គូកក្រើកបំផុត ម្ចាស់ខ្សែក្រវាត់ទាំងពីរប៉ះគ្នាថ្ងៃសៅរ៍នេះ

2018-03-22 02:43:36
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពូលអ្នកប្រដាល់ក្នុងទ្រុងដែលជាម្ចាស់ខ្សែក្រវាត់ពិភពលោកទាំងពីរគឺកីឡាករប្រេស៊ីល Bibiano Fernandes និងកីឡាករវៀតណាមកាត់អូស្ត្រាលី Martin Nguyen ត្រូវប្រឈមមុខគ្នានាថ្ងៃសៅរ៍ ទី២៤ ខែមីនាសប្តាហ៍នេះហើយក្នុងព្រឹត្តិការណ៍សំខាន់ One: Iron Will ក្នុងទីក្រុងបាំងកកប្រទេសថៃ។

មុនការប្រកួតដ៏សំខាន់ដែលនឹងទទួលបានការចាប់អារម្មណ៍ខ្លាំងពីអ្នកគាំទ្រស្ទើរទូទាំងទ្វីបអាស៊ី និងនៅតំបន់អឺរ៉ុបផងនោះ ជើងខ្លាំងទាំងពីរបានបញ្ចេញចំណាប់អារម្មណ៍ និងជំនឿជឿជាក់រៀងៗខ្លួន។

កីឡាករ Martin Nguyen ពេលឈ្នះខ្សែក្រវាត់ទី២

អ្នកលេងកណ្តាប់ដៃ Martin Nguyen បាននិយាយថា ៖«ដៃគូ Bibianoគឺជាអ្នកលេងគុនចម្រុះពិតប្រាកដ និងជាកីឡាករដ៏ល្អបំផុតម្នាក់។ នេះជាកិត្តិយសណាស់ដែលខ្ញុំមានឱកាសវ៉ៃជាមួយគាត់។ ខ្ញុំមានអារម្មណ៍ថា នេះជាឱកាសស្ទើរគ្មានពីរដែលខ្ញុំត្រូវបង្ហាញសមត្ថភាពក្នុងទ្រុងនៅចំពោះមុខអ្នកគាំទ្ររាប់លាននាក់»។

«រាល់ការប្រកួតរបស់ខ្ញុំតែងតែបញ្ចប់បានលឿន ហើយលើកនេះខ្ញុំគ្រោងបញ្ចប់ឲ្យលឿនបំផុត។ ខ្ញុំដឹងថា Bibiano ជាដៃគូដ៏អស្ចារ្យដែលខ្ញុំត្រូវប្រឈម និងជម្នះឲ្យបាន»។

កីឡាករ Martin Nguyen

អ្នកលេងក្បាច់ក្រោម Bibiano Fernandes បាននិយាយថា ៖«ពេលនេះខ្ញុំមិនមែនវ៉ៃដើម្បីខ្សែក្រវាត់ទៀតទេ គឺវ៉ៃដើម្បីជម្នះនឹងឧបសគ្គ។ ខ្ញុំចង់ប្រឈមឧបសគ្គ និងបង្ហាញជំនាញរបស់ខ្ញុំ។ អ្នករាល់គ្នានិយាយពីភាពខ្លាំងរបស់ Martin Nguyen ដូច្នេះគាត់ដល់ពេលស្គាល់ខ្ញុំហើយ»។

«ខ្ញុំដឹងថា Martin ខ្លាំងកណ្តាប់ដៃស្តាំ និងបញ្ឆោតដៃឆ្វេងល្អ ដូច្នេះខ្ញុំរីករាយជួបគាត់ណាស់។ ខ្ញុំបានសិក្សាពីគាត់យ៉ាងច្បាស់ និងយល់ពីចលនាបំឡាស់ទីរបស់គាត់។ អ្នករាល់គ្នានិយាយថា គាត់អាចផ្តួលខ្ញុំ តែខ្ញុំថា មិនអាចដូចគេនិយាយនោះទេ»។

កីឡាករ Bibiano ពេលការពារខ្សែក្រវាត់បានសម្រេច

ជើងខ្លាំងវ័យក្មេង Martin Nguyen មានប្រវត្តិប្រកួត១១ដង ឈ្នះ១០ និងចាញ់ម្តង និងជាម្ចាស់ខ្សែក្រវាត់ពិភពលោក២គ្រឿងគឺកម្រិត Featherweight និងកម្រិត Lightweight World Champion។ ចំណែកកីឡាករប្រេស៊ីលមានប្រវត្តិប្រកួត២៤ដង ឈ្នះ២១ និងចាញ់៣ដង។ រូបគេជាម្ចាស់ខ្សែក្រវាត់ពិភពលោក ONE Bantamweight World Champion Bibiano យូរហើយ និងការពារបានសម្រេចជាច្រើន៕