កំពូលកីឡាករនៅអឺរ៉ុប៤នាក់ ធ្លាប់មកកម្ពុជា សរសើរប្រជាជនខ្មែរមិនដាច់ពីមាត់

2018-03-22 02:50:11
ចំនួនមតិ 0 | ចំនួនចែករំលែក 0

ចន្លោះមិនឃើញ

Ruud van Nistelrooy គឺជាកីឡាករមកពីតំបន់អឺរ៉ុបទី៥ ដែលនឹងមកដល់កម្ពុជានៅដើមខែក្រោយនេះ ក្នុងដំណើរទេសចរណ៍ពានរង្វាន់ក្របខណ្ឌ UEFA Champions League ២០១៨។ ចុះ៤នាក់កន្លងទៅដែលសុទ្ធតែជាកីឡាករ World Class ដែរនោះ មាននរណាខ្លះទៅ?

ដើម្បីជាការរំលឹកដល់អតីតកាលបន្ដិច Sabay នឹងបង្ហាញមុខនិងឈ្មោះអតីតកំពូលកីឡាករទាំង៤នាក់ ធ្លាប់មកកម្ពុជា ហើយសុទ្ធតែសរសើរដល់ប្រជាជន ក៏ដូចជាអ្នកគាំទ្រខ្មែរ ថារួសរាយរាក់ទាក់ខ្លាំងណាស់។

១ Fabio Cannavaro (2012 2013)

Cannavaro ជាអតីតខ្សែការពារឆ្នើមរបស់ជម្រើសជាតិអ៊ីតាលី និងធ្លាប់លេងឱ្យក្លឹបធំៗជាច្រើននៅតំបន់អឺរ៉ុប។ កីឡាករដែលជួយឱ្យអ៊ីតាលីលើកពាន World Cup ២០០៦ រូបនេះ ធ្លាប់មកកម្ពុជា២ដង ក្នុងឆ្នាំ២០១២ និង២០១៣។ ដោយ២០១២ មកតាមរយៈក្លឹបភ្នំពេញក្រោន និង២០១៣ មកតាមរយៈកម្មវិធី Tiger Street ។ បច្ចុប្បន្ននេះ បុរសវ័យ៤៤ឆ្នាំកំពុងប្រកបអាជីពជាគ្រូបង្វឹករបស់ក្លឹប Guangzhou Evergrande លីគប្រទេសចិន។

២ Deco

លោក Anderson Luís de Souza ឬគេនិយមហៅថា Deco ធ្លាប់មកកម្ពុជានៅឆ្នាំ២០១៤ ដោយគ្រានោះ រូបគេយកតាមរយៈ Tiger Street ដែរ។ លើសពីនេះទៅទៀត នៅគ្រានោះ បុរសកើតនៅប្រេស៊ីល តែលេងឱ្យជម្រើសជាតិព័រទុយហ្គាល់រូបនេះ បានពេញចិត្តចំពោះការលេងរបស់ គួច ដានី ថែមទៀតផង។ អំឡុងពេលនៅកម្ពុជា បុរសវ័យ៤០ឆ្នាំក៏បានសរសើរចំពោះប្រជាជនខ្មែរផងដែរ។

៣ David beckham

បុរសវ័យ៤០ឆ្នាំខាងលើ បានមកប្រទេសកម្ពុជាកាលពីឆ្នាំ២០១៥ តាមអង្គការ UNICEF ដើម្បីលើកស្ទួយវិស័យការពារកុមារដែលរងគ្រោះដោយការរំលោភបំពានគ្រប់រូបភាព។ វីរបុរសរបស់បិសាចក្រហមម្នាក់នេះ បានទៅទស្សនាអង្គរវត្តផ្ទាល់ ហើយរូបគេសរសើរចំពោះប្រាង្គប្រាសាទដ៏ល្អឥតខ្ចោះនេះ ក៏ដូចជាវប្បធម៌នៅកម្ពុជា។

៤ Ryan Giggs

មិត្តអ្នកអានប្រហែលជាមិនទាន់ភ្លេចទេ ចំពោះវត្តមានរបស់ Giggs មកតាមរយៈ Tiger Street ។ Giggs ថារូបលោកបានមកកម្ពុជាម្ដងមកហើយជាមួយមិត្តភ័ក្ដិរបស់ខ្លួន ប៉ុន្តែលើកដំបូងនោះស្នាក់នៅជាយដែនបានត្រឹមប៉ុន្មានម៉ោងប៉ុណ្ណោះ។ មុនចាកចេញទៅពីកម្ពុជា អតីតកីឡាករដែលឈ្នះពានជាច្រើនជាមួយ Man Utd អរគុណដល់អ្នកគាំទ្រកម្ពុជា ដែលបានទទួលរូបលោកយ៉ាងរាក់ទាក់បំផុត។

អត្ថបទ៖ មុន្នីរម្យ