នៅតូចសោះ ក្មេងប្រុសស្រី៣រូបនេះ មានមហិច្ឆតាខ្ពស់កប់ពពក
- 2018-04-05 03:30:00
- ចំនួនមតិ 0 | ចំនួនចែករំលែក 0
នៅតូចសោះ ក្មេងប្រុសស្រី៣រូបនេះ មានមហិច្ឆតាខ្ពស់កប់ពពក
ចន្លោះមិនឃើញ
ត្បិតខ្លួននៅតូចមែនពិតតែតារាសម្ដែងវ័យក្មេង៣រូបនេះមានបំណងប្រាថ្នាចង់ក្លាយជាកំពូលតារាសម្ដែងលំដាប់ប្រទេស នៅពេលដែលខ្លួនចម្រើនវ័យធំធាត់ឡើង។
១/កុមារី ជា វ៉ាន់ពុទ្ធាលី ហៅ ជូលី បាននិយាយថា ទៅថ្ងៃខាងមុខខ្លួនចង់ក្លាយជាកំពូលតារាសម្ដែងលំដាប់ប្រទេស។ការជឿជាក់ដូច្នេះព្រោះតែប្អូនស្រី ទុកអាជីពសិល្បៈជាចំណុចចម្បងរបស់ខ្លួន តាំងពីធំដឹងក្ដីមកម្ល៉េះ ហើយម្យ៉ាងទៀត ការបានចូលសម្ដែងភាពយន្តធំៗរហូតដល់លំដាប់ហូលីវូដ គឺជាអ្វីដែលជូលីគិតថា នឹងអាចទៅរួចសម្រាប់មហិច្ឆតាដ៏ធំរបស់ខ្លួន។
ចំណុចដ៏ពិសេសមួយទៀតដើម្បីក្លាយជាតារានាំមុខ ជូលី នឹងរៀនសូត្រពីអ្នកស្រី អម្ពរ ទេវី ដែលនាងចាត់ទុកជាតារាក្នុងដួងចិត្ត និងចង់ឱ្យការសម្ដែងរបស់ខ្លួន ស្ថិតក្នុងភាពកំពូលដូចតារារូបនេះ។
២/បើនិយាយពីកុមារា រីកគី វិញមិនខុសពីប្អូនស្រី ជូលី ប៉ុន្មានឡើយ នៅថ្ងៃអនាគតប្អូនប្រុសចង់ក្លាយជាកំពូលតារាសម្ដែងប្រុសលំដាប់ប្រទេស។ មូលហេតុដែលតួឯកប្រុសក្នុងរឿង"គ្រាប់បាល់អង្រួនបេះដូង" មានការជឿជាក់ខ្លាំងបែបនេះ ដោយសារតែគិតថា ខណៈពេលនេះខ្លួននៅក្មេង ដូច្នេះហើយមានឱកាសច្រើនអាចសាងកេរ្តិ៍ឈ្មោះក្នុងវិថីសិល្បៈ។
រីកគី ថា៖"សម្រាប់ខ្ញុំដើម្បីក្លាយខ្លួនជាតារាជួមុខនោះ គឺខ្ញុំនឹងរៀនសូត្រពីលោកអ៊ុំ ទេព រិន្ទដារ៉ូ ព្រោះគាត់ជាតារាសម្ដែងជើងចាស់មួយរូបដែលស្ថិតនៅក្នុងដួងចិត្តខ្ញុំ"។
៣/ ក្រឡេកមកចាប់អារម្មណ៍កុមារី អួន នីតា វិញបាននិយាយថា ខ្លួននឹងខិតខំប្រឹងប្រែងសម្ដែងឲ្យបានល្អដើម្បីវិវត្តន៍ខ្លួនទៅជាតារាស្រីមួយរូបដែលមានកេរ្តិ៍ឈ្មោះបោះសំឡេងនៅក្នុងប្រទេសទៅថ្ងៃអនាគត។
ចំណុចពិសេសដែលកុមារី អូន នីតា ជឿជាក់លើសមត្ថភាពខ្លួនឯងដល់ថ្នាក់នេះដោយសារតែគិតថាខណៈពេលនេះខ្លួននៅក្មេងមានឱកាសច្រើនប្រឡូកក្នុងវិស័យសិល្បៈ។ ម្យ៉ាងទៀតពេលនេះខ្លួនកំពុងតែរៀនសូត្រពីរៀមច្បងមួយចំនួននៅជុំវិញខ្លួននាងដែលមានបទពិសោធន៍ច្រើនផ្នែកសិល្បៈ៕