ប្លែក! ទូច ស្រីលក្ខណ៍ គ្រោងបើកហាងលក់ផលិតផលច្នៃពីសារុង

2018-04-05 02:54:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីទទួលបានការគាំទ្រខ្លាំងលើការយកសារ៉ុងមកកែច្នៃធ្វើសម្លៀកបំពាក់ អ្នកនាង ទូច ស្រីលក្ខណ៍ ពេលនេះ បែកគំនិតចង់បើកហាងលក់ផលិតផលមួយនេះ។

ម្ចាស់បទ «សុភមង្គលមិនមែនស្ថិតលើលុយតែមួយមុខ» បានប្រាប់ Sabay ថា ក្រោយពីនាង ច្នៃ សារ៉ុង ជាសម្លៀកបំពាក់ ស្រោមខ្នើយ ទទួលបានការចាប់អារម្មណ៍ពីមហាជនខ្លាំង អ្នកនាងក៏មានបំណងបើកហាងតូចមួយដើម្បីលក់ផលិតផលនេះសម្រាប់ការផ្គត់ផ្គង់តម្រូវការក្នុងស្រុកផងដែរ។ តារាចម្រៀង និងតារាសម្ដែងរូបនេះបន្តថាការចង់បើកហាងនេះក៏ដោយដោយសារនាងមានបំណងលើកស្ទួយជីវភាពបងប្អូនអាជីវករ និងអ្នកផលិតខ្មែរ ណាមួយផលិតផលមួយនេះពេលផលិតជាសម្លៀកបំពាក់ទៅវាស្អាត ហើយមានតម្លៃថោក ដែលអាចកាត់បន្ថយការចំណាយបានមួយចំណែកធំទៀតផង។

តារាស្រីកូនមួយរូបនេះ មានគម្រោងច្នៃសារ៉ុងទៅជាផលិតផលប្រើប្រាស់ផ្សេងៗ ទៀតដូចជា ស្រោមខ្នើយ កម្រាលតុ ស្រោមពូកជាដើម។ ចំណែកការច្នៃជាសម្លៀកបំពាក់ គឺច្នៃលាយជាមួយនឹងហូលផាមួង ដើម្បីឲ្យវាកាន់តែស្អាតនិងមានតម្លៃ»។

អ្នកនាងបន្តថា ការច្នៃសារ៉ុង រួមនិងហូលផាមួងនេះ ក៏ដើម្បីស្ទួយផលិតផលក្នុងស្រុក ចំពោះកាលបរិច្ឆេទនៃការបើកហាងពេលណា នាងមិនទាន់កំណត់ឲ្យច្បាស់ទេ គ្រាន់តែបញ្ជាក់ក្នុងពេលឆាប់ៗខាងមុខនេះ។ ចំណែកទីផ្សារអន្តរជាតិនាងចាំមើលដំណើរការក្នុងស្រុកសិន៕