ខ្លាំងបាត់...! អ៊ីណូ ត្រៀមធ្វើជាតារាធំ សម្ពោធក្លឹបក្រោមដី XXClub នៅប្រទេសកូរ៉េ
- 2018-04-10 04:05:01
- ចំនួនមតិ 0 | ចំនួនចែករំលែក 0
ខ្លាំងបាត់...! អ៊ីណូ ត្រៀមធ្វើជាតារាធំ សម្ពោធក្លឹបក្រោមដី XXClub នៅប្រទេសកូរ៉េ
ចន្លោះមិនឃើញ
តាមកាលបរិច្ឆេទដែលបានគ្រោង គឺនៅមិនយូរទៀតតារាចម្រៀង អ៊ីណូ ត្រៀមនឹងទៅធ្វើជាតារាកិត្តិយសធំដុំមួយរូបសម្ពោធក្លឹបកម្សាន្តក្រោមដីមួយនៅប្រទេសកូរ៉េ XXClub។
វត្តមានយ៉ាងកម្រនេះ អ៊ីណូ ប្រាប់ថា តបតាមការអញ្ជើញរបស់ម្ចាស់ក្លឹបតែម្ដង រួមទាំងអ្នកគាំទ្រនៅកូរ៉េផង ខណៈកន្លងមក លោកធ្លាប់ខកខានច្រើនលើកមកហើយ ដោយសារតែមមាញឹកនៅក្នុងប្រទេស ដកខ្លួនចេញទៅជួបអ្នកគាំទ្រមិនរួច ទើបតែពេលនេះ។
វត្តមាននាពេលខាងមុខនេះនៅកូរ៉េ អ៊ីណូ នឹងមានវត្តមានជាមួយតារាខ្មែរមួយចំនួនទៀតដូចជា នាយកុយ ខាត់ សុឃីម នេន ទុំ និងនាង គន្ធា។ ដោយឡែក តារាកូរ៉េ នឹងមានវត្តមានចូលរួម ឬអត់ លោកមិនច្បាស់ទេ។ វិលមកមូលហេតុ ដែលតារាខ្មែរត្រូវបានជ្រើសរើសកម្មវិធីលើទឹកដីគេនេះ ម្ចាស់បទ "ឈ្មោះជាពលករ" អះអាងថា មានហេតុផល២យ៉ាង។
ទី១ និយាយជារួម គឺម្ចាស់ក្លឹបខាងលើ គឺជាជនជាតិខ្មែរ ដូច្នេះហើយ ទើបតារាខ្មែរបានស្ថិតក្នុងបញ្ជីសម្រាប់ថ្ងៃបើកសម្ពោធ។ទី២ទៀត និយាយដោយឡែក គឺដោយសារតែម្ចាស់ក្លឹបកម្សាន្តក្រោមដីដដែលនេះ ជាអ្នកគាំទ្ររបស់លោកតែម្ដង។ "បាទបង...ម្ចាស់ក្លឹប គឺជាជនជាតិខ្មែរ គាត់ជាអ្នករកស៊ី។ កាលពីមុនបើកក្លឹបគាត់ជា Fans របស់ខ្ញុំ ហើយគាត់ចូលចិត្តបទចម្រៀងរបស់ខ្ញុំ ចូលចិត្ត Style របស់ខ្ញុំ ដល់ពេលគាត់បើកក្លឹប ទើបគាត់ទំនាក់ទំនងហៅខ្ញុំទៅតែម្ដងទៅ!”។
តាមគម្រោង អ៊ីណូ នឹងចេញដំណើរពីកម្ពុជានៅថ្ងៃទី១៣ មេសា ឆ្ពោះទៅប្រទេសកូរ៉េខាងត្បូងជាលើកដំបូងបំផុត។ លុះថ្ងៃបន្ទាប់ទី ១៤ មេសា លោក នឹងចូលរួមជាតារាកិត្តិយសបើកសម្ពោធក្លឹបក្រោមដីខាងលើតែម្ដងដែលមានទីតាំងនៅក្នុងតំបន់ស៊ូវុន។
បន្តមកដល់ថ្ងៃទី ១៥ ខែឆ្នាំដដែល អ៊ីណូ ក៏មិនទាន់បញ្ចប់បេសកកម្មនៅប្រទេសកូរ៉េខាងត្បូងដែរ គឺលោកនឹងបន្តទៅចូលរួមក្នុងកម្មវិធីធំប្រចាំឆ្នាំមួយទៀតដែលជាកម្មវិធីអបអរបុណ្យចូលឆ្នាំខ្មែរប្រពៃណីជាតិ ហៅថា "មហាសង្ក្រាន្តខ្មែរនៅកូរ៉េ" គាំទ្រដោយស្ថានឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េខាងត្បូង។
លោក អ៊ីណូ គ្រោងនឹងវិលមកកម្ពុជាវិញនៅថ្ងៃទី ១៧ មេសា ក្រោយបេសកកម្មនានាត្រូវបានបញ្ចប់៕