មនុស្សកុំឲ្យល្អពេកអត់កើតទេ គួរប្រកាន់យក៦យ៉ាងនេះ មិនងាយអ្នកណាបោកបាន

2018-03-22 09:27:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ធ្វើជាមនុស្សល្អរស់នៅក្នុងសង្គម គឺជារឿងសំខាន់ ហើយក៏មានមនុស្សជាច្រើនចង់រាប់អានមនុស្សល្អ។ ប៉ុន្តែកាលណាល្អខ្លាំងពេកទៅជាល្ងង់ច្រើនជួបរឿងខកចិត្តទៅវិញទេ។ ការលើកឡើងនេះមិនមែនឲ្យមនុស្សធ្វើអាក្រក់ទេ តែគួរប្រកាន់យកដូចខាងក្រោមនេះ គឺស្ថិតនៅកណ្ដាលមិនល្អពេក ហើយក៏មិនអាក្រក់ដែរ។

១. វ័យឆ្លាតក្នុងការសេពគប់មនុស្សកុំឲ្យគេបោកទទេៗ

ប្រសិនបើត្រង់ធ្លុងពេក យើងមិនដឹងថា តើអ្នកណាជាមនុស្សបែបណានោះទេ។ ត្រូវដឹងថា មនុស្សខ្លះចូលមកជីវិតយើងតែក្នុងរយៈពេលខ្លី ដោយសារសម្លឹងឃើញប្រយោជន៍អ្វីមួយ រួចហើយក៏ចេញទៅវិញពេលអស់ប្រយោជន៍សម្រាប់គេ។ ជាមនុស្សឆ្លាតត្រូវរៀនមើលថា តើអ្នកណាពិតជាចង់បង្កើតមិត្តភាពដោយពិតប្រាកដ ហើយអ្នកណាគ្រាន់តែចង់បោកប្រើ?

មិនចង់ខកចិត្តលើនរណាម្នាក់ សូមកុំរាប់អានអស់ពីពោះរហូតងងឹតភ្នែក លែងដឹងអ្នកណាល្អ អ្នកណាអាក្រក់។ កុំព្រោះតែចង់បានមិត្តភាព ទោះដឹងគេបោកហើយនៅតែរាប់អាននោះ មិនខ្វះទេនៅមានមនុស្សមនុស្សល្អជាច្រើនទៀតនៅលើផែនដីនេះ។

រូបតំណាង

**២. បញ្ហាណាដែលជួយបានក៏ជួយ តែមិនមែនយកមកដាក់ខ្លួនទាំងអស់ទេ**

ពិតមែនហើយជាមិត្តភក្ដិល្អ តែងជួយគ្នាទៅវិញទៅមករាល់ពេលមានបញ្ហា តែក៏មិនមែនដល់ថ្នាក់យកបញ្ហាអ្នកដទៃមកដាក់ខ្លួនគ្រប់រឿងទេ។ បើមួយថ្ងៃៗឈឺក្បាលតែរឿងគេ វាក្លាយជារឿងដ៏ល្ងង់ខ្លៅទៅវិញទេ ត្រឹមតែផ្ដល់កម្លាំងចិត្ត លើកទឹកចិត្តក៏ចាត់ទុកថា មិត្តល្អបានហើយ មិនមែនដល់ថ្នាក់បាយមិននឹកទឹកមិនស្រេកឡើយ។

៣. ប្រកាន់ចិត្តថាធ្វើតែត្រឹមត្រូវមិនប៉ះពាល់អ្នកណា គេចូលចិត្ត ឬមិនចូលចិត្តជារឿងគេ

ហេតុតែចង់ឲ្យអ្នកដទៃពេញចិត្ត មួយថ្ងៃៗចេះតែគិតថា តិចធ្វើចឹងមិនល្អ តិចធ្វើបែបនេះគេអត់ចូលចិត្ត និងមានចំណុចជាច្រើនទៀតដែលគិតតែខ្វល់ខ្វាយក្នុងចិត្តឥតល្ហែ។ តែសួរខ្លួនឯងវិញថា តើនេះជាជីវិតយើង ឬជីវិតអ្នកណា? ហេតុអ្វីក៏ត្រូវរស់ព្រោះអ្នកដទៃ? មនុស្សយើងបើថ្នាក់នេះពេក គឺលែងជាខ្លួនឯងហើយ គ្រាន់តែធ្វើតែអំពើល្អ ធ្វើតែរឿងត្រឹមត្រូវ ហើយប្រាកដថាមិនប៉ះពាល់អ្នកណាទៅបានហើយ។ អ្នកណាចូលចិត្ត ឬមិនចូលចិត្តជាសិទ្ធរបស់គេទេ។

