តោះ! មកស្គាល់សហគ្រាសផលិតតុក្កតា សម្រាប់ក្មេងលេង ធ្វើពីអំបោះចាក់ដោយដៃ
- 2018-04-09 04:24:22
- ចំនួនមតិ 0 | ចំនួនចែករំលែក 0
តោះ! មកស្គាល់សហគ្រាសផលិតតុក្កតា សម្រាប់ក្មេងលេង ធ្វើពីអំបោះចាក់ដោយដៃ
ចន្លោះមិនឃើញ
សិប្បកម្មផលិតតុក្កតាសម្រាប់ក្មេងលេង ធ្វើពីអំបោះចាក់ដោយដៃ ត្រូវបានយកវត្ថុធាតុដើម និងធ្វើនៅខេត្តបន្ទាយមានជ័យរួច ទើបយកមកភ្នំពេញ ដែលបង្កើតឡើងដោយ លោក ហូ ចំណាប់ អាយុ ៣៧ ឆ្នាំ ជាស្ថាបនិកសហគ្រាសសង្គម Fairweave និងអ្នកគ្រប់គ្រងទីផ្សារសហគ្រាស Cambodia Knits។
១. លោក ហូ ចំណាប់ អាយុ ៣៧ ឆ្នាំ ជាស្ថាបនិកសហគ្រាសសង្គម Fairweave និងអ្នកគ្រប់គ្រងទីផ្សារសហគ្រាស Cambodia Knits ។ លោក ហូ ចំណាប់ បានបង្កើតសហគ្រាស Fairweave នៅឆ្នាំ ២០១៣។ សហគ្រាសនេះផលិត គ្រឿងដណ្ដប់ គ្រឿងប្រើប្រាស់ ធ្វើពីសូត្រ និងកប្បាស។ ដោយឡែក Cambodia Knits ត្រូវបានបង្កើតឡើងនៅឆ្នាំ ២០១៤ និងជាសហគ្រាស ដែលផលិតតុក្កតាសម្រាប់ក្មេងលេងធ្វើពីអំបោះចាក់ដោយដៃ។
២. បុគ្គលិករបស់សហគ្រាស Cambodia Knits កំពុងរៀបតុក្កតារូបស្វាជាគូៗ បន្ទាប់ពីវាត្រូវបានបញ្ជូនពីខេត្តមកដល់ភ្នំពេញ។ តុក្កតារូបស្វាទាំងនេះ ត្រូវបានផ្គត់ផ្គង់ដោយបុគ្គលិករបស់សហគ្រាសនៅតាមបណ្ដាខេត្ត ចំនួនជាង ១០០គ្រួសារ។
៣. នេះជាតុក្កតាមួយប្រភេទ ក្នុងចំណោមតុក្កតាជាច្រើនប្រភេទដែលផលិតឡើងដោយសហគ្រាស Cambodia Knits។ ដោយសារសម្ភារក្មេងលេង និង តុក្កតាទាំងនេះ មានតម្លៃថ្លៃបន្តិច ដូច្នេះវាមិនសូវមានទីផ្សារសម្រាប់អតិថិជន ក្នុងស្រុកនោះទេ។ ភាគច្រើន សម្ភារក្មេងលេង និង តុក្កតាទាំងនេះ ត្រូវនាំទៅលក់នៅទីផ្សារបរទេសដូចជា សិង្ហបុរី អាមេរិក និង អឺរ៉ុប។
៤. ស្ត្រីអ្នកតម្បាញ នៅភូមិប៉ោយស្នួល ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ កំពុងត្បាញភួយពីអំបោះកប្បាស ដើម្បីផ្គត់ផ្គង់ឱ្យសហគ្រាស Fairweave។ នៅក្នុងឃុំប៉ោយចារនេះ មានអ្នកតម្បាញប្រមាណ ២០គ្រួសារ ដែលត្បាញផលិតផលធ្វើពីកប្បាស និងសូត្រ ឱ្យសហគ្រាសមួយនេះ។
៥. បុគ្គលិករបស់សហគ្រាស Fairweave នៅរាជធានីភ្នំពេញ កំពុងកាត់តម្រឹមជាយភួយដែលទើបបញ្ជូនមកពីតាមខេត្ត នៅក្នុងការិយាល័យរបស់ខ្លួន។ ដូចគ្នានេះដែរ ផលិតផលគ្រឿងដណ្ដប់ គ្រឿងប្រើប្រាស់ ធ្វើពីសូត្រ និងកប្បាសនេះ មានទីផ្សារក្រៅប្រទេស ជាងទីផ្សារក្នុងស្រុក៕