ក្នុងចំណោមក្លឹបទាំង ៨ មានតែ១ ប៉ុណ្ណោះឈ្លក់ទឹកខុសគេ មុនមកលេង UEL យប់នេះ

2018-04-05 12:14:22
ចំនួនមតិ 0 | ចំនួនចែករំលែក 0

ចន្លោះមិនឃើញ

មុនត្រូវប្រកួតវគ្គ ៨ក្រុម ក្នុងកម្មវិធី Europa League មានតែក្លឹបព័រទុយហ្គាល់ Sporting ប៉ុណ្ណោះដែលស្គាល់ពាក្យថាចាញ់ក្នុងប្រកួតលីគចុងក្រោយរបស់ខ្លួនកាលពីពេលកន្លងទៅ ខណៈក្លឹបទាំង ៧ផ្សេងទៀត សុទ្ធតែស្គាល់ជាតិឈ្នះ។

ក្លឹបដែលចូលរួមលេងវគ្គ ៨ក្រុមចុងក្រោយ UEL រួមមាន RB Leipzig, Marseille, Arsenal, CSKA Moscow, Atletico Madrid, Sporting, Lazio និង Salzburg របស់អូទ្រីស។

កាលពីថ្ងៃអាទិត្យកន្លងទៅ ក្លឹប Sporting បានស្គាល់ជាតិចាញ់របស់ខ្លួនក្រោមថ្វីដៃរបស់ក្លឹបលេខ ៤ Braga ក្នុងលទ្ធផល ១ ទល់នឹង ០។ បរាជ័យនេះ ធ្វើឲ្យក្លឹបក្លាយជាក្លឹបតែមួយគត់ ក្នុងចំណោមក្លឹបទាំង ៨ ដែលបានស្គាល់ជាតិនេះក្នុងប្រកួតលីគចុងក្រោយរបស់ខ្លួន។

ក្រឡេកមើលក្លឹបទាំង ៧ផ្សេងទៀតវិញ។ Lazio របស់អ៊ីតាលី ឈ្នះធំជាងគេ ក្នុងលទ្ធផលដល់ទៅ ៦ ទល់នឹង ២ ទៅលើក្លឹបបាតតារាង Benevento ខណៈ មានបីក្លឹបរួមមាន Arsenal (ឈ្នះ ៣-០ លើ Stoke City), Marseille (ឈ្នះ Dijon ៣-១) និងRB Leipzig (ឈ្នះ Hannover 96 ៣-២)ដែលសុទ្ធតែស៊ុតចូល ៣ គ្រាប់។

នៅរុស្ស៊ី CSKA Moscow បានឈ្នះ FC Rostov ក្នុងលទ្ធផល ២-១ ចំណែកនៅអូទ្រីសឯណោះវិញ Salzburg បានឈ្នះ ២-០ លើក្លឹប Wolfsberger AC។

ដោយឡែក Atletico Madrid ស៊ុតចូលតិចជាងគេ បើធៀបនឹងបណ្ដាក្លឹបឈ្នះខាងលើ។ កាលពីថ្ងៃច័ន្ទ ក្លឹបបានយកឈ្នះ Deportivo La Coruna ក្នុងលទ្ធផល ១ ទល់នឹង ០។

សូមបញ្ជាក់ផងដែរថា ការប្រកួតជើងទី ១ Europa League វគ្គ៨ ក្រុម នឹងលេងនៅវេលាម៉ោង ២:០៥ នាទី រំលងអាធ្រាត្រយប់នេះ។

ក្លឹបអាល្លឺម៉ង់ RB Leipzig នឹងត្រូវប្រកួតជាមួយ Marseille របស់បារាំង ខណៈកាំភ្លើងធំ Arsenal នឹងប៉ះ CSKA Moscow។ ចំណែកឯក្លឹបអេស្ប៉ាញ Atletico ត្រូវជួបគ្នាជាមួយក្លឹប Sporting ហើយ Lazio អ៊ីតាលី នឹងត្រូវលេងជាមួយ Salzburg មកពីអូទ្រីស៕