កាន់តែធំ! ពិព័រណ៍ទេសចរណ៍កម្ពុជាឆ្នាំនេះ មានដល់ទៅ ៧០០ក្រុមហ៊ុនចូលរួម
- 2018-04-07 07:57:40
- ចំនួនមតិ 0 | ចំនួនចែករំលែក 0
កាន់តែធំ! ពិព័រណ៍ទេសចរណ៍កម្ពុជាឆ្នាំនេះ មានដល់ទៅ ៧០០ក្រុមហ៊ុនចូលរួម
ចន្លោះមិនឃើញ
ក្រសួងទេសចរណ៍សហការជាមួយក្រុមហ៊ុន Slikbooth Holding Co.,Ltd បានរៀបចំពិធីប្រកាសផ្សព្វផ្សាយជាផ្លូវការនូវព្រឹត្តិការណ៍ពិព័រណ៍ទេសចរណ៍អន្តរជាតិ Cambodia Travel Mart (CTM) លើកទី ២ ដែលគ្រោងធ្វើនៅថ្ងៃទី១១ ដល់ថ្ងៃទី១៣ តុលា ឆ្នាំ ២០១៨ នៅមជ្ឈមណ្ឌលសន្និសីទ និងពិព័រណ៍កោះពេជ្រ។
សន្និសីទសារព័ត៌មាននេះ បានប្រព្រឹត្តិទៅកាលពីល្ងាចម្សិលមិញ ក្រោមអធិបតីភាព ឯកឧត្តម ថោង ខុន រដ្ឋមន្ត្រី ក្រសួងទេសចរណ៍ និងឯកឧត្ដមអភិបាលរងរាជធានីភ្នំពេញ ថ្នាក់ដឹកនាំតំណាងស្ថាប័នរដ្ឋពាក់ព័ន្ធ ព្រមទាំងផ្នែកឯកជនក្នុងវិស័យទេសចរណ៍ជាច្រើនទៀត នៅ សណ្ឋាគារNAGAWORLD។
ពិព័រណ៍ទេសចរណ៍កម្ពុជាអន្តរជាតិ ជាវេទិកាជួបជុំបង្កើតទំនាក់ទំនងរវាងក្រុមហ៊ុនទេសចរណ៍ក្នុងស្រុក និងអន្តរជាតិនានា ដែលជាប្រភពទីផ្សារគោលដៅទេសចរណ៍ដ៏សំខាន់សម្រាប់កម្ពុជារួមមានអ្នកទិញជាតិ និងអន្តរជាតិ ពាណិជ្ជករជាអ្នកផ្ដល់សេវាជាតិ និងអន្តរជាតិសរុបប្រមាណ ៧០០ក្រុមហ៊ុន។
កម្មវិធីសំខាន់ៗ ក្នុងCambodia Travel Mart ២០១៨ នេះ មានដូចជា៖
ពិព័រណ៍ CTM 2018 នេះ រំពឹងថានឹងទទួលបានអ្នកផ្តល់សេវាកម្មជាតិ និង អន្តរជាតិប្រមាណ ៥០០នាក់ ពាណិជ្ជករជាអ្នកទិញ អន្តរជាតិប្រមាណ ២៥០នាក់ និងសារពត៌មានជាតិ និងអន្តរជាតិ ប្រមាណ ៥០នាក់ ផងដែរ។
ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ បានឲ្យដឹងថា៖«ក្នុងឆ្នាំ២០១៧ កម្ពុជាមានភ្ញៀវទេសចរណ៍អន្តរជាតិជាង ៥,៦លាននាក់កើនឡើង១១% ហើយរយៈពេល២ខែដើមឆ្នាំ២០១៨នេះ មាន ១លាននាក់ហើយ កើន១១% ធៀបរយៈពេលដូចគ្នាក្នុងឆ្នាំ២០១៧។ យើងសង្ឃឹមថាក្នុងឆ្នាំនេះទាំងមូលនឹងទទួលបានភ្ញៀវទេសចរណ៍ប្រមាណ ៦,១លាននាក់។ ដូច្នេះព្រឹត្តិការណ៍ CTM លើកទី២ នៅភ្នំពេញនេះ នឹងជំរុញធ្វើឲ្យវិស័យទេសចរណ៍កម្ពុជាកាន់តែប្រសើរ និងសម្រេចបានគោលដៅគ្រោងទុក»។
ពិព័រណ៍ទេសចរណ៍អន្តរជាតិ ២០១៨ ទទួលបានការអនុញ្ញាតឲ្យរៀបចំពីរដ្ឋាភិបាលកម្ពុជា ដែលមានក្រសួងទេសចរណ៍ជាអ្នកដឹកនាំរៀបចំ និងគាំទ្រយ៉ាងពេញទំហឹងពីស្ថាប័នរដ្ឋ និងសមាគមពាក់ព័ន្ធជាច្រើន ដូចជា សហព័ន្ធទេសចរណ៍កម្ពុជា, សមាគមទីភ្នាក់ងារទេសចរណ៍កម្ពុជា, សមាគមសណ្ឋាគារកម្ពុជា, សមាគមភោជនីយដ្ឋានកម្ពុជា, សមាគមទេសចរណ៍អាស៊ីប៉ាស៊ីហ្វិច, និងរួមសហការរៀបចំដោយក្រុមហ៊ុនរៀបចំពិព័រណ៍ធំ ២ គឺ SlickBooth Holding Co., Ltd និងក្រុមហ៊ុន TTG Asia Media & Events របស់សិង្ហបុរីដែលមានជំនាញរៀបចំពិព័រណ៍ទេសចរណ៍អន្តរជាតិល្បីៗទូទាំងពិភពលោកជាង៣០ឆ្នាំមកហើយ៕