វីដេអូស្ប៉ត HTC ត្រូវបិទមិនឲ្យផ្សាយ ព្រោះបំផ្លើសពេក

2018-04-05 02:38:58
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាធរស្តង់ដារនៃការផ្សាយពាណិជ្ជកម្ម (ASA) របស់ចក្រភពអង់គ្លេស បានហាមឃាត់ការផ្សាយវីដេអូស្ប៉តមួយដែលបង្ហាញពីអត្តពលិកកីឡាអូឡាំពិក Tom Daley ប្រើប្រាស់ស្មាតហ្វូន HTC U11 ក្នុងអាងហែលទឹក។

នៅក្នុងវីដេអូ Daley បានថតរូប Selfie ជាច្រើនប៉ុស្តិ៍ស្របពេលបង្វិលខ្លួនចុះពីទីខ្ពស់។ ផ្អែកតាមសារព័ត៌មាន BBC អាជ្ញាធរឃ្លាំមើលលើការផ្សាយពាណិជ្ជកម្មបានលើកហេតុផលថា មនុស្សធម្មតាដែលធ្វើសកម្មភាពស្រដៀងគ្នានេះ ទំនងជាមិនអាចទប់ស្កាត់មិនឲ្យទូរសព្ទរបស់ពួកគេធ្លាក់ចូលទឹកក្រោមជម្រៅ ១ ម៉ែត្របាននោះទេ។ គួរដឹង HTC U11 អាចធន់នឹងទឹកជម្រៅ ១ ម៉ែត្រ។

នៅក្នុងសេចក្ដីណែនាំរបស់ HTC U11 ក៏បាននិយាយដែរថា អ្នកប្រើប្រាស់មិនគួរឲ្យទូរសព្ទនេះប៉ះផ្ទាល់នឹងទឹកដែលមិនសុទ្ធនោះទេ។ ASA បានវិនិច្ឆ័យថាពាណិជ្ជកម្មនេះ ហាក់ដូចជាបំផ្លើសនូវសមត្ថភាព HTC U11 ហើយតម្រូវឲ្យលុបពាណិជ្ជកម្មនេះចេញពីគណនីផ្សព្វផ្សាយទាំងអស់។

ខណៈពេលនេះ វីដេអូស្ប៉តត្រូវបានដកចេញពីគណនី YouTube ផ្លូវការរបស់ HTC ហើយ ប៉ុន្តែនៅមានសេសសល់លើគណនីមិនផ្លូវការមួយចំនួន៕

ចុចអាន៖

ប្រភព៖ Androidauthority ប្រែសម្រួល៖ សុខហេង