ភឹម តារាវិបុល អារម្មណ៍មិនប្រែប្រួលទោះបី ដាលីល ធ្លាក់ខ្លួនជាមេម៉ាយកូន១
- 2018-04-07 03:59:35
- ចំនួនមតិ 0 | ចំនួនចែករំលែក 0
ភឹម តារាវិបុល អារម្មណ៍មិនប្រែប្រួលទោះបី ដាលីល ធ្លាក់ខ្លួនជាមេម៉ាយកូន១
ចន្លោះមិនឃើញ
ម្សិលមិញនេះផលិតកម្មមហាហង្ស និងទូរទស្សន៍ PNN បានធ្វើពិធីសម្ពោធដាក់បញ្ចាំងជាផ្លូវការ នូវខ្សែភាពយន្តភាគរឿង"ម្ចាស់បំណុល" នៅ Hard Rock Cafe ។ ក្នុងនោះ ភឹម តារាវិបុល ជាតួឯកប្រុសនៃរឿងខាងលើបានបញ្ជាក់ប្រាប់អារម្មណ៍ពិតមិនប្រែប្រួលចំពោះអ្នកមេម៉ាយ ភិន សុដាលីស ទោះបីពេលនេះ នាង មានកូន១ទៅហើយក្ដី។
កំលោះសង្ហា ភឹម តារាវិបុល បាននិយាយថា ចាប់តាំងពីចូលប្រឡូកសិល្បៈរហូតមកដល់ពេលនេះ ខ្លួនបានសម្ដែងជាមួយអ្នកនាង ភិន សុដាលីស បានចំនួន៤ រឿងមកហើយតាំងពីនាង នៅជាស្ត្រីក្រមុំម្ល៉េះ មានដូចជារឿង "អច្ឆរិយស្នេហ៍" “ ឆ្អែតចិត្ត" “ខ្មោចទឹក" និងរឿងទី៤គឺ "ម្ចាស់បំណុល" ។
លោកថា៖" និយាយទៅ សម្ដែងជាមួយគាត់តាំងពីនៅក្រមុំ រហូតដល់មានកូន១ ក៏ពួកយើងនៅតែចាប់ដៃគូសម្ដែងជាមួយគ្នា ហើយសម្រាប់ខ្ញុំវិញ អារម្មណ៍ខ្ញុំជាមួយគាត់(ដាលីស) គឺនៅដដែល អត់បានផ្លាស់ប្ដូរនោះទេ នៅតែរក្សាភាពស្និទ្ធស្នាលចំពោះគ្នាជានិច្ច តែមិនមែនក្នុងន័យស្នេហាទេ"។
ចំណុចពិសេសមួយទៀតធ្វើឲ្យ ភឹម តារាវិបុល មានអារម្មណ៍ល្អ និងមិនប្រែប្រួលចំពោះ ភិន សុដាលីស នោះក្រោយពីនាង ក្លាយជាអ្នកមេម៉ាយមួយភ្លើងរួចមកការសម្ដែងរបស់នាង រឹតតែល្អជាងមុនឆ្ងាយ មិនសូវខ្មាសអៀន ធ្វើឲ្យការសម្ដែងមិនសូវខុសច្រើនលើកច្រើនសារ ដូចពេលនៅក្រមុំនោះទេ។ នេះបើតាមតួឯកប្រុសក្នុងរឿង"ម្ចាស់បំណុល" បញ្ជាក់។
លោកថា៖" ពេលខ្ញុំសម្ដែងជាមួយ ដាលីស គឺពួកយើងសហការគ្នាបានល្អណាស់ ហើយខ្ញុំសូមសរសើរគាត់មានភាពវៃឆ្លាតឆាប់ចាប់បានពិសេសប៉ារ៉ូលរឿងតែម្ដង"។
ចំណែកឯលោក អ៊ិន សុភិន អគ្គនាយកផលិតកម្មមហាហង្ស បានលើកឡើងថា ខ្សែភាពយន្តភាគរឿង "ម្ចាស់បំណុល" ដែលកូនស្រីខ្លួន និង ភឹម តារាវិបុល ចាប់ដៃគ្នាសម្ដែងជាតួឯក គឺជាប្រភេទរឿងភាគបែបកម្សត់មនោសញ្ចេតនាស្នេហាអូនបង លាយឡំឈុតឌឺដងកាច់កុងគ្នារវាងតួឯកប្រុស និងតួឯកស្រី។
អគ្គនាយករូបនេះបន្តថា៖" បាទ! នេះគឺជាលើកទី២ ដែលមហាហង្ស និងទូរទស្សន៍ PNN បានសហការគ្នាផលិតរឿងភាគ ដាក់បញ្ចាំងនៅប៉ុស្តិ៍ទូរទស្សន៍ ហើយរឿងទី១ដែលពួកយើងសហការគ្នាគឺរឿង "បំភ្លេចមិនបាន" រឿងមួយហ្នឹងទទួលបានការគាំទ្រយ៉ាងច្រើនលើសលប់ សម្រាប់រឿង "ម្ចាស់បំណុលនេះវិញខ្ញុំជឿជាក់ថា មានអ្នកគាំទ្រមិនចាញ់រឿង មុននោះទេ"។
រឿង"ម្ចាស់បំណុល" មាន ៤៦ភាគ នឹងត្រូវដាក់បញ្ចាំងនៅទូរទស្សន៍ PNN នៅថ្ងៃទី ២០ ខែ មេសា ឆ្នាំ ២០១៨ បន្ទាប់ពីចូលឆ្នាំប្រពៃណីជាតិខ្មែររួច រៀងរាល់ថ្ងៃ ព្រហស្បតិ៍ សុក្រ សៅរ៍។ ចូលរួមសម្ដែងដោយ លោក ភឹម តារាវិបុល អ្នកនាង ភិន សុដាលីស លោក ថមមី ដាវ ដាវីកា និងតារាសម្ដែងស្រីប្រុសជាច្រើនរូបទៀត៕