រូបតំណាង

៤. គិតតែរឿងធ្វើម៉េចឲ្យខ្លួនឯងរីកចម្រើនកុំទៅរវល់ស្ដាប់រឿងរ៉ាវពីអ្នកដទៃច្រើនពេក

ជារឿងដ៏អត់ប្រយោជន៍បំផុត ដែលយកពេលវេលារបស់ខ្លួនទៅខ្វល់អំពល់ទុក្ខរឿងអ្នកដទៃ។ ចង់អ្នកយ៉ាងម៉េច ធ្វើអី បានអី ជារឿងរបស់គេ កុំទៅចចេចចចូចរឿងគេ ព្រោះហូបបាយរៀងខ្លួន ផ្ទះរឿងខ្លួន ហើយក៏មិនគួរយកខ្លួនបៀតជាមួយមនុស្សចូលចិត្តនិយាយដើមគេ។ អ្វីដែលគួរធ្វើគឺផ្ដោតលើរឿងធ្វើការ រកស៊ី និងគិតយ៉ាងម៉េចទើបរីកចម្រើនទៅមុខ ទើបជារឿងមានប្រយោជន៍។

៥. កុំសូវទម្លាយរឿងសំខាន់ៗផ្ទាល់ខ្លួនប្រាប់គេពេក

មនុស្សយើងតែកាលណាស្មោះអស់ពីពោះហើយ រឿងរ៉ាវតូចធំ អាថ៌កំបាំងអ្វីក៏ប្រាប់គេអស់ ព្រោះគិតថាគេស្មោះនឹងខ្លួន។ ប៉ុន្តែត្រូវចាំម្យ៉ាងថា គ្មានអ្នកណាមួយស្មោះអស់ពីចិត្តដូចឪពុកម្ដាយយើងឡើយ ស្រួលមិនស្រួលគេយកទៅហែកហួរខ្ទេច ឬលួចធ្វើស៊ីពីក្រោយខ្នងក៏មាន នៅពេលគេដឹងថា យើងកំពុងមានគម្រោងការអ្វី ឬចង់រកស៊ីអ្វី។

៦. មិនគួរចិត្តទន់ជាមួយមនុស្សធ្វើដដែលៗរាប់ភ្លេច

ស្លូតពេក ទៅជាល្ងង់ ដឹងថាគេកុហក គេក្បត់ ក៏នៅតែលើកលែងទោសគ្រាន់តែគេសុំទោសមួយម៉ាត់។ ការលើកលែងទោសក៏មានកម្រិតដែរ ព្រោះមនុស្សខ្លះធ្វើខុសដោយមិនបានតាំងចិត្តមែន តែមនុស្សខ្លះខុសហើយ ខុសទៀតមិនមែនមិនបានតាំងចិត្តទេ តែមានចេតនាស្រស់ៗតែម្ដង។ ដូច្នេះហើយដោះលែងគេទៅ ឲ្យគេទៅរកជំពូកមនុស្សដូចគ្នាចុះ មិនបាច់ស្ដាយស្រណោះអ្វីពេកទេ។

សូមបញ្ជាក់ថា ៦ចំណុចខាងលើនេះ គឺ Sabay បានសាកសួរអ្នកមានបទពិសោធន៍ជីវិតច្រើន ចំនួន៥រូបក្នុងនោះមានទាំងសាស្ត្រាចារ្យ និងបុគ្គលិកក្នុងក្រុមហ៊ុនឯកជនមួយចំនួន បានលើកឡើងស្រដៀងគ្នាដូចការរៀបរាប់ខាងលើនេះ៕

ចុចអាន៖

អត្ថបទ៖ វឌ្ឍនៈ