស់អង្គការនេះផ្ទាល់ បានចាប់ផ្ដើមរាប់អានគ្នាតាំងពីពេលនោះមក បើសរុបមកដល់ឥឡូវនេះ គឺរយៈពេលមួយឆ្នាំហើយ តែសម្រាប់ទំនាក់ទំនងស្នេហា អ្នកទាំង២ទើបតែជំពាក់ចិត្តលើគ្នាបានត្រឹម៨ខែប៉ុណ្ណោះ។

ម្ចាស់បទ "កាលពីព្រេងនាយ" និយាយថា មូលហេតុដែលនាំឲ្យនាងបាក់ចិត្តស្រឡាញ់លោក Allen Tan ព្រោះបុរសកូនកាត់ខ្មែរ-អាមេរិកនេះ ជាមនុស្សស្មោះត្រង់ ចេះយកចិត្តទុកដាក់ និងតែងគាំទ្រ ជួយមើលខុសត្រូវនាងលើការងារផ្សេងៗដោយមិនថាចេញទៅណា មកណា គឺលោកតែងជួយមើលខុសត្រូវជានិច្ច។

បើរំលឹកពីអនុស្សាវរីយ៍ដែលដក់ជាប់ក្នុងចិត្តវិញ អេដា ញញឹមខ្ជឹបពោលថា៖ "គឺនៅពេលដែលយើងធ្វើដំណើរកម្សាន្តទៅអឺរុបជាមួយគ្នា។ ខ្ញុំជាមនុស្សម្នាក់ដែលមិនពូកែនៅប្រទេសត្រជាក់ទេ កាលណោះនៅអង់គ្លេសគាត់បានដោះអាវធំមកគ្របពីលើខ្ញុំ ទាំងខ្លួនឯងមានតែអាវស្ដើងមួយនៅជាប់ខ្លួន ហើយសីតុណ្ហភាពពេលនោះចុះដល់៦-៧អង្សាឯណោះ តែគាត់នៅទ្រាំ"។

តារាស្រីដដែលរម្លឹកថា សព្វថ្ងៃអ្នកទាំង២រស់នៅចុះសម្រុងល្អណាស់ ត្បិតខាងប្រុសជាមនុស្សដែលធំធាត់លើទឹកដីអាមេរិកមែន តែលោកនៅរក្សាអត្តចរិតសុភាពបុរស នឹងយល់ពីវប្បធម៌ខ្មែរបានច្រើន។

សម្រាប់គម្រោងរៀបការអ្នកទាំង២គិតថាអាចនឹង៣ឆ្នាំទៅមុខទៀត ព្រោះភាគីសងខាងសុទ្ធតែជាប់ភារកិច្ចរវល់ដូចគ្នា។

ចំពោះពាក្យចចាមអារ៉ាមដែលអ្នកទាំង២រស់នៅក្រោមដំបូលផ្ទះតែមួយ អេដា សុំច្រានចោល ដោយអះអាងថា នាងនិងប្អូនៗគ្រាន់តែឧស្សាហ៍ទៅចម្អិនអាហារញ៉ាំជុំគ្នារៀងរាល់ចុងសប្ដាហ៍នៅផ្ទះខាងប្រុសប៉ុណ្ណោះ៕