ចំណុចគួរឲ្យចាប់អារម្មណ៍ចំនួន ៤ អំពីជំនួប Man City-Liverpool ជើងទី២ UCL
- 2018-04-10 11:45:40
- ចំនួនមតិ 0 | ចំនួនចែករំលែក 0
ចំណុចគួរឲ្យចាប់អារម្មណ៍ចំនួន ៤ អំពីជំនួប Man City-Liverpool ជើងទី២ UCL
ចន្លោះមិនឃើញ
Manchester City នឹងត្រូវប៉ះជាមួយ Liverpool ក្នុងជំនួបជើងទី ២ Champions League វគ្គ ៨ ក្រុម នៅវេលារំលងអាធ្រាត្រយប់នេះ បន្ទាប់ពីចាញ់ ៣-០ ក្នុងជំនួបជើងទី ១ កាលពីសប្ដាហ៍មុន។ ខាងក្រោមជាចំណុចគួរឲ្យចាប់អារម្មណ៍ចំនួន ៤ អំពីជំនួបមួយនេះ៖
១.មានតែពីរក្លឹបប៉ុណ្ណោះក្នុងប្រវត្តិសាស្ត្រ Champions League ដែលអាចធ្វើការវាយបកបានសម្រេចក្នុងប្រកួតជើងទី ២ Champions League ក្នុងវគ្គជម្រុះ (វគ្គ ១៦ក្រុម វគ្គ ៨ក្រុម និងវគ្គពាក់កណ្ដាលផ្ដាច់ព្រ័ត្រ) បន្ទាប់ពីចាញ់ជើងទី១ ចាប់ពីបីគ្រាប់ឡើងទៅ។ ក្លឹបទាំងនោះរួមមាន Deportivo La Couruna ក្នុងវគ្គ ៨ក្រុម UCL រដូវកាល ២០០៣/០៤ (ចាញ់ AC Milan ៤-១ ជើងទី ១ ប៉ុន្តែឈ្នះ ៤-០ វិញនៅជើងទី ២) និងមួយទៀតគឺ Barcelona ក្នុងវគ្គ ១៦ក្រុម UCL រដូវកាល ២០១៦/១៧ (ចាញ់ PSG ៤-០ ជើងទី ១ ប៉ុន្តែឈ្នះ ៦-១ វិញនៅជើងទី ២)។
២. ក្នុង ៩ ប្រកួតចុងក្រោយ Manchester City ឈ្នះ Liverpool តែម្ដងប៉ុណ្ណោះ គឺក្នុងជ័យជំនះ ៥-០ នៅកីឡដ្ឋាន Etihad ក្នុងរដូវកាលនេះ។ ឯ៨ ប្រកួតផ្សេងទៀត ក្លឹបបានលេងត្រឹមស្មើ ២ លើក និងចាញ់ដល់ទៅ ៦ដង។
៣.បើសិនជាឈ្នះជើងទី ២យប់នេះមែន ហង្សក្រហមអាចក្លាយជាក្លឹបទីមួយដែលអាចបំបាក់ Manchester City បីដងក្នុងមួយរដូវកាលគិតពីរដូវកាល ២០០៩/១០ មក។
៤. ក្នុងចំណោម ៦ ក្លឹបដែលបានទម្លាក់ក្លឹបដឹកនាំដោយលោក Pep Guardiola មាន ៤ ដែលចុងបញ្ចប់លើកពាន។ ក្លឹបទាំងនោះរួមមាន Manchester United (ឈ្នះសរុប ១-០ លើ Barcelona ក្នុងវគ្គពាក់កណ្ដាលផ្ដាច់ព្រ័ត្ររដូវកាល ២០០៧/០៨), Inter Milan (ឈ្នះសរុប ៣-២ លើ Barcelona ក្នុងវគ្គពាក់កណ្ដាលផ្ដាច់ព្រ័ត្ររដូវកាល ២០០៩/១០), Real Madrid (ឈ្នះសរុប ៥-០ លើ Bayern Munich ក្នុងវគ្គពាក់កណ្ដាលផ្ដាច់ព្រ័ត្ររដូវកាល ២០១៣/១៤) និង Barcelona (ឈ្នះសរុប ៥-៣ លើ Bayern Munich ក្នុងវគ្គពាក់កណ្ដាលផ្ដាច់ព្រ័ត្ររដូវកាល ២០១៤/១៥)។ ក្លឹប ២ ទៀតដែលឈ្នះក្លឹបលោក Pep ដែរតែមិនបានឈ្នះ Champions League គឺ Atletico Madrid រដូវកាល ២០១៥/១៦ និង Monaco រដូវកាលមុន៕